Toalima fa’atonu fou fa’auluina a le faigamalo fou
[ata: foa'i]
Pago Pago - AMERIKA SAMOA
E to’alima nisi Faatonu fou a le Faigamalo fou ua faapea ona fa’alauiloa mai, e to’alua e sui ai ni faatonu filifilia na te’ena mai e le Fono Faitulafono.
O le faletua ia Edna Noga ua filifilia e avea ma sui Faatonu mo le Ofisa mo le Puipuiga o le Siosiomaga (ASEPA), ma o lo’o ia umia se fa’ailoga o le ‘Bachelor’ i mataupu faaSaienisi ma sa galue o ia i polokalama faapitoa a le Ofisa telefoni (ASTCA).
O Natasha M. Tuato’o-Bartley, ua filifilia e avea ma sui Faatonu mo le Ofisa o Alagamanuia mo le Sami ma le Vaomatua. O se tamaitai e galue malosi e lagolagoina le puipuiga o measina faalenatura ma le fa’aleagan’u aua fanau fai mai a le atunu’u.
O lo’o avea o ia ma totino o le Komiti Faafoe o Faatonu o le komiti o a’oa’oga faalenatura a Amerika Samoa (Nature’s Educational Laboratory of American Samoa).
Ma ua sui tulaga o ia ia Tim Jones, lea na pasia e le Senate, ae peitai, sa te’ena fa’alua e le Maota o Sui.
O Sesula Fepulea’i McMoore-Tufele ua filifilia e avea ma sui Faatonu mo le Ofisa o Paketi.
O le susuga ia Frederick Unasa Ledous, lea ua sui tulaga ia Kenn Kuaea, lea sa filifilia mo le tofiga o le sui Faatonu i le Ofisa o Faatauga a le malo. Sa te’ena e le Senate ia Kuaea, ina ua tapaina e afioga Senatoa ia ni faamaumauga e tusa ai ma se la kamupani ma lona to’alua.
O le susuga ia Tapusalaia Maneafaiga, ua toe filifilia e avea ma sui Faatonu o le Ofisa o Paka ma Malaeta’alo a le malo, o lona uiga, o le a toe fa’auluina lona suafa i leisi taualumaga a le Maota Fono, o loma nei.
Na te’ena lona tofiga e le Senate ma na avea lea ma tulaga na le’i faataunu’uina ai e le Maota o Sui sa latou iloiloga.
O lo’o fa’atalitali pea lenei ofisa i suafa o fa’auluuluga fou a ofisa ma matagaluega o lo’o i lalo o le fa’amalumaluga a le Ofisa o le Kovana, lea e aofia ai le ofisa a le Medicaid, ASHPO ma le ofisa o Fitafita Tuai.
O le faatonusili a le ASHPO lea ua feagai ma se su’esu’ega talu ai se ata vitio sa faasalalauina i luga o upega tafa’ilagi, lea na o’o atu ai lona a’ao i se tamaitai faatauoloa, ia Fepuari 16.