Ads by Google Ads by Google

Tala I Vaifanua


O le taimi ua mautu atu le Faiteu i fugala’au manogi o ie ta’i ma le meaalofa mo le tama o Kilomita Polu ma le pa’ia o aiga aua toe aso o le mafutaga ma le tina ma ona sauniga. [ata: Leua Aiono Frost]

Pago Pago, AMERIKA SAMOA

 

MALIU LE NA FA’AMOEMOEINA FA’ATULA’IGA TBAS – MAKERITA T. POLU

 

O le aso Faraile ua te’a na fa’ataunuu ai le sauniga o le na fa’atuatuaina e le faigamalo e taumafai e fa’atula’ia le faletupe mo Tagata o le Teritori o Amerika Samoa (TBAS), Makerita Tipeni Polu.

 

Na amata mai lona soifua tautua i faletupe i Amerika Samoa i le  faletupe uma sa tautuaina Amerika Samoa e amata mai i le City Bank, soso’o ma le Bank of Hawaii, ANZ Bank o Amerika Samoa, ae mulimuli ai lana tautua mo le 4 tausaga i le TBAS. 

 

E 25 tausaga o lana tautua I le ANZ bank, ae fa’ato’a fa’amavae ina ia amatalia le faletupe o le TBAS lea sa galulue fa’atasi ai ma Utu Abe Malae i le afuafua mai o lea fa’amoemoe ma lona fa’atula’iga talu mai le 2016.

 

Sa tula’i le pulesili o le TBAS, David Muhler, mo lana molimau i le la’ua galulue fa’atasi ai ma Polu, o le chief operation officer o le TBAS. E ui ina faigata, ae le’i fo’i Makerita i se taumafaiga ia ea le auaunaga mo le atunu’u. 

 

O le masina o Iulai na te’a nei sa fa’ato’a mae’a ai ona fa’alauiloa ua a’e malo faiva o le TBAS ma ua mafai ona inisiuaina teugatupe ua faia ai, ma soso’o ai ma le gafatia ona taulimaina e le faletupe  o Pepa Tala Tupe a le Master Card, o se taumafaiga na umi ona tau fa’amautu e le TBAS.

 

“E le galo oe i le galuega. Fa’afetai mo lou naunauta’i e tautua ma lou loto i le galuega Teuoloa mo le mamalu o le atunuu ma pisinisi o fa’atutuina ai. Ua e moe lava ele’i ta’uvalea lou igoa i ni fa’aletonu e tutupu mai i teugatupe ma o’a a tagata uma o le atunuu sa e tautuaina. O se tagata fa’amaoni e tofotofoina lava i mea tau le ‘oa, ua atoa lelei le 45 taisaga o lana tautua i faletupe, ae o mama lava lou igoa mai ni soligatulafono,” o se tala lea a Muhler e fa’atatau ia Makerita. 

 

O isi molimau uma, sa fa’atutu i le olaga faigaluega fa’atasi ai ma Makerita Tipeni Polu ma sa tula’i ai Tasi Scanlon, ae maise le tamaitai o Theresa Taua, o se tasi e manumalo so’o i le ANZ Amerika Samoa Bank ona o le umi o tausaga o tautua i lena faletupe. O nisi fo’i o sui sa aoaoina e Makerita ia silafia lelei le galuega o fa’atino i totonu o le faletupe. E tasi lava le leo sa fa’alogoina, o le fa’afetai i le fa’asoa o le iloa ona faia lelei o le galuega, fa’afetai i le fa’apalepale ina ia iloa lelei ona fa’atino tiute. Fa’afetai fesoasoani i taimi o tau amata ona fa’amautu o latou olaga galulue.

 

Peita’i o le molimau mai le auuso moni ia te ia, sa tula’i ai le uso matua o Vaagi Maria Tipeni Vaifanua, o le fofoga o aiga mai Moata’a Samoa. Sa iloga ona ia fa’amatala le mafuaga na  sau ai Makerila ma le toe fo’i e fa’auma lana a’oga. Sa fa’afetaia e Vaagi Maria o latou matua sa faamautu mai i ai i Amerika Samoa nei.

 

Na molimauina e le tina o Melea Polu Vaivao le latou mafutaga ma Makerita o le faletua o le latou tuagane, “E le o se nofotane Makerita i le matou va’ai, ao se matou uso moni lava. E le popole i matou i se faalavelave e tau tuu fa’atasia, e lalamua ma fa’amautu atu i ai mea uma ae maise i le tulaga o le seleni e tu’u tia’I i ai a matou saoga uma lava e fa’asoa mai e ia le matou fa’alavelave, e leai se mea e gugulu ai matou aua e mautu ma malamalama mea uma e fa’aaoga ai le seleni o le fa’amoemoe. E le o mea e faigata ia matou so’o se matou fa’atasiga, e lalamua ona fai mea lelei. Talofa i le tofa Vaagi Maria ma Florita Seumanutafa, ua matou o atu lava aumai le uso, ma ua matou le toe tu’ua atu i le tou mafutaga fa’aleuso. Ua sili atu ona tele matou taimi ma ia, nai lo oulua.”

 

Na fa’ailoa mai e ala i so’otaga fa’ainiteneti le fa’amavaega a fanau o lo’o alaala i le latou fale na tapena e le tina ma le susuga Polu i Hawaii e fa’amautu i ai ma a’o’oga. E le’i faigofie fo’i i fanau ma fanau a fanau, le motusia fa’afuase’i o le mafutaga ma le latou tina. Peita’i ua usita’ia fo’i le fa’asa ma ua tapena ai lea ala e mafuta mai ai ma fa’aleo mai o latou lagona aualofa ma le ootia lava. Ua faapena fo’i i fanau o lo’o i Amerika ma latou fanau.”

 

I lona toe sauniga sa matua faatumulia ai le mamalu o le atunuu i le aufaipisinisi sa latou fiafia i lana tautua e ala i lona tofi teu’oa ma ona uiga feso’ota’i ma i latou i ala o le va fealoa’i lelei.

 

Na molimauina fo’i e le tausi o Fiapaipai Tuaolo Fruean, “O se tasi e mau fa’atuatuaina i le tulaga o tupe teu ma tautua uma e fa’afiafia ai tagata e fa’aaoga le faletupe ua galue ai o ia. Ina ua suia mai lana tautua i le TBAS, sa le faigofie ona faia se fa’aiuga e suia uma mai i ai teugatupe o pisinisi ona o tulaga fa’ato’a amata ma afuafua le tatou faletupe. Ua tau le alu fo’i la e vaai o ia, peita’i ua aloalo ai lata va’ai ona o lea tulaga, ae le misi ai le tauanau a Makerita, ona e ao ina fa’atuatuaina e o tatou tagata ma pisinisi le faletupe o lo’o ua fa’alago, “Faletupe o Tagata o le Teritori o Amerika Samoa.”

 

E pei o le molimau a le tama o le aiga, Kilomita “Sa afuafua mai le ma’ua mafutaga, a’o faigaluega o ia o se tamaitai faigaluega lalelei a le Faletupe o Hawaii I Fagatogo, ae o lea lava ua ma’ua mavae fo’i, o lo’o faigaluega lava i le faletupe fou ua mae’a fa’atula’ia ma ua agava’a mo le tautuaina o Tagata o Amerika Samoa e ala i le teuina o latou ‘oa i le faletupe o le TBAS. Ou te matua fa’atuatuaina o ia i mea uma. E le’i faigofie ona mausali lou lea fa’atuatuaga inau a suia lana galuega sa i ai, na mautu ai mea uma o le ma’ua aiga, ae amata le TBAS. Peita’i o se tasi e galue malosi i so’o sana filifiliga ina ia ata mai ma mautu. Fa’afetai ua le tu’ua e ia le faletupe fou lenei, ae le’i atoatoa lana auaunaga i tagata ma pisinisi o Amerika Samoa. I le mafutaga, o le a le faigofie mo a’u ma le fanau, ae tatou tuu i le Atua e fesoasoani mai.”

 

E to’a lima o la’ua alo, ae to’a 16 o fanau a fanau ua mautu nei ua nofo fa’anoanoa inau a to’esea o ia mai le mafutaga i le tino nei. E to’a valu ona tuagane, ae to’a fa ona uso i le mafutaga ma ona matua, ua faiilagi o la’ua soifua i le galuega a le Atua i le EFKS.

 

TO’ATASI SE ALII UA MALIU MAI LE TA’AVALE ESIKEGI I UTUSIA

 

Ua fa’ailoa mai e i ai se tasi na maua atu ua maliu i se faalavelave tau ta’avale na opeopea ai se ta’avale i le sami i Utusi’a i Fagaitua.

 

O lea taule’ale’a sa fa’ailoa mai e nisi na o ane i lea fa’alavelave, sa i ai o ia i le nofoa i tua o le ta’avale O lona uiga e le o ia na fa’afoea lea ta’avale, peita’i ua le maua fo’i i latou sa i ai ma lea sui i le ta’avale ua lavea nei.

 

O le ta’avale sa opeopea lava i le itu papa’u o le sami i le apitagalu o Utusi’a, ma e toatele nisi ua latou pu’ea ata o le ta’avale ma fa’asalalauina fo’i i a latou tala i luga o le facebook. Ua iloa ai o le ta’avale e lanu pa’epa’e ituaiga o le Hyundai.

 

Ua fa’ailoa mai a faia se lotu fa’apitoa a le Matagaluega o le Soifua Maloloina mo le ua maliu, ona o ia o se tasi o le aufaigaluega a le DOH.

 

Pau se fa’amatalaga mai Leoleo suesue sa oo ane i lea laveaga, e to’alua isi sui sa i ai ma le ali’i ua maliu nei. Peita’i na sosola i la’ua ae le’i oo atu leoleo. O le ta’avale fo’i sa aga’i atu i sasa’e.

 

Ua fa’ailoa mai la ua mautu nei ali’I e to’alua nei, o se tasi o i la’ua sa ia fa’afoea le ta’avale, ma ua taofia nei I le falepuipui e talia o la’ua moliga i le fa’amasinoga.

 

Ua le mafai ona tali mai le fa’atonu o le Soifua Maloloina Motusa Tuileama Nua ma le Komesina o Leoleo Le’i Sonny Thompson ini fa’afesili ua fa’auia atu i le emeli, ona o lo’o ua fa’aauauina pea suesuega i lenei fa’alavelave.