245 TAUSAGA O LE US ARMY TALU ONA AMATA MAI

Ua fa’amanatu e le afioga le tatou Faipule i le Konekeresi, Aumua Amata, e ao ina tatou manatua e fa’afetaia ma fa’amanuia le atoaga o le 245 ai lenei o tausaga talu ona fa’atula’ia le USArmy lea o lo’o to’atele na’ua alo o le tatou atunuu o lo’o tautua ai, ae maise o e fo’i sa tautua ai.

O le aso fanau o le US Army i lona fa’avae mai o Iuni 14, 1775, ae o le aso fo’i e tasi i le tausaga e 1777 na mua’i tuufa’atasia ai le agiagia a le Iunaite Setete o Amerika atoa.

O lana saunoaga fa’apitoa sa ia fa’ailoa ai, “Ona o Iuni 14, ua fa’ailoga ai e le USArmy le atoaga o le 245 tausaga talu ona fa’avae mai, ma o le umi fo’i lea o tautuaina le Iunaite Setete ma Teritori o Amerika e lea vaega ‘au, ua fa’afiafiaina ai uma i tatou i lo tatou saogalemu ua latou puipuimalu ai i tatou uma. O lea fo’i se fiafiaga e ao ina tatou toe manatua ai le uluai ta’ita’i au o George Washington, o le na mua’i tofia e ta’ita’ia le US Army i lona fa’avae mai.”

“Ua fa’apea fo’i ona fa’avae e Amerika Samoa lava ia se matati’a i lea lala o le Vaega Au, ua tu mati’e lava le tatou teritori itiiti i le Iunaite Setete atoa, i le to’atele o tatou tama fanau e ulufale ma tautua i le USArmy, i tausaga ta’itasi, ma ua fa’apea fo’i ona tula’i Amerika Samoa ma ona tagatanuu uma e sapaia a tatou fanau uma i le latou lea tautua.”

“Avatu le fa’amua ma le fa’asao e fa’amanuia atu ai i fanau uma a le tatou atunuu o lo’o latou tautua ma le maelega i le US Army, ae maise fo’i o i latou sa tautua ma ua malolo manumalo mai i tiute ma faiva sa tautua ai. Ua a’e malo o outou faiva, sii ai le fa’amua i le Atua Soifua ona o le puipuiga ia te outou uma fa’atasi ma nisi ua malolo mai ti’asa, sa outou tautua fa’atasi. Fa’afetai mo le tautua matavela, le tautua toto ma le tautua tuavae.”

“O le aso lenei, tatou te toe manatua ai uma outou ma la outou auaunaga na fa’atino, ae maise fo’i o i latou na muamua atu ia te outou. O le aso lenei tatou te toe manatunatu ai ma le agaga fa’afetai, aua o le toatele o fitafita a le US Army ua mavae atu i le va’ai, ae le galo lo outou sao i lo tatou atunuu pele ma le Iunaite Setete, sa gapatia mai ai i nuu e mamao ma nofoaga o vevesi ma fetauaiga.”

“E ui ina malolo mai ti’asa pelega sa auai ma tautua mai i le taua lona lua o le Lalolagi, ae ua avea le fa’amanatuga o le aso na fa’avae ai lenei lala o le Vaega Au, ma aso tatou te toe manatua ai le tautua lea sa latou fa’atino, ma tatou aeae ai le tele o manu ua tatou o ola ai pea lava i lenei vaitau.”

“Tau ina ia alofagia ma fa’amanuia e le Atua i latou uma o lo ua latou fa’aauauina lenei tautua aoga tele i lenei vaitau o le soifuaga, o lo’o aumau solo ai nofoaga eseese o le vaega au i so’o vaipanoa o le Iunaite Setete ma isi atunuu uma o le lalolagi. Ia fa’afetaia fo’i le Atua ona o le to’atele o i latou sa tautua ua mae’a le auaunaga ma ua saogalemu mai e malolo manumalo mai nei faiva uma, ia tatou lagona fa’atasi lana tausiga na fa’asalafa ma ua tatou manuia ai pea lava e oo mai i lenei taimi.”

TAUALOA TAUTUA CAPT. MIKE TIPOTI - SAUNIGA O LONA MALIU

E ui ina ua ave’esea fa’afuase’i Mike Asiasiga Olive Tipoti mai le mafutaga mafana ma lona aiga atoa, ae le galo ai pe faaititia ai le fa’afetai sii a’e i le Atua i lana meaalofa taua sa tuuina mai i le pa’ia o aiga, ae maise fo’i o se auauna i ana ekalesia na soloa’i mai ai lona soifua auauna, ma o se tama pele fo’i o le mafutaga fa’aleaiga i le tina ma le fanau, Monica Uputaua Fuiava - Tipoti.

I ona toe sauniga i lona aiga i Fagaitua ma Amouli, sa fa’atumulia lea, sa fa’atasia atu fo’i le Matagaluega o le Puipuiga o le Saogalemu Lautele i lona vaega o le Tinei Afi ina ia fa’amamaluina ma fa’atino faiva fa’aletautua iloga i ona toe sauniga e lua na fa’atulaga e lona aiga.

O lana Ekalesia na maliu o tautua ai pea Capt. Tipoti i le EFKAS i Amouli na fa’atino ai nei sauniga fa’aleaiga i le taeao o le aso Tofi ua te’ soso’o ai i ona toe sauniga i le aoauli ona sii atu lea o lona va’a i lona oliolisaga tumau, i Amouli lava.

O le tala’aga o lona soifua ua fa’amauina ai le amataga o lona soifua i lona aiga i Fagaitua ua lisia ai ona matua tausi o Siafulei Gasologa Tipoti Olive ma Tuiauvai Olive. Peita’i o ona matua na soifua a’e ai o Uaealesi Puletasi ma Sualetuli Asiasiga Fatulegae’e Tipoti.

Na soifua mai o ia ia Novema 21, 1976 ae na maliu fa’afuase’i ia Aperila 30, 2020. E maliu o ia ua atoa le to’a ono o la’ua alo. 

O lona soifua a’oa’oina ua fa’ailoa mai na amata lava ana a’oga i le ECE i Fagaitua ma sa avea ai le tina o Lemasani Leiato Talalemotu ma ona faia’oga. Soso’o lea ma le amatalia o lana a’oga i le Alofau Elementary maea lelei lava tausaga e oo i le vasega 8, ma siitia i Fagaitua High i le tausaga e 1990 ae fa’au’u mai i le tausaga 1994.

I le tausaga e 1995 na amata ai i lana ulua’i galuega i le matagaluega o le Puipuiga o le Saogalemu Lautele i le vaega Tineiafi.

O nisi o ona faaeaga ua aofia ai le fa’aeaga na toina mo ia i le tausaga e 2002 na fa’au’u ai ma tusi pasi o le faiva fa’a- tinei afi. Na soso’o lea ma le fa’aeaga o ia e avea ai ma Satini i lea lava faiva, ae mulimuli ai ona toina ia te ia le tofiga o le Kapeteni i tiute ma faiva fa’atineiafi lava.

O lea fo’i ona faiva na maliu lava a’o fa’atino. “E ua maliliu toa, ua maumau fo’i auupega o lea taua.”

LEAI SE NOFOA MO FAIPISINISI KOMITI FA’AFOE O LE CORONAVIRUS

Na fesiligia Ella Gurr, tamaitai Taitaifono o le Fa’apotopotoga a le Aufaipisinisi le afioga Kovana Lolo Moliga, pe ua le tafa lona finagalo ina ia maua se nofoa o se sui se tasi lava o lana Komiti Fa’afoe o le Coronavirus. Peita’i o le tali “e leai!”

E pei ona fa’ailoa e Gurr, ose totino o le fa’alapotopotoga i le komiti fa’afoe, “O se auala lea e mafai ai fo’i ona fa’ao’o atu se leo o le Fa’alapotopotoga o Pisinisi i totonu o fonotaga a lea fo’i Komiti Fa’afoe, e tusa ai o aiaiga o le fa’asa o lo ua fa’amalosia nei ma ua avea ma ala ua taofiofia ai le tele o mea sa masani ai tagata lautele ma pisinisi ona fai e tautuaina ai le atunuu.”

I se tasi o fonotaga a le komiti fa’afoe i le masina ua te’a, sa saunoa ai Lolo, “O le Komiti Fa’afoe lenei mo le Coronavirus, ua fa’atulaga lava o se komiti maoti mo le Malo e fa’atautaia ai latou galuega tete’e atu i le Coronavirus, ma ua fa’atulaga fo’i e na’o tagata faigaluega i le Malo ma nisi mai le Malo Tele e auai o ni sui totino o lea Komiti Fa’afoe.”

“O mataupu uma lava tau pisinisi tumaoti o lo’o ua mafai lona fa’ailoa mai e le Matagaluega o Fefa’ataua’iga a le tatou Malo, lea e i ai lo latou fa’atonu o se tasi o sui totino iloga i le Komiti lenei, ma ua leai se mana’omia e tatau ai ona auai se sui o le aufaipisinisi i lea komiti fa’afoe tofia,” o se vaega lea o le saunoaga a Lolo.