VALA’AULIA FA’APITOA SA PEPESE & SISIVA ARTS COUNCIL  VAITAU PALAUNI TUIASOSOPO

O i latou uma sa auai i le Arts Council sa pepese ma sisiva i fa’afiafiaga i le vaitau a’o ta’ita’ia lea aufaipese ma le au fa’afiafia e le afioga Pulefa’asisina Palauni Tuiasosopo, ua vala’aulia e auai i le fonotaga e Lee Auditorium i lona potu i tua  i le itula e 4:30 i le afiafi.

O le susuga Liu Siakisone ma le Faipule Andra Samoa o lo’o ua la’ua vala’auina uma i latou o iinei i Amerika Samoa ina ia auai, mo se fa’amoemoe maualuga e fia faataunuu i toe sauniga o le afioga Tuiasosopo.

“Ua mana’omia lava ona fa’atasia i tatou uma, e i ai lava sina tatou sao e fia fa’ataunu’u mo lea fo’i ta’ita’i lelei i nei tu ma aga a le Atunuu,” o se tala lea a Liu. “Pe afai o iai sau ata o lou vaitau na mafuta ai ma a’oa’oina fa’apitoa i tatou i pesega ma fa’afiafiaga e lenei ta’ita’i.ia alofagia sau ma aumai.”

Ua fa’ailoa mai o le tino maliu o lea fo’i ta’ita’i o le atunuu o le a to’ai taunuu mai i fanua nei i le aso 24 Fepuari ma e fa’ato’a faia ona toe sauniga amata ia Fepuari 28 ma lagomau ai o ia i lona Oliolisaga tumau i le aso 29 Fepuari, 2020.

FAIA TALAVAI A MEAOLA E FIA VA’AIA FOMA’I MANU I LEONE

Ua fa’atulaga le faletalimalo o Salave’a i Leone, e fa’atautaia ai le galuega siakiga o Ta’ifau, Pusi ma isi meaola uma, ua fia faia ni taotoga e le toe toloa’i ai, po’o meaola fo’i o fia siaki po’o maua ni fa’ama’i o manu, ma faia foi tui puipuia o meaola ia soifua maloloina i latou, e pei lava fo’i o fanauiti.

Na tau sailia lava se nofoaga e ofo mai mo lenei tautua aoga mo tatou meaola fa’afagafao, peita’i ua tula’i mai le tamaita’i faipule Andra Samoa ma le pa’ia o aiga e talia lea mana’omia.

Ua fa’atulaga siakiga o meaola i le itula e 8:30 i le taeao o le aso Tofi ma le aso Faraile ma e tatau lava ona malaga sa’o atu le tagata e avatua lana fagafao mo lona taotoga poo lona siakiga.

O le tama’ita’i foma’i manu o Kirsten Jensen o lo’o i ai fo’i o se tasi o foma’i e va’aia leleia lau fagafao ma o se tasi fo’i fomai e le’i leva ona tu’ua e ia le galuega sa tautua ai i le tatou Malo.

Pe afai e o’o atu i le aso Malolo i le aso Gafua lea,e faia lava le talavai mo meaola i le Ofisa o Fa’ato’aga lea e i ai i totonu le falema’i o meaola. E le malolo i latou ae malolo le to’atele, ma o se taimi lelei lea ua fuafua ina ia mafai ona susu mai i latou e aumai latou meaola fa’afagafao ina ia va’ai le fomai manu.

Ua le fuafua lenei tautua mo na’o tagata e alaala i Leone, ae o isi nuu uma lava e tulata i Leone, ma fa’afaigofie ai ona auina atu latou meaola i le fale talimalo tu auala, fa’ao’o ane outou f le susua agafao i lea maota mo lea auaunaga.

PULE FOU O LE COS-U-LESS AMERIKA SAMOA

O le Cost-U-Less i Amerika Samoa ua fa’ailoa mai ua i ai nei le latou pule fou, le susuga Marvin Raps, ma ua ia fa’ailoa, “E tasi lava le mea ua ou sau ai ou te pulea fo’i lenei faleoloa, ina ia mafai ona fa’auia mai uma ituaiga oloa anagata ma le umi ona fa’aaoga ona o le latou lelei gaosia i le atunuu. E le gata i lea, ae ou te mana’o ina ia faaalu lou taimi e tautuaina ai fo’i Amerika Samoa ma ona tagata.”

O Raps o se tasi o tagatanuu Amerika na soifua a’e i Missouri, ma e tusa ma le 20 tasuaga o lona soifua sa tautua ai o ia i le Walmart tetele i Center i Kalefonia ma o iina e tele ai lona malamalamaga i olaga fa’atau o tagata Samoa ma oloa e fiafia tele i ai.

Ua ia fa’aalia nei, “Ua ou taumafai e galulue fa’atasi ma falegaosi Oloa, ae maise o le au fai faleoloa tetele i fafo, ina ia una’ia mai ai oloa e fiafia ma alumia i fa’atauga a tagata o le tatou atunuu nei.”

Ua le manatu o ia e aumaia i se isi lava malo oloa e fa’atau atu i o tatou tagata, ae ua una’ia malosi mai oloa e gaosia i Amerika lava latou mo le mamalu lautele o le atunuu.

“Ua aoga fo’i nei oloa, aua e alumia tele fo’i i fa’atauga a i latou e gasolo mai atumotu tuaoi o le tatou teritori.”