“IA MAUA’A I LOU SOIFUA MALOLOINA” - OLA MA LOU GASEGASE MO SE TAIMI UMI

O le ulua’i aso o Novema 2019, na fa’atulaga ai e le  Koalisi a le DOH Tobacco Diabetes ina ia timaia e i latou le vasega o ala fa’asalalau ua i le atunu’u, ina ia avatu le fe’au taua i le mamalu lautele o le atunu’u, “Ia maua’a i lou Soifua Maloloina!”

O lenei manulauti, ua toe fa’amanatu ai i le mamalu lautele, ia le fa’atamala lava i tatou uma, i le faiga o se siakiga o lou soifua maloloina, aua o le vave ona silafia o lo’o ua e a’afia i se gasegase tumau, o le ala fo’i lea e vave ai ona tima’ia oe i ala e mafai ai ona e soifua pea ma gafataulima lou gasegase tumau ua i ai.

O fa’amaumauga mai le mamalu lautele o lo ua togafitia ma faia talavai tumau i le falema’i tele i Faga’alu ma isi falema’i fa’aitumalo, ua maua ane ai, e maualuga tele le faitau aofai o le atunu’u ua maua i le Ma’i Suka ma le Toto Maualuga, o ma’i ia e te maua ai loa, e le toe mafai ona te’a ese ai oe, ae soloa’i atu fo’i ina maua ai oe i si ma’i fita o le fatu ma le fa’amama toto, pe a umi lava o e soifua ma togafitia lou suka ma le toto maualuga.

Na faia se su’esuega i le tausaga e 2017 a le Matagaluega o le Soifua Maloloina, maua fa’amaumauga, ona toe faia lea o le isi suesuega i le 2018, ma ua mafai fo’i ona fa’atusatusa fa’ai’uga o nei suesuega sa faia.

Mai le fa’aiuga na maua mai, ua va’aia ai le pa’u teisi o le faitau aofa’i o i latou ua toe maua i le suka, ae o le toto maualuga ua si’i maualuga lona faitau aofai o i latou ua fa’ato’a maua lava i le toto maualuga.

Ua tatou iloa fo’i, o le Toto Maualuga e aga atu ina a’afia lou fatu ma avea fo’i ma ma’i tumau ia te oe. Ae o le Ma’i Suka, e aga atu ina fa’aleagaina ai ou fatuga’o, ma soloa’i ai le tagata mai suka ina fa’amama le toto ona o le tele o fuala’au e inumia i aso ta’itasi. A maua la oe i mea uma e lua, ua atili televave ai ona a’afia lou sui i isi ma’i tumau fita, ma o le ala lea e matua toe fafagu atu ai ma tata pea logo a Masefau i le finagalo o le mamalu lautele, ina ia Maua’a i lou Soifua Maloloina.

Ua amata nei tima’iga a le Koalisi, ona o le masina lenei o Novema, o le latou masina e fa’ataua ai tima’iga, togafitiga ma fa’alauiloaga uma lava e taumafai ai ona fa’aitiitia lava le toe a’afia o nisi i le ma’i suka ma le toto maualuga i totonu o le atunu’u.

I le fa’atalanoaga sa auai sui o le Koalisi fa’apea fo’i ma sui mai le Ofisa o le Ma’i Suka i le LBJ, ma sui o le au fa’asalalau i le atunu’u. Ua fa’ailoa mai ai fo’i le fuafuaga fa’ataoto a le Koalisi lea aua le masina atoa o Novema 2019, lea ua fa’atulaga mo lea fa’amoemoe taua, e faalauiloa, tima’i ina ia togafitia le Ma’i Suka, ma mafai ona soifua so’o se tasi e po’ia ai, i se olaga uma ma le fiafia ma lona aiga, ona ua ia gafataulimaina lona gasegase.

O Amerika Samoa lea ua numera tasi i le to’atele o i latou ua fa’amama le toto, ma o nisi na o mea taua tele i le fa’alauiloaga lea ua mae’a ona fetufa’i ai sui fa’asalalau ma le koalisi lenei. Ae afua ona to’atele i latou ua maua i lea gasegase faigata, ona e le o to’aititi le faitau aofai o le atunu’u ua maua i le ma’i suka ma le toto maualuga, ma ua loa fo’i tausaga o soifua lava ma inumia fuala’au nei e tele, ma ua fa’asolo atu lava ina matutua, ae o maua ai pea ma taumafai pea e togafitia o latou gasegase tumau nei e ala i le inumia o fuala’au.

Ua fautuainale vasega o talavou, pe afai e le’i maua oe i le suka ma le toto maualuga, ia e amata ona galue atu i le taimi nei, ia e le maua ai i lou o’o atu i le 35 tausaga fa’asolo atu ina matua le soifua.

To’aga e tausami i mea’ai paleni i au ‘aiga ta’itasi o le aso. Ia le so’ona tele lau tausami, ae ia tausami ia maua le malosi, ma muta loa le ‘ai pe a o’o ina lagona ua ma’ona. A mae’a ia to’aga i se fa’amalositino pe fa’agaoioi le tino i fe’au tau le fatu aiga, ia toe fa’aaogaina le tele o mea’ai na tausami ma ua fa’amu fo’i le ga’o o na tausami ma fa’asau ai i fafo le afu o le tino.

O le polokalama fa’apitoa ua fa’ataoto o le a faia ai le semina tele lea e amatalia ia Novema 8, 2019 e faia lea i le Tradewinds Hotel, ma e i ai sui e vala’aulia fa’apitoa i aso ta’itasi o le a fa’atautaia ai lenei fonotaga fa’aleaoaoga.

O le masina atoa o Novema, o le a faia ai lenei fa’amoemoe.

LIPOTIA MANOGI LEAGA ISUMU MAMATE - OFISA O LAFOGA

O le manogi leaga tele o Isumu mamate na mafua ai ona tapunia le Ofisa o Lafoga, lea e i le fogafale muamua o le Maota o le Malo i Utulei. O nisi o le aufaigaluega a lea Ofisa na latou lipotia le manogi o manu mamate i le amataga o le vaiaso ua te’a i le matagaluega o le Soifua Maloloina, ma sa fa’atautaia loa se sailiga ma maua ane ai Isumu o lo’o mamate i le va o le puipui, na ave’esea nei isumu , peita’i e le o faigofie ai le manogi ma ua fa’atonua loa e le Fa’atonu o le Matagaluega o le Soifua Maloloina, Motusa Tuileama Nua, ina ia malolo le aufaigaluega a lea Ofisa se’ia mae’a ona kilia lea manogi ma ua tatau ai ona toe faigaluega i latou.

O’o mai i le aso Lulu, na toe asia ai e le ofisa o le Soifua Maloloina  pe mata ua te’a ese le manogi, peita’i e leai. O le aso Faraile o le vaiaso ua te’a sa toe tatala ai le Ofisa o Lafoga.

Ua i ai nisi o mea ua fa’atonua e le Matagaluega o le Soifua Maloloina. Ua fa’atonuina ina ia ave’esea mai le lapisi i totonu o le Ofisa ina ia mafai ona ona le toe sofa’i atu e isumu le latou Ofisa ma se’i fa’aalu i fafo le ea mai le latou Ofisa.

ASIA E LE DOI GALUEGA FA’ATUPE E LE CIP

O Poloketi uma lava o lo’o fa’atupe i le Capital Improvement Project ua asiasi mai nei ni sui iloga o le Matagaluega a le Initeria. O lo ua mae’a toai taunu’u lea aumalaga ma ua aofia ai Ms Aimee Munzi, ma le tama’ita’i e va’aia toto’a galuega fa’atino e aoga i le mamalu lautele o le atunu’u Ms Krystina Alfano.

E tasi le vaiaso atoa lea o le a nonofo ai i la’ua ma faia la’ua asiasiga. Sa asia muamua e i la’ua nei Ta’u, Ofu ma Olosega  a’o le’i taliu mai i Tutuila nei e fa’aauau ai le la’ua asiasiga.

O poloketi na asia, e aofia ai le mea toso va’a i Satala, ASCC, o le ASPA o le falema’i i Faga’alu, o le ASTCA, Pulega o Uafu ma Malae Va’alele ma le Matagaluega o Galuega Lautele, Ofisa o Tupe a le Malo ma le Ofisa o le Kovana SIli.