Ads by Google Ads by Google

Tala I Vaifanua


[ata: foa'i]

MAUA FA’ATAUGA MEA’AI SAMI & FIGOTA MAI SAMOA - DOH

 

Ua fa’ailoa e le Vaega a le Environmental Health a le Matagaluega o le Soifua Maloloina (DOH) lo latou mauaina o mea’ai sami ua aumaia mai Samoa, ma ua fa’atau atu i le mamalu lautele ae leai ni pemita po’o laisene pisinisi mai le Matagaluega o Fefa’atauaiga (DOC).

 

O le masina ua te’a nei, na maua ai ese ali’i asiasi a le DOH fagu sea, faguloli ma gau ua fa’atau atu i le mamalu lautele, ae ua mae’a fa’apipi’i ai fo’i leipo o lo’o fagota iinei nei mataiai o le gataifale. O le igoa o oloa nei ua tusia i le leipo o le evenisamoa.

 

Ua fa’ailoa e le au suesue a le DOH, “Ua tele na’ua le tulaga o mea’ai ua mae’a ona fa’avela ua aumaia mai Samoa i le tatou malo, ma ua matauina lava, ua aumaia lava fa’atau loa e aunoa ma se fa’atulaga o se pemita e mua’i pasia fo’i se laisene mai le DOC ma le DOH ina ia uia ai ala o le tulafono tau fefa’ataua’iga i le va o tatou malo na lua.”

 

Ua fa’ailoa mai e John Fuimaono o le Environmental Health a le DOH, “Ua taofia nei lea pisinisi ua va’aia lona fa’aaogaina sa’o o meataumafa e fa’avela mai lava i Samoa ma aumai loa ma fa’atau atu. Ua fa’apena ai fo’i ona faia ma oloa tau meataumafa mai le sami, ua fa’aulu mai lava ma fa’atau atu loa i tagata lautele iinei.”

 

“Soo se tasi lava e malaga mai Samoa, e sau ma aumai lona oso o nai mea’ai na e mafai ona aumai ma tatala atu lava e fa’aaoga e le aiga latou mea’ai. Peita’i o lea ua mataulia lava, ua so’ona aumaia fa’atele ma fa’atau atu  le lautele.”

 

Afai ae maua ane sau fagu sea po’o se fagu lolo ma fugafuga ma gau, ia siakia muamua lava, pe le o se tasi o nei oloa ua aumaia mai Samoa, ae le o se fagu sea sa tuia iinei. E mafai ona lipotia ia mataupu o le DOH i Fagaalu.

 

OFISA KOVANA FA’AMAONIA MALAGA FA’AAOGA AI MAILA HAWAIIAN AIR

 

O ai tonu lava e mafai ona faaaogaina i ai Maila mo femalaga’iga a le Malo lea e maua mai i le Hawaiian Airlines? O le fesili na fa’afofogaina le tali e le Komiti o le Soifua Maloloina a le Maota o Sui na fesiligia ai sui o le Kamupani Va’alele sa fetufa’i ma i latou i mataupu tau le Polokalama o tagata gasegase e auina atu i fafo mo togafitiga mai le LBJ.

 

O Carrie Magalei o le Ofisa o Tupe a le tatou malo, ma Tammy Vollrath o i la’ua ia na la’ua va’aia fa’apitoa le polokalama o Maila e fa’aaoga e le Malo, talu mai Mati 2019.

 

Ua fa’ailoa mai e i la’ua, e faia uma e i la’ua le feuiuia’iga o pasese ua fa’aaogaina ai nei maila, ae o le fa’atagaga e sau sa’o lava mai le Ofisa o le Kovana Sili, lea ua i lalo nei o le va’ava’aiga a le tofa Fiu Johnny Saelua.

 

Pe afai e mua’i maua le fa’atagaga e fa’aaogaina ai maila nei mai le Ofisa o le Kovana, ona fa’ato’a faia lea o le talanoaga ma e Hawaiian Air ina ia fa’amautu aso, taimi ma le mamao e o’o i ai le faigamalaga, ona tu’u atu loa lea ma maila ua i ai a le malo e fa’aaogaina pe fia se pa’u o le a maua ai mo lena malaga.

 

Ua fa’amaonia mai fo’i e Magalei, e tele ina lelei pa’u o le pasese e maua mo malaga a sui ua agava’a i maila nei a le Hawaiian Air, ma e mae’a loa le feutaga’iga, ona fa’ato’a fai mai loa lea o le pepa o le pasese i le igoa o le sui ua fa’ataga ona fa’aaogaina maila a le Malo mo lona pasese.

 

O le fesili, “Po’o ai tonu la lea e mafai ona fa’aaogaina i ai maila a le Malo i a latou malaga?”

 

O le vasega o e gasegase ua fa’ataga e malaga i le polokalama o le “Medical Referral Program,” fa’atasi ai ma le fanau ta’a’alo ua manatu le Malo e fa’aaoga i ai maila.

 

Na fa’ailoa e Lafo Allen mai le LBJ Medical Center, “Na i ai le suiga i le polokalama lea ma le mea sa sau a’i ina ua tula’i mai Kovana Lolo Moliga. Ua faataga e ia ona fa’aaoga le polokalama o Maila a le Malo i pasese o tagata gasegase e malaga i le polokalama a le Medical Referral ma latou tagata e malaga e fesoasoani i gasegase na, fa’apea ma tamaiti a’oga.”

 

Ua fa’ailoa mai e Allen, “e le silia o le to’a 10 i latou na malaga i Maila a le Malo faapea ma latou sui e fesoasoani i le avega ma le tausiga o na gasegase a’o va’ava’aia lea polokalama e le Treasury ie va’ai fa’apitoa e Livai, peita’i ua fa’asalafa nei ma isi sui nei  ona ua fa’ataga mai le Ofisa o le Kovana.”

 

“I le taimi nei, ua leai se ma’i o toe malaga e fa’aaogaina ai maila nei, talu mai lea suiga ua faia nei mai le Ofisa o le Kovana, ua matele ina talosagaina le fa’aaogaina o maila e totogia ai pasese o gasegase malaga, ae oo lava i le taimi e malaga ai, e lei maua se ioega, ma ua le fa’aaogaina ai fo’i la maila nei,” o se tala lea a Allen.

 

MALAGA ROBERTA LAUMOLI FA’AALIA LAEI SAMOA I PERETANIA

 

I le aso 12 & 13 Setema 2019, ua auai atu ai le tamaita’i faia’oga mai Pavaiai Elementary, Robeta Laumoli mai Vailoa ina ia fa’aalia ana la’ei Samoa i le fa’aaliga o Lavalava i Lonetona, Egelani - London Pacific Fashion Week (LPFW).

 

O lenei fa’aaliga i Lonetona, o se mea fa’ama’ite ia Oketopa 2012 ma sa muai fa’atula’ia ina ia saili tupe mo se fesoasoani mo le vasega o Vaega Au  o Fiafita Peretania, ma sa mua’i fa’alauiloa o le “Help for Heroes” e tua ai le tala ua tusia mai i le latou Uepesite londonpacificfashioweek.com.

 

Peita’i mo le lima tausaga o loo fa’aauau pea ona fa’atautaia nei fa’aaliga a le LPFW ma ua avea ma se ala ua tapena e fa’aalia ai e sui e talenia i le tapenaga o lavalava ituaiga eseese i le atumotu o le Pasefika i tauaga ta’itasi.

 

Ua mautinoa nei o le a avea Laumoli ma sui o Amerika Samoa ma ona oloa gaosi i tulaga o lavalava ma sikaili eseese i lea fa’aaliga, ma o se fa’afetai lea e mafai ona momoli i lea talavou sogasoga o le tatou atunuu. Ua aofia nisi o lo’o malaga e faaalia latou lavalava mai Guam, Niu Sila, Papua Niu Kini, Tonga, Hawaii ma Fiti i lenei fa’aaliga.

 

O le igoa o lana pisinisi o le “Fierce Fashion BYRL”. O ia totino o le SOFIAS i Amerika Samoa.

 

“Ou te mana’o ina ia mafai e tagata uma ona ati lana va’ai, ia le na’o foliga va’aia o se tasi, ae ia taga’i i totonu i ona lagona, ua na’o se fa’afafine ua e taga’i atu i ai, ae o se tasi e aoga mo galuega lelei ua agava’a e fa’atino i le olaga nei mo le lelei lautele o le atunu’u, e ala i la’ei matagofie ma le saunia lelei,” o sana tala lea.