PASEFIKA

MOLIA NI LEOLEO I FITI I SOLITULAFONO MAMAFA

E to’avalu leoleo Fiti ua molia nei i solitulafono mamafa, e aofia tu’ua’iga i le faia o amioga mataga faapea ma le umiaina o vaega o fualaau faasaina, e tusa ai ma se ripoti mai i vaega fa’asalalau a Fiti.

O nei leoleo e i le va o le 25 ma le 51 tausaga, ma o lo’o molia foi i latou i le fa’ao’olima, fa’afefe tagata ma le le totogia o faatauga ma aitalafu.

E tusa ai ma fa’amaumauga a le ofisa a leoleo i Fiti, i le masina ua tuanai na va’aia ai se siitaga o soligatulafon i totonu o le atunu’u (19%), pe a faatusatusa i le tausaga ua mavae.

O soligatulafono mama na si’itia i le 10% ia Novema, pe a faatusatusa i fuainumera o le masina o Oketopa, e aofia ai ma solitulafono e pei o le fa’amalosi teine, faomea, susunu o fale ma le gaoi.

I tulaga o fa’alavelave e a’afia ai fualaau faasaina, o lo’o va’aia le fa’aauau pea ona siitia o fuainumera o faalavelave tutupu, ma ua o’o atu i le 214 faalavelave tau i fualaau faasaina na ripotia i le masina ua mavae.

Pe a ma le 76 tagata o le atunu’u na lokaina i le vaiaso ua mavae, ona o soligatulafono e a’afia ai vaega o fualaau faasaina.

Na ta’ua e le sui Komesina o Leoleo ia Juki Fong Chew, o le toatele o i latou na lokaina, on aua molia i le umia o vaega o fualaau faasaina faapea ma le totoina po o le gaosiaina o vaega o fualaau faasaina.

FILIFILIA ALOAIA PALEMIA O TONGA

Ua filifilia aloa’ia e le afioga i le Tupu Tupou VI ia ‘Aisake Eke e avea ma palemia o le malo o Tonga, i se palota faailoilo na faia ia Tesema 24.

Ua sui tulaga nei ‘Aisake ia Siaosi Sovaleni Hu’akavameilliku lea na faamavae mai i le tofi palemia ia Tesema 9, ae e le’i palotaina e le malo.

Sa ta’ua e se tasi o sui o  vaega fa’asalalau faapolokiki e faapea, ua mafua ona tuai le faatulagaina o le faigamalo ona o le tele o le a’afiaga o le tupu.  Na saunoa Kalafi Moala, e foliga mai e sili atu ona a’afia ia le Tupu o soifua nei,  i le filifiliga o minisita o le malo, nai lo i latou ua mavae atu.

O le aso 22 o Ianuari sa fuafua e faatulaga ai le kapeneta fou, ae peitai, ua toe tolopo ia Ianuari 30.

FAIGATA ONA FAATUMU E LE OFISA LEOLEO A LE ATU KUKI AVANOA E 40

E 40 ni avanoa faigaluega i totonu o le Ofisa a Leoleo a le atu Kuki o lo’o taumafai e faatumu ae peitai, o le faafaigata ona o le tulaga maualalo o totogi.  O le totogi amata e $9.50NZ i le itula.

I le vaiaso ua tuanai na fa’ailoa atu ai e le alii Palemia ia Mark Brown i le vaega fa’asalalau a le Cook Islands News, se vaegatupe fa’aopoopo i  le paketi 2024-2025 a Niu Sila o iai nei, e $328 miliona, o le a faapea ona fa’aagaaga mo ni poloketi taua, e aofia ai mo le ofisa a leoleo.

Sa fa’aalia e le so’oupu a le Ofisa a Leoleo, o Trevor Pitt, le fetu’una’i solo o tagata faigaluega a le ofisa a leoleo o iai, ina ia mafai ona faataunu’uina galuega uma a le ofisa ma o se tulaga ua loa ona faia i totonu o lenei ofisa.

Na ta’ua e Pitt le manaomia o nit agata faigaluega, e aofia ai ma leoleo, pe a ma le 30 i le 40.  E ui i lea, sa fa’aalia mai e Pitt, le le’i avea o lenei faafitauli ma tulaga ua suia ai fuainumera o soligatulafono i totonu o le atunu’u, lea o lo’o tumau lava i le tulaga e tasi.

Sa faamanino mai e Pitt le faafaigata o feagai ma leoleo ona o le tele o mafuaaga, e le gata i totogi ae o le toatele o alii ma tamaitai talavou, ua tu’ua le atunu’u aua galuega i Niu Sila po o Ausetalia, ona o le maualuga o totogi e maua ai.

Ae e faafaigata ona aumai nisi mai i atunuu i fafo, e pei ona ta’ua e Pitt, ona e le o lava le tupe e totogi ai le aumaia o ia tagata faigaluega, pasese vaalele po o le totogi o fale e faamautu ai.

Ua tilotilo nei le Ofisa a Leoleo i ni is isa avea ma leoleo i tausaga ua tuanai, o lo’o toe fia fo’i mai e galulue, ona mafai lea ona siitia tulaga o i latou o lo’o galulue i le taimi nei.