Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

MOLIA SE ALI’I I LONA FA’AMALOSIA O LE TAMA A LONA TUAFAFINE

 

E 39 tausaga o se ali’i ua molia nei e le malo i moliaga mamafa e 8 e aofia ai moliaga e 3 o le faia o uiga mataga i se teineititi e i lalo o le 12 tausaga le matua; 2 moliaga o le faia o uiga faasotoma; ma moliaga e 3 o le tagofia lea o itutinosa o se teineititi e laititi i lalo o le tulafono.

 

E $50,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua.

 

Talu ai o le puipuiga o le teineititi na a’afia mai le ono silafia e le atunu’u lautele, o le mafua’aga lea ua le mafai ai e le Samoa News ona fa’ailoa le igoa o le ua molia. O le teineititi o lo o aafia, o le tama lea a le tuafafine a le ua molia.

 

Na taua e le malo e fa’apea, o lenei mataupu na tofu atu i le Ofisa o Leoleo ina ua faila e le Tina o le teineititi sana tagi fa’asaga i lona tuagane, i lona faia lea o uiga mataga i lana tama teine e 11 tausaga le matua. O le fa’alavelave na tula’i mai i le po o le aso 16 ma le 18 o Aokuso, 2018. E nonofo fa’atasi le ua molia ma lona tuafafine ma lona aiga i le fale e tasi.

 

O le taimi o le po na tula’i mai ai lenei solitulafono, ina ua alu atu le ua molia ma ave le tama a lona tuafafine i totonu o lona potu ma fa’atino ai le solitulafono. Na fa’aalia e le ua molia i Leoleo e fa’apea, ua leva ona ia naunau e avea le tama a lona tuafafine ma ana paaga, o le mafua’aga lena o lona fa’atinoina o lenei solitulafono.

 

Afai ae mafai ona totogi le tupe ua fa’atulaga e tatala ai le ua molia i tua, ua fautuaina e le fa’amasinoga, e le tatau ona toe nofo i le fale o le aiga o lona tuafafine, ae tatau ona saili se isi nofoaga fou e nofo ai.

 

POLOU VILI

 

E 59 tausaga o se ali’i na pu’e fa’apagota mai e Leoleo mai Pago Pago i le fa’aiuga o le vaiaso na te’a nei, ona o gaioiga sa ia faia e ono save’u ai le nonofo filemu o tagata. O gaioiga sa faia e le susuga a Pulou Vili e pei ona taua i le tagi a le malo, na avea le teena o ia e se tama’ita’i ma itu na fa’aaoga ai e le ua molia se tama’i naifi ma tipi ai lona tino (tulou).

 

Na teena e Vili tu’uaiga fa’asaga ia te ia ina ua tula’i i luma o le fa’amasinoga fa’aitumalo i le vaiaso nei. I lona teena ai o ia tu’uaiga, ua fa’atulaga ai loa le isi ana iloiloga e faia lea i le masina fou o Oketopa.

 

I le tagi a le malo o lo o taua ai e fa’apea, o le fa’aiuga o le vaiaso na te’a nei na logoina ai e se molimau le Ofisa o Leoleo i Fagatogo mo se fesoasoani, ina ua molimauina se alii o lo o ia faia ni gaioiga e fa’aoo ai manu’a i lona tino.

 

Na aga’i atu Leoleo ma molimauina Vili o lo o i luma o se fale kalapu i Pago Pago, ma fesiligia ai loa o ia i le mafua’aga o lana gaioiga, ae na tali le ua molia, na ita ina ua musu le tama’ita’i e faigaluega i le fale kalapu e avea o ia ma ana uo tama’ita’i.

 

ALLEN OLIVA

 

O le ave ta’avale o le ta’avale pikiapu lea na taofia e Leoleo i le soona alu saoasaoa i le vaiaso na te’a nei, ua molia nei o ia e le malo i le moliaga mamafa o lona umia fa’asolitulafono leva o vaega o le pauta fa’asaina o le aisa.

 

O lea moliaga na afua mai ina ua maua e Leoleo i totonu o le ta’avale a le ali’i o Allen Oliva se paipa tioata o lo o totoe ai i totonu vaega laiti o le pauta pa’epa’e. Na faia se suega i le vaega o le pauta pa’epa’e na totoe i totonu o le paipa tioata na maua ia Olivia ma fa’amaonia ai, o vaega ia o le pauta fa’asaina o le aisa.

 

O le moliaga o le umia fa’asolitulafono o se vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, pe fa’asala fo’i i fa’asalaga uma ia e lua.

 

O le vaiaso na te’a nei na tula’i ai Oliva i luma o le fa’amasinoga fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia le tupe e $5,000 e totogi, ona fa’atoa mafai lea ona tatala o ia i tua.

 

O lo o taua i le tagi a le malo e fa’apea, a o fa’atinoina tiute masani a Leoleo i luga o le alatele i le vaiaso na te’a nei, sa latou molimauina ai se ta’avale pikiapu o aga’i atu i Tafuna i se saoasaoa uiga ese e le fa’atagaina i le tulafono.

 

Na taofi e Leoleo le pikiapu ma iloa ai, o Oliva o lo o fa’afoeina le ta’avale. I le taimi na taofia ai e Leoleo le ta’avale a Oliva, sa molimauina e Leoleo ni gaioiga i totonu o le ta’avale, e foliga mai o lo o taumafai Oliva e nana se mea faitino o loo uu i lona lima i lalo o le solovae o le ta’avale.

 

Na fesili Leoleo ia Oliva poo le a le mea o lo o ia taumafai e nana, sa leai se tali a le ua molia, se’i vagana ai lona tago ma tatala lona lima, ma iloa atu ai e Leoleo se paipa tioata o loo ia uuina.

 

Na fesili Leoleo ia Oliva poo le a le mea o lo o ia u’uina, na tali le ua molia, “o le paipa”. O le mae’a ai o suesega sa faia i le paipa tioata sa maua ia Oliva, na taofia ai loa o ia i le toese i Tafuna e fa’atali ai le taimi e tula’i ai i luma o le fa’amasinoga mo lana ulua’i iloiloga.