Ads by Google Ads by Google

Tala otooto o Fa’amasinoga

ausage@samoanews.com

ALAPATI VAIVAI

 

Na teena e le ali’i o Alapati Vaivai tu’uaiga o le fa’atupu vevesi i nofoaga faitele fa’asaga ia te ia, ina ua tulai i luma o le fa’amasinoga fa’aitumalo i le vaiaso na te’a nei. Na taofia fa’apagota mai e Leoleo ia Vaivai ona o se fa’alavelave na tula’i mai i Lauli’i i le vaiaso na te’a nei. Ae o le itu e sili ona ogaoga ai lana gaioiga, o lona sola ese lea mai Leoleo ma sii lona afafine laititi.

 

Na teena e Vaivai moliaga o le faatupu vevesi i nofoaga faitele, atoa ai ma lona faia o ni gaioiga e ono lamatia ai le saogalemu o fanau laiti. O le faaiuga o le masina lenei o Aokuso lea ua fa’atulaga e toe tula’i ai o ia i luma o le Fa’amasinoga.

 

O ni isi o tuutuuga na tuuina mai e le afioga i le ali’i Fa’amasino ia Fiti Sunia e tatala ai o ia i tua, o le aua lea nei ona toe tagofia le ‘ava malosi, pe na te toe solia se tulafono a le malo.

 

O lenei mataupu na tofu atu i le Ofisa o Leoleo, ina ua talosagaina e ni isi o aiga se fesoasoani a Leoleo, ona o Vaivai o loo fealua’i solo ma faatupu vevesi i totonu o le latou aai.

 

Na taua e le na a’afia e fa’apea, na fa’ateia o ia ina ua alu atu le ua molia ma laulauvavale atu ia te ia, sosoo ai ma le alu atu ia te ia ma le sapelu i le isi lima ae o le ma’a i le isi ona lima.

 

Na uma le fia ulavale o Vaivai ina ua ia vaaia Leoleo ua taunu’u, ma alu ai loa i le atoa i tua o le fale Inisinia i Lauli’i e lafi ai, ao ia sii lona afafine. Na pu’e faapagota e Leoleo ia Vaivai ma auina atu loa i le ofisa o Leoleo mo suesuega. Na taua e Leoleo le fa’alogoina o le manogi pia mai le tino o le ua molia i le taimi na taofia ai o ia.

 

FAAOOLIMA I LONA TO’ALUA AO MATAMATA I AI LANA FANAU

 

E 40 tausaga o se ali’i na pu’e fa’apagota e Leoleo mai Nuuuli i le vaiaso na te’a nei, ona o tu’uaiga i lona fa’aoolima lea i lona to’alua i totonu o le latou fale, ao vaai i ai si ana fanau e to’afa, o le Tina o si ona to’alua, atoa ai ma aunty e to’alua o lona to’alua.

 

E ui na fa’ailoa e le fafine na a’afia i Leoleo ua 2 aso o inu lona to’alua, ua vaaia fo’i le matua ‘ona o ia, peita’i o le taimi lava na taunu’u ai Leoleo, na te’a ai loa le ‘ona ma le fia ulavale o lenei ali’i, ae alu loa i le atoa ona o le musu ina ne’i loka o ia e Leoleo.

 

Na pu’e fa’apagota e Leoleo le ua molia ma taofia ai loa mo suesuega, mulimuli ane taofia i le toese i Tafuna, ona o popolega i le saogalemu o si ona to’alua ma le aiga atoa.

 

Ua molia nei e le malo lenei ali’i i moliaga o le fa’atupu vevesi i nofoaga faitele, atoa ai ma le fa’aoolima i le tulaga tolu. Ua toe tatalaina nei o ia i tua e aunoa ma se tupe e totogi, i lalo o tuutuuga e aofia ai le tatau lea ona ia tausia le filemu i totonu o lona aiga, ma aua ne’i ona toe tagofia le ‘ava malosi.

 

O lenei mataupu na tofu atu i le Ofisa o Leoleo i Tafuna, ina ua talosagaina e le fafine na a’afia se fesoasoani a Leoleo, ina ua le mafai ona fa’ato’ato’a lona to’alua i le ‘ona ma le taumafai e fa’atuputupu vevesi i totonu o le aiga.

 

Na taua e le fafine i Leoleo e fa’apea, e 2 po o inu lona to’alua ma ua vaaia le matua ova o lona ‘ona. A o ia taumafai e fa’ato’ato’a lona to’alua ina ua amata ona pisapisao ma laulauvavale i totonu o le fale, na fa’afuase’i ona po e lona to’alua lona alafau ao matamata i ai lana fanau, o lona Tina ma ona aunty e to’alua.

 

O le popole o le fafine i le saogalemu o lona aiga, na mafua ai loa ona ia viliina Leoleo mo se fesoasoani, peita’i o le taimi lava na iloa ai e le ua molia ua taunu’u Leoleo, na alu ai loa i le atoa i le isi itu o le auala ma lafi ai. E lei umi se taimi na saili ai o ia e Leoleo ae maua le ua molia, ma taofia ai loa i le toese i Tafuna.

 

FUAVAI SUA MA LUALIMA TALIU

 

O ali’i e toalua ia na tu’uaia i lo la fa’atauina atu o ni oloa sa gaoia mai i se fale o se aiga i Nu’uuli, ua la ta’utino i le fa’amasinoga e fa’amaonia tu’uaiga fa’asaga ia te i laua.

 

O le vaiaso na te’a nei na tutula’i ai Fuavai Sua ma Lualima Taliu i luma o le fa’amasinoga maualuga mo le tuuina atu o le la tali ioe i le moliaga e pei ona ta’usala ai i laua e le fa’amasinoga.

 

O Sua, 23 tausaga le matua, na ulua’i tuuaia o ia e le malo i le moliaga mamafa o lona taliaina lea o ni oloa sa ave fa’agaoi, o se solitulafono e mafai ona fa’asala ai o ia i le toese mo le umi e le silia i le 7 tausaga, pe faasala i le salatupe e le silia i le $5,000, ae i lalo o se maliliega na latou sainia ma le malo ma talia e le fa’amasinoga na ia tali ioe ai i le moliaga na toe teuteu e le malo, le solitulafono o lona fesoasoani lea e talia ni oloa sa ave faagaoi, o se solitulafono e mafai ona faasala ai o ia i le toese mo le umi e le silia i le 5 tausaga, pe faasala i le salatupe e le silia i le $5,000.

 

I le tali ioe ai o Sua i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 8 Iulai 2017, na ia fesoasoani ai ia Taliu i le fa’atauina atu lea o oloa sa gaoi e aofia ai se DVD player, o ni DVDs ma se pea seevae i le to’alua o lona tausoga i Faleniu, e ui sa ia iloa o oloa nei na gaoia mai i se fale i Nu’uuli, ma e silia i le $100 le tau o ia oloa.

 

Mo le susuga a Taliu, 24 tausaga le matua, na ulua’i tuuaia o ia e le malo i moliaga mamafa e 3 e aofia ai le talepe fale i le tulaga lua, gaoi, atoa ai ma lona taliaina o ni oloa sa ave faagaoi. Sa tuuaia fo’i o ia i le moliaga mama o le tu fua i le fanua o le isi tagata. Ae i lalo o se maliliega sa latou sainia ma le malo ma talia e le fa’amasinoga, na ia tali ioe ai i le moliaga o lona talia o ni oloa sa ave fa’agaoi.

 

I le tali ioe ai o Taliu i le moliaga e pei ona ta’usala ai o ia, sa ia ta’utino ai e fa’apea, i le aso 8 Iulai 2017, sa la o ai ma Sua ma faatau atu oloa sa gaoia, i se ali’i i Faleniu, e ui sa ia iloaina o nei oloa sa gaoia mai i se aiga i Nuuuli. Sa ia taua atili fo’i e fa’apea, o oloa sa gaioia e silia i le $100 lona tau.

 

Ua toe taofia nei Sua ma Taliu i le toese i Tafuna e fa’atali ai le aso 5 Oketopa e lau ai le la fa’asalaga.