Ads by Google Ads by Google

POU TIUTE A LEOLEO


[ata: foa'i]

Pago Pago - AMERIKA SAMOA

MOLIA SE ALII SAINA I LE FA’AO’OLIMA I SE MAFINE UA LUA TAUSAGA E LE O TOE FEOA’I

E tusa ai ma faamaumauga a le ofisa a leoleo, o le taeao o le aso 8 o Aperila, 2024, na valaau atu ai se mafine i le Ofisa a Leoleo i Tafuna, e lipoti atu ai le fa’ao’olima o se alii sa la fa’auo i le lua tausaga talu ai, ia te ia, a’o faia sana faatauga i le faleoloa a le TMO i Tafuna.

Na faapea ona agai atu ai loa leoleo i le nofoaga na tupu ai le faalavelave ma talatalanoa ai ma le mafina ua a’afia i lenei mataupu.

Sa faamatalaina e lenei mafine e faapea, a’o fail ana fa’atauga, na savali atu le alii o Han Ding, lea ua molia i lenei mataupu, ma ‘e’e atu ia te ia, ma faapea atu, o lo’o iai ni mataupu e mana’omia ona o la faamautuina.

Na tali mai iai le mafine ua a’afia, ia Ding, e le o fia talanoa ia te ia, ae po ai e Din lona ulu.  Ae o se Samaria Agalelei sa tu i autafa, na oso atu ma taofi mai ia Ding i le toe o’o atu o lona a’ao i si mafine ua a’afia.

I le molimau a lenei Samaria Agalelei, sa tau tu’i o ia e le ua molia, ona o le taofiofiga o ia, ae sa popole le Samaria Agalelei i le saogalemu o le mafine, lea na ia fa’aauau ai pea ona ia taofia le alii o Ding.

Sa ta’ua e le mafine ua a’afia i lenei mataupu, e faapea, e le o se taimi muamua lea ua tupu ai se mea faapea i le va o ia ma Ding talu ona fa’auma le la faigauo, i le lua tausaga talu ai.  Ae taumafai lava Din e faafeso’ota’i atu o ia .

Sa ia faamatalaina foi le tupu o seisi faalavelave, i ni nai masina ua tuanai, lea na alu atu ai Ding ma lona tina, i lona faleoloa.  Ma o lona fefe tele, sa ia sulufai ai i le ofisa a leoleo mo se fesoasoani.

Sa mafai ona matamata leoleo i se ata vitio mai i le masini pu’e ata a le TMO, ma e ui ina e le’i lelei le leo o le vitio, ae na manino lelei le poina e le ua molia, o le ulu a le mafine ua a’afia, ma le taofiofi a le Samaria Agalelei.

Na faapea loa ona agai atu leoleo e saili le ua molia, ma na o le pau le nofoaga na silafia e le mafine ua a’afia, e iai Ding, o le faleoloa a le FONUEA, lea e i Nu’uuli, ma o iina na maua atu ai o ia e leoleo, ma lokaina mai ai loa o ia.

Faatasi ai ma le fesoasoani a se faaliliu upu, sa faapea ona faatalanoaina e leoleo ia Ding ina ua o latou taunuu i le Ofisa a Leoleo i Tafuna.

E tusa ai ma le faamatalaga a Ding, o lona ita tele i le mafine ua a’afia ona o le musu e talanoa atu ia te ia, na mafua ai ona ia poina o ia.

Ua molia nei Ding i moliaga e lua, e aofia ai;

Faitauga 1:  Faao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i aso e sefululima (15), po o se sala tupe e $300; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.

MOLIA LE TAMA O LE AIGA I LE FAAO’OLIMA I LE TINA MA FAAMATA’U I LE OTI, I LUMA O LE FANAU

E tolu ni moliaga ua fa’asaga i se tamaloa, ina ua masalomia o ia i le fa’ao’olima i le tina o le aiga faapea ma le fa’amata’u o ia, i le oti, i luma o lana fanau.

E tusa ai ma faamaumauga a le malo, o le po o le aso 4 o Aperila, 2024, na fa’afeso’ota’i ai e se tina ia le ofisa a leoleo, ina ua fa’ao’olima lona to’alua ia te ia, i totonu o le latou fale i Puapua.

(O le a le lomia suafa o i latou uma o lo’o a’afia i lenei mataupu, aua le puipuiga o fanau iti o lo’o a’afia).

Na agai atu leoleo i le nofoaga na tupu ai le faalavelave ma faamatalaina iai e le tina o le aiga, ia le faalavelave na tupu.  Sa fiu leoleo e saili le tama o le aiga, ae peitai, ua le maua o ia.  

O lea sa fautuaina ai e leoleo ia le tina, o le a aveina i latou ma le fanau i le Ofisa a Leoleo i Tafuna mo le puipuiga o lo latou saogalemu.  Sa faapea foi ona siaki ai e le vaega a le EMS ia manu’a o le tina.

Sa faamatalaina e le tina, i sana molimau tusia ma faamatala, na amata mai le la taugaupu ma lona to’alua i le 1:00 i le aoauli o lea aso, i lo latou aiga i Puapua.  Ona ia fai atu lea i lona toalua, e momoli la’ua ma lana tama e 7 tausaga le matua, i le fale o lona uso i Nu’uuli, ina ia tau fa’ato’afilemu ai le pisa i lo la va.

O le ta o le 6 i le afiafi, e pei ona faamatalaina e le tina, na o atu ai lona to’alua ma le la fanau, e piki mai o ia.  Ma sa iai sona manatu, ua toe lelei mea uma i lo la va ma lona to’alua, ae peitai, na tago lona to’alua ma u’una’i o ia i totonu o le taavale.

Ma ina ua o latou taunu’u i lo latou fale i Puapua, e pei ona faamatala e le tina, na amata ‘e’e atu loa to’alua ia te ia, i le taimi na ia oso ai i fafo ma le taavale ma savali atu aga’i i lo latou fale, a’o mulimuli atu lona to’alua ma le la fanau.  Ma sa faapea foi ona u’una’ia o ia e lona to’alua i totonu o le fale, ma tu’i fa’alua ona foliga ma faatonu o ia, e aua ne’i ‘e’e, ina ne’i ona tago tipi ese lona ulu i se to’i, i luma o le la fanau.

O le po lava lea e tasi, i le ta o le 8:19, na alu atu ai le ua molia i le Ofisa a Leoleo ma lokaina ai loa o ia e leoleo.

Ua molia nei lenei tamaloa e 40 tausaga le matua, i moliaga e lua, e aofia ai;

Faitauga 1:  Faatupu Vevesi i totonu o lona aiga – o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i aso e sefululima (15), po o se sala tupe e i le va o le $150 ma le $300; po o fa’asalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona faafalepuipui ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $3,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.