Pago Pago - AMERIKA SAMOA

MOLIA TAITAI O LE AUMAGA I LE SOLIVALE O FANUA A ISI MA LE FA’AO’OLIMA

O le po o le aso 22 o Mati, 2024, na fa’afeso’ota’i ai e se tina ia le Ofisa a Leoleo i Tafuna ma lipotia ai le solivaleina e le aumata o lona maota ma fa’ao’olima i lona alo tamaitai, e 16 tausaga le matua.

(O le a le lomia suafa o i latou ua a’afia ma le ua molia, i lenei mataupu, ona o le puipuiga o fanau o lo’o a’afia).

Na agai atu leoleo i le nofoaga na tupu ai le faalavelave ma fa’atalanoaina le tina sa valaau mai i le Ofisa a Leoleo, ma sa ia ta’ua e faapea, o lona ‘nephew’ na fa’ailoa atu ia te ia, le o atu o le aumaga i totonu o lona fale, ma o le taitai o le aumaga sa na ia fa’ao’olima i lana tama teine.

Na mafai ona talanoa leoleo ma le teineitiiti 16 tausaga i luma o lona tina, ma sa ia faamatalaina le tu’itu’i atu o ni tagata i le latou faitoto’a ma le valaau atu a se tagata, ina ia tatala mai le faitoto’a.

Na ta’ua e le teineititi lona lagonaina o le tatalaina o le faitoto’a o le latou fale ma ulufale atu o le aumaga, ma na fa’asasa’o atu le taitai o le aumaga ma po lona gutu.

Sa le’i vaaia e leoleo ni manu’a i le fofoga o le teineititi ma sa ia te’ena foi le auaunaga a le EMS.

Mulimuli ane, sa fa’atalanoaina ai e leoleo ia le ‘nephew’ a le tina lea sa valaau i le ofisa a leoleo, ma sa ia faamatalaina lo latou iai i totonu o le fale, ina ua ulufale atu o le taitai o le aumaga i totonu o le fale.  Sa ia ta’ua foi le u’uina e se tasi o se ili eletise ma taumafai e ta ai o ia.  Ma sa ia molimauina foi le po ina e le taitai o le aumaga, o le alafau a lona tausoga.

O le po lava lea na maua atu ai e leoleo ia le ua molia i luga o le alatele ma ave fa’apagota ai loa o ia.

Ua molia nei lenei alii e 43 tausaga, i moliaga e tolu, e aofia ai;

FAITAUGA 1:  Faatupu vevesi i Aiga – o se vaega ‘C’ o solitulafono mama, e mafai ona nofosala ai se tasi i le falepuipui i aso e sefululima (15), po o se sala tupe e $300; po o fa’asalaga uma e lua.

FAITAUGA 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai se tasi i le falepuipui i le tausaga atoa, po o se sala tupe e $1,000; po o fa’asalaga uma e lua.

FAITAUGA 3:  Solivale o fanua/maota a isi – o se vaega ‘B’ o solitulafono mama, e mafai ona nofosala ai se tasi i le falepuipui i le ono masina.

E $1,000 le tinoitupe faatulagaina e mafai ona tatalaina ai le ua molia mai i le falepuipui, e faatali ai lona fa’amasinoga.

AVE FA’APAGOTA SE ALII INA UA MUSU E ALU ESE MA LE FALEOLOA MA LONA TAU’AI MA’A

I le taeao o le aso 24 o Mati, 2024, na valaau ai le pule o se faleoloa i Vailoatai ma lipotia ai le susuga ia Sopa Siagigi, ina ua musu e tu’ua lona faleoloa.  Ae ina ua taunu’u leoleo i le nofoaga na tupu ai le faalavelave, ua tu’ua e Siagigi le faleoloa.

Sa faamatalaina e le pule o le faleoloa i leoleo, lona fai faatolu ia Siagigi e alu ese ma le faleoloa, ae musu.  Na fa’ato’a tu’ua e Siagigi le faleoloa, ina ua tulei e le pule o le faleoloa, i fafo ma le faleoloa.  Ae o sina taimi mulimuli ane, na toe fo’i ane ai Siagigi ma tau’ai le pule o le faleoloa, i ni ma’a, a’o tu tu i fafo o le faleoloa.

Sa ta’ua e le pule o le faleoloa, lona fa’asaina o Siagigi mai lona faleoloa, ona e nofo ma gaoi ia oloa o le faleoloa.  Sa ta’ua e le pule o le faleoloa, sa faia se la maliliega ma Siagigi, o le a ia faamagaloina Siagigi i le gaoia o ana oloa, ma o le a ia le logoina leoleo, pe afai e tauto Siagigi, e le toe fo’i atu i le faleoloa.

Sa faatalanoaina foi e leoleo ia se alo a le fa’atau oloa ma sa ia ta’ua lona iai faatasi ma lona tama ina ua alu atu Siagigi i le faleoloa, ma le tuli ina faatele e lona tama ia Siagigi mai i le faleoloa, ae musu Siagigi.  Ina ua i’u ina agai atu i fafo ia Siagigi ma le faleoloa, sa ia u’una’i eseina le faatau oloa, ae na ia toe fo’i mai, ma togi le fa’atau oloa i se mea.  E le o mautinoa lelei po o le a le mea sa togiina e Siagigi i le faatau oloa.

Ina ua le vaaia e leoleo ia Siagigi i le nofoaga na tupu ai le fa’alavelave, sa fesiligia loa nisi o le nu’u ma o latou faasino ifo i leoleo le auala e agai i le fale o le ua molia.

E taunu’u atu leoleo i le fale a Siagigi, o lo’o tofa o ia.  Sa lokaina mai o ia e leoleo.  Ae ina ua su’esu’eina e leoleo lona tagata, na maua ai se paipa tioata i totonu o le taga o lona ofu.  Ma na aveina ai loa Siagigi i le ofisa a leoleo.

Sa te’ena e lenei alii le faia o sana faamatalaga, ae ua aveina atu lana paipa tioata i le vaega a leoleo e gafa ma Vaega o Fualaau Faasaina, mo sa latou suesuega.

Ua molia nei Siagigi i moliaga e lua, e aofia ai;

FAITAUGA 1:  Solivale o fanua/maota – o se vaega ‘B’ o solitulafono mama, lea e mafai ona fa’afalepuipui ai se tasi i le ono (6) masina, po o se sala tupe e $500; po o faasalaga uma e lua.

FAITAUGA 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona faafalepuipui ai se tasi i le o’o atu i aso e sefulu lima (15), po o se sala tupe e $300; po o fa’asalaga uma e lua.

E $1,000 le tupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.