Pago Pago - AMERIKA SAMOA

O se tasi o tamaitai Makerita Fa’ae’e Iosefo sa malaga mai ma lona uso i le malaga a le Hawaiian Air i le aso Lua, Iulai 01, 2025, na taofia e le vasega o Leoleo i le malaeva’alele i Tafuna ina ua tulaueleele mai le va’alele ma ua ulufale mai e kilia lo latou taunuu mai i Amerika Samoa.

Ua masalomia i la’ua nei, o lo ua feso’ota’i ma se tau fa’amata’u o lo’o i ai se pomu e ono pa i luga o le va’alele i lana lea malaga.

Na taofia e le vasega o leoleo su’esu’e Makerita Fa’ae’e Iosefo ma lona uso ona ua masalomia e ala i

la’ua fa’amatalaga sa fa’asalalauina i luga o le Upega tafa’ilagi o le Facebook, o loo fusia ni pomu i o la’ua tino!

Ua manatu Makerita ma lona uso, ua fa’amaasiasia i la’ua i luma o tagata e to’atele e le Hawaiian Air fa’apea ma le Matagaluega o le Puipuiga Lautele ina ua taofia i la’ua ma ua fa’afesiligia i lo la’ua to’ai taunuu mai i le malaeva’alele i Tafuna.

Na saisaitia mai i la’ua mai le va’alele ina ua tulaueleele, ma ua talaga uma a la’ua ato pa’u ma uta na aumaia, ae aunoa lava ma se fa’afesiligia o se la’ua fa’atagaga mo lea sofa’iga o la’ua aia tatau.

Na avatu i la’ua ma lona uso i le Ofisa o Leoleo i Tafuna ma fa’aauau ai ona su’esu’eina i la’ua, ma ua foliga mai o i la’ua o nisi ua solitulafono matuia.

“Ua matua manatu le vasega o leoleo, tagata faigaluega a le Malo i le Ofisa o Femalaga’iga, DPS o leoleoina le malaeva’alele ma tagata faigaluega a le Hawaiian Airlines o i ma’ua ma si o’u uso ma’i, o ni tagata fa’atupu faalavelave. Leai ma se tasi o nei tagata faigaluega uma a le Malo, na fa’aavanoa sona taimi itiiti e fa’ailoa mai ai ia i ma’ua, pe aisea ua fa’apea ai le faiga o i ma’ua.” O se tala lea ma le fa’anoanoa a le tamaitai o Makerita Faae’e Iosefo.

Ua fa’ailoa mai e le tatou siufofoga fa’asalalau a le KHJ lea na latou fesiligia le Komesina o Leoleo Ta’aga Saite Moliga e tusa o lenei osofa’iga o nei sui na malaga mai Hawaii, ae sa ia fa’ailoa mai ai, “O se tasi o fa’amatalaga sa tusia i le Facebook ua fa’ailoa mai ai, e to’alua ni sui o lo’o malaga mai i lea faigamalaga a le Hawaiian Air, o lo’o ua malaga mai ma se pomu i luga o le va’alele lenei. Ua sailia i le fa’ai’u o le tagata e ona lea fa’amatalagai ala tafa’ilagi, ma ua maua ane ai e to’alua fo’i sui ua latou fa’aiu tutusa lava ua i ai i le aumalaga.” 

Ua fa’ailoa mai fo’i e le susuga le Komesina o Leoleo, ina ua mae’a le su’esu’ega ma ua mautinoa ai e le o i ai se feso’ota’iga i le va o nei sui e to’alua ma le fa’alavelave ua masalomia ai, ona toe tu’ua lea o sui e malaga i lo la’ua aiga!

Ua fa’ailoa mai e Iosefo, “O le taimi lava na ou savali mai ai i le itu e piki ai ma’ua ato na ou fetaui lelei lava ma le susuga le Komesina, sa ou fesiligia lava poo le a se mea o tupu?” 

“Peita’i sa ia le soso mai mo se fa’amatalaga mai e tali ai la’u fa’afesili!”

“Ua oo fo’i i si o’u uso le popolevale, aua e le o se tagata e atoatoa le malosi o ia! O le fa’atolu lea ona malaga i fafo e faia ana togafitiga o lona kanesa o maua ai, ma o ni togafitiga tiga o le Chemo! E umi le taimi o le malaga mai ma ua lagona fo’i e si o’u uso le tulaga niniva ma e le o sagatonu fo’i ona lagona i le mea ua tupu i le ma’ua taunuu mai i eleele nei!” o se fa’amatalaga fa’aauau lea a Makerita.

“O se lagona uiga ese na oo i si o’u uso ina ia va’aia le vasega o leoleo pe to’a 20 ua aga’i atu mai le faitoto’a i tua ma o lo’o ua fa’auia atu i ma’ua i ta’avale a leoleo o loo tutu mai i tua atu o le nofoaga e piki ai atopa’u ma fa’amomoli.”

Na fa’aauau pea se fa’amatalaga a Makerita, “O le Komesina lava o Leoleo na ia faia le fa’atonuga ina ia ave’esea atu ese ma’ua e ali’i leoleo su’esu’e mo le ma’ua toe suesuega i le Ofisa o Leoleo i Tafuna. Lea ua fa’amatala mai ia i la’ua o lo’o masalomia i ma’ua e feso’ota’i ma le fa’alavelave ua feavea’ia tala i luga o le Facebook o lo ua malaga mai i la’ua ma se pomu i luga o le va’alele.”

Na fa’ailoa mai e Makerita Iosefo lona agaga fa’anoanoa, ona e matua leiloa lava e i la’ua se mea tau lenei pomu o masalomia ai i la’ua, ma ua leai fo’i se so’otaga o lea fa’alavelave ma i la’ua ma lona uso ma’i.

Na fesiligia Makerita e le vasega o leoleo su’esu’e i Tafuna, “E te silafiaina se tasi e suafa ia Amy Iosefo poo Jennifer Iosefo?” 

Ua fa’ailoa atu ia i la’ua i le taimi o le suesuega, “E le’i umi ona tuuva’a ese mai le Hawaiian Air mai Honolulu ae maua e i latou se fa’aaliga i luga o feso’ota’iga tafa’ilagi a le Facebook na fai e le tamaitai o Amy Iosefo e auina atu ia Jennifer Iosefo, o lo’o le mautonu o ia e alu i le malaga a le va’alele lea, ona o lo’o i ai se tasi o lo’o malaga mai i le va’alele lea, o lo’o fa’amau i lona tino ni pomu.”

Ua faailoa mai e le tamaitai o Makerita Iosefo, ua masalomia i la’ua ma si ona uso, ona o lo ua mautinoa o la’ua fa’ai’u o lo’o mautu ai “Iosefo”.

“E mautinoa ou te malo i le fa’amasinoga i le mataupu lenei ua fa’atagata vale ai ma’ua ma si o’u uso ma’i!” O sana toe tala lea e tusa ma lea mea ua fa’ate’ia o la’ua tagata e le sala!

“Afai e tupu ia ma’ua ma si o’u lenei fa’aletonu, e mautinoa lava e toe tupu fo’i i se tasi o le mamalu lautele o le atunuu, e tatau lava ona mautinoa e susuga i alii leoleo su’esu’e ona fa’amatala mai nei mea, a’o le’i so’ona faia tagata e pei ona fa’aiuia ai i ma’ua, o le ma o se mea e le fiafia i ai so’o se tasi!” “Lilo i manatu, e mafai ona suia lota lalolagi i se taimi pu’upu’u lava!”