Ads by Google Ads by Google

O OE O LO’U TAMA?


[ata: SN]

VAEGA 67

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

************************************************

Na gata le tatou fagogo i le vaiaso ua mavae, ina ua toe fo’i le alii fomai o Taki i lona aiga, e talanoa ma lona tina e tusa ai ma le me aua tupu.

E tu le ta’avale a le fomai, ae o lo’o tu lona tina i le faitotoa o le fale.   Na iloa mai lava e le fafine le savali faanoanoa atu a lana tama ma ua popole ai lava lona loto, pe aisea ua toe vave fo’i atu ai lana tama ma ona tau’au e foliga mai ua matua’i mamafa lava se mea o ia tauaveina.

Ma ina ua talatalanoa ia le fafine o Elena ma si ana tama, le alii fomai o Taki, na fesiligia e Taki ia lona tina e uiga i le uo a lona tama mai taimi o talavou.

Sa faamimigi tau’au a Elena ma faapea atu i si ana tama.  “Ou te le manatua, ae sa faapea mai lou tama, e fo’i mai loa i lana malaga, o mai loa ma lana uo – lea ua ia ta’ua o lona uso – e matou te o, e faamalamalama i o’u matua ina ia mafai ona o ma faaipoipo.”

“E alu le malaga a lou tama ma si ana uo, e na te le’i iloa, ua ou ma’itaga ia te oe,” o le tala lea a le tina o Taki.

“Ae aisea ua e toe fesilisili ai e uiga i lou ma lana uo?” o le fesili atu lea a Elena i si ana tama.

Na umi se taimi o tu ia Taki ma tilotilo mai i lona tina, ona faapea mai lea, “Mom, o Tanielu lea na tafafao mai ma lona aiga i le vaiaso ua mavae, o le uo mamae lena a Dad.”

“E a lau tala? O ai ia ai?” o le oso atu lea a le fafine o Elena.

Na toe faapea atu Taki, “O le tamaloa ma lona toalua ma le la fanau lea sa ou aumaia i le vaiaso ua mavae, o le uo mafana lena a Dad.”

E le’i uma lelei le tala a le alii fomai, ae ona vaai atu, ua amata ona maligi loimata a lona tina.

Sa le’i mautonu Taki po o le mea ua tagi lona tina ona o le ita, po o le fiafia.

“Oi talofae,” o le faapea mai lea a Elena.  “Ae aisea na ia le fa’ailoa mai ai?”

Sa umi se taimi o nofo le alii fomai ma punou ona ia ea lea i luga ma faapea atu i lona tina, “O e manatua le igoa o le tamaloa?”

Sa faapea mai le fafine o Elena, “O Tanielu.”

Ma na vaaia e Taki le liua o foliga o lona tina i le le mautonu.  “E le o le igoa lena o le uo a lou tama,” o le tala lea a le fafine o Elena.  “Ou te manatua na fai mai lou tama, o le igoa a lana uo, o Alesana Penaia.  O le a le uiga o lenei mea, Taki?”

Ua nofo nei Taki ma faamatala i lona tina, le tala atoa sa ia fa’alogo iai, lea na faamatalaina e Tanielu i lana fanau ma toe faamatala atu e Naomi ia te ia.

Ina ua uma le faamatalaga a Taki, ua leai seisi o la’ua ma lona tina e toe pisa, ae ua na o le nofo lava o le tagata ma ona mafaufauga.

[E FAIA PEA]