O OE O LO’U TAMA?
VAEGA 62
Taeao Manuia, Taeao Toto’a i le mamalu o le tatou aufaitau nusipepa i lenei taeao fou. Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.
Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 62.
******************************************************
Ua na o le saofafa’i o le tamaloa o Tanielu ma le fafine o Eseta, ma le la fanau, ua leai seisi e toe pisa, ae ua na o le fetagisi o le ulugalii ma le teine o Naomi, i upu mulimuli a le alii fomai o Taki, ae e le’i savali i fafo ma le fale’aiga.
Na fai si umi o saofafa’i le aiga, ae tula’i loa le teine matua, o Ruta ma savali atu i le fale, ma e le i umi ae mulimuli atu ai lona tuagane o Iakopo.
Ae ua nofonofo ai na’o le ulugalii o Tanielu ma Eseta, ma le teine o Naomi.
“Aua e te lua popole tele ia Taki, ou te iloa o lona ita la sa ia faia ai le la faamatalaga,” o le tau faamafanafana atu lea a Naomi i nai ona matua.
Ua lulu le ulu o le tamaloa o Tanielu ma faapea mai, “Ou te talia lava o so’o se mea e faia e Taki”.
Ma na tu foi ia Tanielu ma savali atu i le fale. Ae nonofo ai na o le fafine o Eseta ma le teine o Naomi.
Sa umi se taimi o tau fa’amafanafana e le teine o Naomi ia lona tina.
Na i’u ina ua tago atu Naomi ma fa’atu i luga si ona tina ma ta’ita’i atu o ia i le fale ma ave sa’o i totonu o le la potu moe ma fa’ata’atia o ia i luga o le moega, ma fa’aafu o ia. Ona ia musumusu atu lea i si ona tina, “Mom, aua e te popole i se mea e tasi”.
Ua savali mai nei ia Naomi ma valaau se taxi ma alu ai loa i le falemai ma savali sa’o atu lava i le ofisa a le alii fomai o Taki.
Na tu’itu’i ia Naomi i le faitoto’a o le ofisa a le alii fomai, ma ia lagonaina le valaau mai a Taki, “Sau i totonu”.
Ae peitai, ina ua va’ai mai Taki o Naomi lea o lo’o ulufale atu, sa vave lava ona tu i luga ma faapea mai ia Naomi, “Afai e te le o sau e talanoa mai i ni mataupu e patino i lau galuega, e sili ai ona e toe fo’i atu i fafo ma tapuni le faitoto’a”.
Sa fa’aauau pea ona savali mai i totonu ia Naomi ma tu i luma o le laulau a le alii fomai ma ia faapea, “Na o sina lima lava ni minute o lou taimi”.
Ai ona o le leo pepe o le teine o Naomi po o ona foliga faanoanoa, na toe liua ai le loto ita o le alii fomai ma toe saofai ifo i lalo.
Sa faapea atu loa Naomi, “Ou te iloa, e leai sa’u upu e mafai ona fai atu i le taimi nei, e ono ave’esea ai le loto ita ma le fia taui ma sui lena ua e lagonaina i le taimi nei. Ma ou te le’i sau foi e fai atu e te taumafai e faamagalo o’u matua. Ona a ou tilotilo atu i lenei mea ua tupu i lau itu, ou te fa’asa’oa lou ita”.
“Ae pau o lea, ua na’o sina a’u talosaga vaivai. Ae e te le’i lipotia lenei mataupu i le ofisa a le malo, pe mafai ona e fa’alogo i le mafua’aga na tupu ai lenei tulaga.”
[E FAIA PEA]