Ads by Google Ads by Google

Molia se ali’i i lona osofa’i o se fale ae ave faagaoi mea totino sa i ai


[ata: foa'i]
ausage@samoanews.com

Pago Pago, AMERIKA SAMOA - Ua taofia nei i le Toese i Tafuna se alii talavou mai Petesa ona o tu’uaiga i lo la osofaia lea ma se alii e laititi i lalo o le tulafono se fale o se aiga i Petesa lava ae ave faagaoi mea totino sa i ai i totonu e aofia ai ni telefoni feavea’i se 2 ma se siaki tupe e tusa ma le $1,700 le aofa’i.

 

E pei ona taua e le malo, o le susuga a Tasi Soolefue ma se ali’i e talavou i lalo o le tulafono, o i laua ia na osofaia le fale o le susuga a Edmund Amataga ae ave faagaoi meatotino e pei ona taua. Na muamua loka e Leoleo le susuga a Amataga ma tu’uai ai lona ulufale faamalosi lea i totonu o le fale o Soolefue ma faaoolima ia te ia, ae mulimuil ane ai molia Soolefai i le tulafono. 

 

E le o manino mai i le tagi a le malo pe ua molia fo’i le ali’i e talavou i lalo o le tulafono i lenei mataupu pe leai fo’i. 

 

E pei ona taua e le malo i le latou tagi e fa’apea, i le taeao o le aso 27 o Me, 2020 pe tusa o le 8:00 i le taeao na vili ai e le susuga a Amataga le Ofisa o Leoleo mo se fesoasoani, i lona fale ua osofaia e ni tagata ae ave faagaoi ana meatotino sa i ai. E lei umi ona mae’a ona vili e Amataga Leoleo, ae toe maua fo’i e Leoleo le isi fo’i telefoni e sau mai lava i le nofaoga lea e tasi, o le telefoni lea mai le afioga i le ali’i Fa’amasino ia Faamausili Pomele, e talosagaina ai se fesoasoani i se vevesi o loo tula’i mai i le latou pitonuu, lea o lo o masalomia le aafia ai ma se laau malosi.

 

Na taunu’u Leoleo ma feiloa’i ma le susuga a Amataga, ma ia faailoa ai loa le tulaga sa tula’i mai i lona fale. A o talanoa Leoleo ma le susuga a Amataga, na faateia Leoleo ina ua savali atu se Tina ma talosaga atu i Leoleo mo se fesoasoani, i lana tama na fasi e Amataga.

 

Na taua e Amataga i Leoleo e fa’apea, na osofa’i e ni tagata lona fale i le taeao po lava ma ave faagaoi ai ana telefoni e 2 ma lana siaki tupe (stimulus check) sa i totonu o le ato sa taatia i luga o le laulau faatasi ma telefoni feavea’i. Na taua atili e Amataga i Leoleo e faapea, ua mae’a ona ia fesiligia se alii talavou e igoa ia P.M, ma ua ia faailoa atu ia te ia, o le alii o Soolefue na osofaia lona fale ae ave faagaioi ana meatotino.

 

Na aga’i atu Leoleo i le fale o Soolefue ma fesiligia loa o ia e uiga i lenei mataupu, ma ioeina ai e Soolefue lo la osofaia ma lana uo o P.M o le fale o Amataga.  Na taua e le ua molia i Leoleo e fa’apea, i le po o le aso 26 o Me, sa la eva ai ma P.M i luma o le fale o lana uo ma la talatalanoa i ni gaioiga e faia i lea po. 

 

Na faateia o ia ina ua fai atu P.M, e mana’o la te o e osofa’i le fale o Amataga, atonu e maua ai ni mea aoga mo i laua. Na malilie alii nei e to’alua ma alu loa le la osofaiga i le fale. E le i mafai ona la tatala le faitoto’a pito i tua, ona sa loka mau mai totonu, ona faia ai loa lea e P.M  o le tonu, o le a ia oso i le faamalama ina ia maua ai le avanoa e ulufale ai i totonu. 

 

E pei ona taua e le ua molia i Leoleo, o P.M na alu i totonu o le fale ae o ia na faatali atu i fafo e vaai nisi e o atu. E lei umi ona alu P.M i totonu ae toe fo’i atu ma le faamatalaga, e i ai telefoni e 2 ma le ato o loo i ai le siaki i totonu o lo o i luga o le laulau. Na faatonu e Soolefue ia P.M e aumai meatotino e pei ona ia taua. Na alu P.M ma le isi telefoni, ae o le isi telefoni ma le siaki tupe na alu ma Soolefue.

 

Na uma ona fesiligia e Leoleo ia Soolefue ona latou fesiligia lea o le alii laititi o P.M e uiga i lenei mataupu, ma faamaonia ai fo’i e P.M lo la osofaia ma Soolefue o le fale a Amataga. Sa ia taua i Leoleo e faapea, o ia e ana le tonu na fai la te osofaia le fale i se taimi o le vaveao. Sa ia taua fo’i e faapea, o ia na oso i le faamalama ma ulufale ai i totonu ina ua le mafai ona la tatalaina le faitoto’a, ae faatali atu Soolefue i fafo e vaai se isi e alu atu i le fale.

 

Na ioe P.M, o ia na aveesea maia telefoni e 2 ma le ato o lo o i ai le siaki tupe i totonu ma ave ia Soolefue, ona ave lea e Soolefue o le siaki tupe ma le isi telefoni, ae o ia na alu ma le isi telefoni. Sa i ai matua o P.M i le taimi na fesiligia ai o ia e Leoleo.

 

Na taua atili e P.M, o Soolefue na faamaitea le tonu e osofa’i le fale a Amatagaj. I le taeao o le aso na sosoo ai, na faateia ai o ia ina ua alu atu Amataga i lona fale ma valaulia o ia la te o i lona fale (Amataga) la te eva ai. O le taimi lava na la taunuu ai i le fale o Amataga, na faateia ai loa o ia ina ua faasaga atu Amataga ua fasi o ia ma fesiligia o ia i ana meatotino sa ia gaoia, ae na ia faailoa i ai, o Soolefue na osofaia lona fale.

 

O le vaiaso na te’a nei na tula’i ai Soolefue i luma o le Fa’amasinoga Faaitumalo. O le alii loia fautua lagolago ia Bob Stuart na tula’i mo ia, ae o le tamaita’i loia sili lagolago ia Kristie Soule na tula’i mo le malo.

 

O lo o molia Soolefue i le moliaga o le talepe fale i le tulaga 2 faapea ai ma le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala fo’i i faasalaga uma ia e 2.

 

E $5,000 le vaega tupe lea ua faatulaga e tatala ai Soolefue i tua mai le Toese i Tafuna. 

 

O le vaiaso fo’i na te’a nei na faataunuu ai le ulua’i iloiloga o le mataupu a Soolefue i luma o le afioga i le Faamasino ia Elvis P. Patea.

 

I lea iloiloga, e toatasi le molimau na valaau e le malo, o le susuga lea i le alii’ Leoleo ia Muta Muta, o ia fo’i lea na autu i ai le suesueina o lenei mataupu. 

 

Na taua e Muta i lana molimau e fa’apea, na muamua molia e le malo ia Amataga i lona ulufale faamalosi lea i totonu o le fale a Soolefue ma faaoolima ia te ia. O le maea ai ona fesiligia e Leoleo o isi molimau, na faatoa molia ai loa ma Soolefue i le vaiaso na te’a nei. 

 

Ina ua fesiligia e le loia a Soolefue le molimau a le malo, i le mafua’aga ua ala ai ona molia Soolefua i nei solitulafono mamafa, ae le i alu i o ia i totonu o le fale o Amataga, e na o P.M na ulufale i ai, peita’i na tali le molimau, o le lagolago ai o Soolefue i gaioiga uma sa faia e P.M, o lona sao lava fo’i lea i lenei osofaiga.

 

Na fesili le loia a Soolefue ia Stuart pe na toe maua telefoni feavea’i ma le siaki tupe, ae na tali le molimau, e na o le siaki tupe ma le isi telefoni na maua, ae o le isi telefoni ua fiu e su’e. O meatotino na toe maua, o meatotino ia na alu ma le susuga a Soolefue.

 

Na tete’e Soolefue i moliaga faasaga ia te ia ina ua tula’i i luma o le afioga i le Faamasino Sili i le vaiaso na te’a nei. 

 

O le masina fou o Iulai lea ua faatulaga e toe tula’i ai Soolefue i luma o le Fa’amasinoga.