Pago Pago - AMERIKA SAMOA

O le po o le aso 8 o Me, 2024, na fa’afeso’ota’i ai e se tamaloa ia le ofisa a leoleo i Fagatogo, e lipotia ai le fa’aleagaina o sona fale ma ni ana taumafa toto, e lona atalii fai.

Na faamatalaina e le na a’afia, i leoleo, o le ua molia, le susuga ia James Mose, o sona atalii fai sa masani ona o la nonofo faatasi, ae peitai, ona o ni fa’afitauli fa’aleaiga, sa ia tuli’esea ai Mose mai lona fale.

Ma sa ta’ua e le na a’afia i leoleo, o sona fale tu’ufua i Afono lea na ulufale ai le ua molia, e aunoa ma se fa’atagana ma ia fa’aleagaina foi ni ana meataumafa sa totoina – o talo ma fa’i, e i leisi itu auala mai i lona fale.

Sa faamatala e le na a’afia, o lo’o iai se ulugalii sa ia tu’uina iai lona fale tu’ufua e la te nonofo ai ma toe faamama.

Ae e tusa ai ma faamaumauga a leoleo, o lea afiafi, ina ua taunu’u le ulugalii i le fale, na o la va’aia ai le malepe o le faitoto’a pito i tua o le fale.  Ae le gata i lea, o talo ma fa’i ua tase’i ma faapaepae solo.  Sa faapea ona faafeso’otai e lenei ulugalii i le na a’afia ma ia valaauina ai loa le ofisa a leoleo.

Na aga’i atu loa leoleo e saili le alii o Mose ma ina ua mauaina o ia, sa lokaina loa o ia ma aveina atu i le ofisa a leoleo.

Ina ua faatalanoaina e leoleo ia Mose i lea afiafi, sa ia ta’ua e faapea, ina ua tuli’esea o ia e lona tama fai, sa leai se mea e nofo ai.

O le mea lea na ia alu ai i le nofo i le fale tu’ufua.  Ae i le lona tolu o aso, ina ua manava mai galuega sa ia va’aia ai le ave’eseina uma o ana mea totino e le ulugalii.  Ae ina alu atu e toe aumai ona lavalava, sa fai mai le ulugalii e la te le iloa se mea.  Peitai sa ta’ua e Mose, na ia vaai atu o lo’o la’ei mai le tamaloa i lona ofu.  O le mafuaaga lea na le fiafia ai ma alu atu loa i le tase’i talo ma fa’i.

Ua molia nei Mose i moliaga e lua;

Faitauga 1:  Faaleagaina o mea totino i lona tulaga e tolu – o se vaega ‘B’ o solitulafono mama, e mafai ona lokaina ai se tasi i le o’o atu i le ono (6) masina, po o se sala tupe e $500; po o faasalaga uma e lua.

Faitauga 2:  Solivale o fanua e aunoa ma se faagana – o se vaega ‘B’ o solitulafono mama, e mafai ona nofosala ai i le falepuipui, i le o’o atu i le ono (6) masina, po o se sala tupe e $500; po o faasalaga uma e lua.

E $500 le vaegatupe sa faatulagaina mo le tatalaina i tua o le ua molia, e faatali ai lona faamasinoga.