Pago Pago - AMERIKA SAMOA

E tusa ai ma fa’amaumauga a le faamasinoga, o le aoauli o le aso 14 o Aperila 2025, sa lokaina ai e leoleo ia le tamaitai o Amataga Liusamoa, e 29 tausaga, ma molia o ia, ina ua na ia fasiina seisi tamaitai, ona o faamatalaga i luga o ‘Api o Foliga’ (Facebook).

I le fa’amatalaga o le fa’alavelave na tupu, o le aoauli o Aperila 14, 2025, na o’o mai ai se vala’au a se tamaitai i le Ofisa a Leoleo i Fagatogo, ma ia ripotia mai ai le sauaina o ia e Liusamoa, a’o alu atu e faatau sana taumafataga o le aoauli, i le fale’aiga i tua o le EOB, i Utulei.

Sa aga’i atu leoleo i le nofoaga na tupu ai le fa’alavelave, ma fetaui ma se tamaitai o tu tu i fafo o le fale’aiga (o Liusamoa lea) ma sa fa’asino ifo e Liusamoa, i leoleo, ia le tamaitai na sauaian, i totonu o le fale’aiga ma o ia foi lea na vala’auina leoleo.

Ina ua ulufale atu leoleo i totonu o le fale’aiga, na va’aia se tamaitai o saofa’i mai i se laulau ma tagi.  Na fa’amaonia e le tamaitai, o ia lea sa valaau atu i le ofisa a leoleo.

Sa fa’atalanoaina uma e leoleo ia Liusamoa ma le tamaitai na a’afia, i le fale’aiga.  Ma sa taumafai foi leoleo e saili ia se ata vitio mai i le masini pu’e ata a le fale’aiga, e avea ma molimau i le faalavelave.

Na fa’amatalaina e le tamaitai na a’afia, o le 1:00 i le aoauli, a’o oka lana mea taumafa i le fale’aiga, sa alu atu Liusamoa ma fesili atu po o ia o ‘Jacinta’, sa tali mai , ‘ioe’ ma fa’aauau ona oka lana meaai.  Sa ta’ua e le tamaitai na a’afia, le toe fesili atu o Liusamoa, pe na te iloa o ia (Liusamoa), na tali mai le tamaitai na a’afia, e leai.

Ma o le taimi lena na amata ai loa ona lalau atu o ia e Liusamoa ma oso atu tatu’i ona foliga.  Sa ta’ua e le tamaitai na a’afia le savali ese o Liusamoa ma toe alu atu toe fasi o ia.  Ae o le taimi lea, na feosofi atu ai tagata sa i totonu o le fale’aiga ma taumafai e taofiofi Liusamoa, ae ona valaau loa ma vala’au leoleo.

Sa ta’ua e le tamaitai na a’afia le palauvale atu o Liusamoa ia te ia ma fa’aauau ona lalau atu o ia.  E le’i tele ni manu’a o le tamaitai na a’afia, na aofia ai ma le ma’osia o lona alafau tauagavale.

Ina ua fa’atalanoaina e leoleo ia Liusamoa, sa ia ta’ua i leoleo e faapea, o le mafua’aga na ia osofa’ia ai le tamaitai lea na a’afia, i le fale’aiga, ona o sana fa’amatalaga na tusia i luga o ‘Api o Foliga’, e faatatau ia Liusamoa ma lona aiga.

Na ta’ua e Liusamoa lona fesiligia o le tamaitai na a’afia, pe na te manatua o ia (Liusamoa) ma ana faamatalaga sa na ia (tamaitai na a’afia) tu’uina i luga o ‘Api o Foliga’, ae na tali mai le tamaitai na a’afia, e le kea iai, o le a fa’aauau ona fai ana faamatalaga.

Sa fa’amaonia e Liusamoa lona ita tele i faamatalaga a le tamaitai na a’afia, ma o le mafuaaga lea na savali atu ai loa ma fasi.

O le aoauli o lea lava aso, na faapea ona lokaina ai Liusamoa i le to’ese i Tafuna, e faatalitali ai le aso o lona faamasinoga.

Ina ua matamata leoleo i le ata vitio mai i le fale’aiga, sa va’aia ai le tu’iina e Liusamoa o le tamaitai na a’afia, ma ia amataina le fusuaga.  Ae e leai se gaioiga pe na tali mai ia le tamaitai na a’afia, i le osofa’iga a Liusamoa.

O moliaga a Liusamoa na aofia ai le Faatupu Vevesi i nofoaga faitele ma le Fa’ao’olima i lona tulaga e tolu.  O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $500 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.