Mai le Samoana High sa aoaoina ma fa’auu mai ai le tamaitai talavou o Lessei Perelini i le tausaga ua mavae, ua ulufale ma ua mae’a lona tausaga muamua i lana Iunivesite o Aukilani, NZ, lea ua sailia ai lona fa’ailoga o le Bachelor of Global Studies/Global Politics & Human Rights. 

Ua maua e Lessei le sikolasipi e $5,000 (tupe Amerika) mai le South Pacific Islanders Organization (SPIO).

Fa’ailoa e Perelini, “Ua lutia nei le lalolagi atoa i le Coronavirus, ma ua avea ma se isi fo’i luiga e tula’i mai mo le olaga taumafai i aoaoga, ae maise fo’i, o se avanoa e mataituina ai nei ituaiga o fa’aletonu fa’alekelope.”

O le filifilia ai o ia e avea ma se tasi e mauaina lenei fa’ailoga fa’asikolasipi, ua fa’ailoa ai e Lessei lona agaga fa’afetai, ona ua maua fo’i e ia lea fesoasoani fa’aletupe, ae silisili ai o se isi avanoa le au maua, e va’ai ma auai patino i ituaiga o suesuega ma fa’agaoioiga o lo’o aga atu i ai ana suesuega i lana kosi tau’ave.

Sa ia fa’ailoa i lana lava tusi ma fa’aoo mai mo le fa’asalalauga, “E muamua ona si'i le vi’iga ma le fa’afetai i le Atua mo lenei avanoa fa’atauva’a. O le fa’afetai fo’i i o’u matua, ou matua matutua ma lou aiga. O le aoaoga ma le tausiga na outou faia mo au, ua mafai ai ona maua le malosi, ma le loto e taumafai ai le mea sili mo au ma lou lumana’i. Peitai o le taumafaiga lenei, ou te fa’ailoa atu, ou te ofoina mo lou faiaoga o Mrs. Sabrina Sulua’i Mahuka, o se tasi sa sili ona tele lona taimi e una’ia ai a’u, ma Mr. Michael Homsany, Mrs. Roxanne Suavaa-Salave’a, Ms. Kacie Fujino, ma Ms. Se’epa Poiali’i, o a outou aoaoga ua ou se’e ai nei i ma’a o malie.”

Peitai, o lenei avanoa ua ou maua, ou te fa’afetai ai tele i lou faiaoga o le Igilisi, Mrs Mahuka, aua o ia na ma’ua taumafai lava ia sa’o ma ou maua lenei avanoa ma le siakolasipi lenei a le SPIO, o lau ta’ita’iga ua mafai ai ona tu ma fai mea uma, ua tu’ua le fefe ma le le mautonu fa’ateine talavou mai Samoa si tatou tama’i motu, ae sulu ma le ulu ia maua se avanoa ma ia le toe fefe e saili avanoa fa’apenei i le taimi nei ma le lumana’i. Fa’afetai le fesoasoani mai, le agaga moni fa’afaia’oga e a’oa’o ma fa’asavali ia mautu le fa’amoemoe, o lau pule lea.”

Na soifua a’e Lessei Perelini i Niu Sila, peita’i na aumaia lava i Amerika Samoa ina ua masii mai ona matua matutua mo galuega ma ua amata ai loa ona ola a’e o ia ma aoga i le tatou nei malo. E le na’o le pau lea o se mea na fa’asaga i ai Lessei, ae ia mafuli ona matua e a’oa’o i ai le olaga o teine Samoa e fai fe’au i le fale ma lona aiga i fa’atasiga tetele pe to’aititi i latou e auai.

E le misia le lotu i aso Sa ma afiafi ta’itasi i totonu o le aiga. E tatau ona ola faaaloalo lelei ma usita’i i matua i mea uma. O fe’au masani e ao ina mae’a faia i le fale ma le aiga, e le misia tusa pe tele meaaoga.

Ua maua le avanoa o lona tina Malia Perelini ma ua toe fa’aulu fo’i o ia e a’oa’o le musika ma ua fiafia i lea fo’i taleni e ese mai ana aoaoga o taumafai i ai. O le ulufale ai i le a’oga maualuga a Samoana, o se fiafiaga lea ia te ia. Na matua iloa lelei e Lessei ituaiga o aoaoga ma fa’ailoga o lo ua naunau i ai lona loto e fia tausailia, o lona toe tausaga i Samoana sa avea ai o ia ma Peresetene o le Asosi a tamaiti a’oga uma i le Laumua.

O iina na amata manino atili ai ia Lessei le ala ma fa’ailoga ua ia naunau e sailia mo lona lumana’i, ma o se mea ua fa’aali mai e le Atua i lona mafaufau o le a fiafia o ia e tausailia ma ola ai.

Ua ia fa’aalia, “I le lotolotoi ai o le Coronavirus i o tatou olaga i lenei vaitau a’o tauivi ma aoaoga, ua atili ai ona fa’amautu mai lou mafaufau e ao ina ou mafaia ona ausia le fa’amoemoe na ou sau ai. Ia aua fo’i nei maumau le auupega ona o le lutia ai i le gasegase ae ia mafai ona saogalemu mai ma finau pea ia pasia mataupu o lenei vaitau i aoaoga. Fa’afetai i le Atua o lo’o alofa mai pea, tausia tutusa i tatou uma i Samoa na lua ma a’u nei i aoaoga.”