Ads by Google Ads by Google

Lagolagoina e le Kovana ma Lutena Kovana ia Faatonusili le tumau e ui ina e le’i pasia e le Fono


[ata: foa'i]

Pago Pago - AMERIKA SAMOA

Ua fa’alauiloa mai e le faigamalo fou ia le lagolagoina o le filifiliga o faatonusili le tumau, o se la’asaga taua muamua lea i le latou folafolaga mo se faigamalo faamaoni.

I se fa’aaliga faalauaitele No. 012-25 lea sa fa’ao’oina atu i sui faitulafono o le Maota Fono, o lo’o aofia suafa o i latou ua filifilia e avea ma Faatonusili le tumau, e ui ina e le’i pasiaina mai e le Maota Fono.

Ua ta’ua foi i le fa’aaliga fa’alauaitele le nofo silafia e le afioga i le Kovana ia Pulaali’i Nikolao Pula ma le afioga i le Lutena Kovana, le matua ia Pulumataala Ae Ae Jr., o atugaluga ua fa’atula’i mai e ni isi o tagata faigaluega a le malo, e tusa ai ma le fa’ate’aina o i latou e Faatonusili le tumau.

Ua fautuaina ai le mamalu lautele ina ia nofo malamalama, e le i faate’aina nei tagata faigaluega, e pei ona ta’ua i ripoti ua salalau.  Ae ua fautuaina i latou e tusa ai ma tulaga o a latou galuega, a’o talitalia le pasiaina o Faatonusili le tumau, e le Maota Fono.

Ua fautuaina le faia o a latou livi, seia faataganaina mai e le Senate.  Ma o lo’o nofo malamalama lelei ia Faatonusili le tumau i tiute ma limiti e o gatasi ma a latou tofiga, ma o lo’o latou nofo malamalama le le tumau o a latou tofiga, se’ia mae’a ona pasia mai e le Maota Fono.

O lo’o ta’ua foi i totonu o le fa’aaliga faalauaitele mai i le Kovana ma lana tu’uto e fa’aauauina le auaunaina o tagata o le atunu’u ma le faamaoni maumaututu.   Ma o lo’o iai lona faatuatuaga atoatoa i lana kapeneta tofia, ma lo latou agavaa e taitaiina ai le teritori agai i se tulaga mautu faaletupe faapea ma le atina’eina tau tamaoaiga.

Ua faapea foi ona fa’ao’oina atu e Kovana Pulalii ma Lutena Kovana Pulumataala lo la lagolago i faatonusili filifilia, a’o latou galulue faatasi.

O le taimi nei, ua faapea ona malolo ai le Fono mo le vaiaso e tasi, a’o talitalia le faao’oina atu o suafa o i latou ua filifilia e le Faigamalo a Pula ma Pulu, e avea ma faatonusili o ofisa ma matagaluega ‘ese’ese o le malo.