Pago Pago - AMERIKA SAMOA

O le amataga o lenei vaiaso sa faapea ona faauluina ai se pili taufa’aofi, a pasia, o le a mafai ai ona fa’autula’i ‘ese se Kovana po o se Lutena.  

E tusa ai ma le amataga o lenei pili, ua ta’ua ai e faapea, “O se tulafono e faamautinoa ai le talitonuina ma le faamaoni o le tali atu a tagata mautofi o le malo, e ala i se gagana manino ma le malamalama, i aiaiga o le faatula’i ‘ese, ina ia faatumauina ai le fa’atuatuaga o tagata lautele ma le tausia ai pea o le pule a le tulafono.”

I le amataga o taualumaga a le Maota o Senate i lea taea, na mua’i fa’afeiloa’ia e le Peresetene o le Senate, le afioga i le Senatoa ia Tuaolo Manaia Fruean, ia alii ma tamaitai a’oga mai i le a’oga maualuga a Tafuna, sa faatasi atu i lea aso, e latou te maimoa i le faatinoga o tiute a le maota fono.

Ma sa ia tu’uina atu le avanoa i le afioga i le Senatoa ia Togiola T.A. Tulafono, mo se fa’amalamalamaga o lenei pili.

Sa tatalaina le tautala a Togiola i lona faapea mai, “O lo’o faapupula mai ai, o le kovana ma le lutena kovana, e mafai ona ave’eseina mai o la tofi, pe a iai ni solitulafono po o ni tulaga ua le talitonuina ai lo la agavaa e fa’aauau le taitaiga o le malo.”

“Aua o le kovana ma le lutena kovana, o la tofi e tofia e le atunu’u.  A uma le palota ua manumalo, o la’ua e fa’atautaia le malo.  Ae o le aiaiga la lea, afai e ave ave le fa’atautaiga, ae ua le talafeagai, ua soli ni tulafono po o  ua iai ni tulaga matuia, ua le talitonu ai le fono faitulafono, ona fai lea o le ‘impeachment’ po o le fa’atula’i, o le kovana po o le lutena kovana, mai le tofi,” o le fa’aauauina lea o le saunoaga a Togiola.

“O aiaiga la o le tulafono, o le maota o sui e latou te iloiloina, pe tatau ona faatula’i pe leai.  A palota le maota o sui, le 2/3 o le latou nofoaiga, e fai le faatula’i, ona auina mai lea i le Senate, e faia le faamasinoga.”

O lea faamasinoga, e aiaia le 18 o Senatoa o lo’o saofafa’i i totonu o le maota nei.  O le faamasino na te fa’atautaia le iloiloga, o le Faamasino Sili a le malo.  O le ala lena o le tulafono lea, e afio mai le faamasino sili e na te faia le faamasinoga, ae o le Senate e na te faatautaia ia moliaga, e tusa e pei ona momoli mai e le Maota o Sui, ma fautuaina le Senate, ia talia le faatula’i.”

“A mae’a ona palota lea o le Senate, a maua le 2/3 po o le 12 palota ioe, ona mafai lea ona ave’ese fa’amalosi le Kovana po o le Lutena Kovana mai o la tofi, ae toe filifilia le tofi fou,” o le fa’apupulaga atoa lea a Togiola e tusa ai ma lenei pili taufa’aofi.

Ma sa ia faaleoina foi se valaaulia i alo ma fanau aoga mai Tafuna, pe afai o iai so latou manatu e fia fa’aalia e tusa ai ma lenei pili, ia faapea ona auai atu i se iloiloga fa’alauaitele, lea ua fuafua e faataunu’uina i le 8:30 i le taeao o le aso Faraile, e mafai ona lesitala o latou igoa i le failautusi o le Senate, po o le fa’ao’o atu foi o se molimau tusitusia, e mafai ona faitauina i le taimi o le iloiloga.

I le suia o lenei tulafono, e pei ona ta’ua i le pili, o se taumafaiga lea ia puipui malu ni “faiga sese ma le le talafeagai, po o ni amioga mataga ma le fa’aaoga sese o le pule i le tauavea o le tofi, ma e tatau lava ona faatulaga ia manino lelei ina ia vaoia ai le ono faaluafesasi po o le fa’aaoga sese.”

E le gata i lea, “o le manino lelei o le gagana o tulafono o le fa’atula’i ‘ese e mautinoa ai o lo’o talafeagai lelei le fa’agasologa, faamanino lelei ma ia tusa ai ma manatu tausili o le fa’avae, puipuia o aia tatau o Le ua tu’uina atoa foi ma tagata lautele.”

O lo’o ua ta’ua foi i totonu o le pili le o gatasi o le fa’atula’i ‘ese ma ‘tu ma aga a Samoa o le vaaia lea o lo’o fai le galuega a ta’ita’i a o fa’amalamalama le faia o galuega ma le tu tu fa’atasi, ia aputiputi ai pea le faatuatuaina ma le fefa’aaloaloa’i i le va o ta’ita’i ma tagata o lo’o latou tautuaina.  Ua iloga lea, e le gata i totonu o faigamalo ae faapea foi i aiga, nu’u ma ekalesia.”

Aemaise ai le ‘malu puipuia [o] le mamalu ma le fa’aloalogia o tatou ta’ita’i ma fa’amalosia ai le faavae o manatu tausili o le feavata’i, o le tautua ma le fa’amaoni.’  Ma “o se tulafono malosi o le faatula’i ‘ese, e atagia ai le gaua’i atu o le malo i taitaiga lelei ma fa’amasinoga tonu, ma manatu tausili o pulega lelei, e faamalosia ai le talitonuina e tagata lautele i faigata faatemokarasi.”

Sa saunoa le afioga i le Senatoa ia Tuialu’ulu’u Vaimili Tuialu’ulu’u, le sui taitaifono o le komiti tau a’oa’oga a le Senate, e avea ma sui o le taitaifono, le afioga Alo Dr. Paul Stevenson o lo’o si’i gasegase atu i atunu’u i fafo, ma faaleoina le agaga fa’afetai ma le fiafia i le va’ai atu i lea taeao, i le auai atu o alo ma fanau a le atunu’u, e fa’aalia ai le agaga fia a’oa’o i le faagaioiga o le fono faitulafono.

O le afioga ia Tuialu’ulu’u na avea ma faiaoga i tausaga tuanai ma sa ia fa’asoa atu i fanau aoga lona masani ona u’una’ia fanau aoga i na vaitaimi, ina ia a’oa’o ma faamasani i le faagaioiga o lala e tolu a le malo.

Sa ia faamanatu atu foi i fanau aoga i le aso Lua, o i latou o taitai o a taeao ma sa ia tima’i i latou ina ia galue punoua’i i a latou a’oa’oga ma ia faamamafaina i fanau, o lo’o latou taulimaina le lumanai o Amerika Samoa.