“O LE LA MA LE MASINA”

I aso a la ua leva sa iai se perenise lalelei lava e igoa ia La.  Sa nofo faatasi lenei aloailii i se maota ua sili lona matagofie, faatasi ma si ona tama, le tupu o Pulusi.  Na maliu le tina o le perenise a o pepe meamea o ia.  Ma ina ua talavou lona olaga, na toe fai ai seisi toalua a lona tama, le tupu o Pulusi.  Ma sa iai se tama a le masiofo fou, e igoa ia Masina.

O le alolofa ia o le tupu o Pulusi ma le uso fou o le perenise, le alii o Masina, i le Perenise o La.  Ae peitai, na matuai nifo tulimanu o le masiofo fou ia si perenise.  Aua ua naunau le loto o lenei masiofo fou, ina ia avea lana tama o Masina ma tupu pe a maliu le tupu o Pulusi.

Ua tuputupu fiafia a’e ia le Perenise o La ma lona uso fou o Masina, e aunoa ma so la iloa, taupulepulega leaga a le masiofo fou o lo o taumafai ina ia fasiotia ia Perenise.

O se tasi aso na alu ai le masiofo ua taoto i lona moega ma tagi faataitaio ma oi pei a oti.  Ua asiasi mai ai le tupu o Pulusi e vaai po o le a le mea ua mafatia ai lana masiofo.

Na faapea atu le tupu, o le a a’ami le fomai o le malo ae tali le masiofo, e leai, o ia ua lata i lona maliu, ae na o le pau lava le fofo o lona gasegase, e faigata ona maua mai.  Ua fesili si tupu, po o fea e maua mai ai le fofo. 

Ae tali lenei masiofo faufau leaga, e faigata ona ou tautala e uiga i lenei fofo ona e matuia tele.  Ua tauanau atu le tupu, e ta’u vave mai ia te ia le fofo.  Po o le a lava le faigata, o le a ia saili ina ia maua mai.

Ua na o le oi pepelo o le masiofo ma i’u ina musumusu atu i le tupu e faapea, “O le perenise.  Ua tago fetu’u a’u ma e se’i vagana ua ou inu i le toto o lona fatu, ou te oti lava i le po lenei.”

Na toeititi pe le fatu o le tupu i le tala a lana masiofo, ona e pele ia te ia si ona atalii, le perenise o La ma e le mafai ona ia faia le mea ua ta’u atu e le masiofo.  Ua vave ona mafaufau le tupu ma ia faapea atu ai loa i le masiofo, “Ua lelei.”

E tali le tupu, ae ua leva ona iai lana fuafuaga e faatama’ia se oti  ae ave le fatu e faasese ai le masiofo.  

Ua tula’i le tupu e alu ese atu mai i le potu a le masiofo, ae o la fetaui ma le alii o Masina ma na iloa atu e le tupu o Pulusi i foliga o Masina, na fa’aali mai ai lona lagona uma o tala a lona tina lea sa fai i le tupu.  Ua manatu le tupu e faapea, e tatau ona faamalamalama ia Masina lana fuafuaga lea o le a fai.

Ae peitai, i le pisi tele o le tupu, na galo ai ona ia talanoa atu ia Masina.  Ae o le taimi lea ia Masina ua matua’i le mautonu i le mea sa ia faalogo iai, i le manaoga a lona tina.  Ma sa popole vale lona loto ina ne’i taunu’u le manaoga a lona tina ma fasiotia ai si ona uso fou.

Ua alu nei Masina e su’e lona uso, le perenise o La ma faamatala uma iai le talanoaga a le tupu ma lona tina.  Na faanoanoa si perenise ina ua na faalogo ua ioe lona tama i le manaoga a le masiofo leaga, ina ia fasiotia o ia.

Ua tonu i le perenise e tatau ona sola ese mai i le maota a lona tama.  Ua faapea mai foi ma lona uso o Masina, o le a la sosola faatasi.  Ma ua fiu lava le perenise e taumafai e sui le mafaufau a lona uso, ae ua leai lava le alii o Masina.

Ua tu’ua nei e le perenise ma Masina ia le maota o le tupu o Pulusi.  Ua savavali nei alii agai i le toafa.  Ua fiu e saili se mea e malolo ai ae ua matua’i vevela lava le la i le toafa.  Ua faapalasi i lalo Masina ma faapea atu i le perenise, ua le mafai ona toe savali.  Na ia tagi atu i le perenise, e tu’u o ia e oti ai iina ae fa’aauau lana sola’aga.

Ua tago atu nei le perenise ma faataoto si ona uso ma faapea atu iai, “Ou te alu e su’e mai se suavai e te inu ai.”

Ona fa’aauau ai lea o le savaliga a le perenise.  Na iloa mamao atu lava e le perenise se ma’a mumu ma ia faataalise atu iai.  Ae ina ua ia latalata atu iai, na ia iloa ai, o se faitotoa mumu.  Ua tu’itu’i le perenise i le faitotoa, ae tatala mai e se toeaina.  Ua tagi le perenise ma aioi atu i le toeaina mo se fesoasoani mo si ona uso o Masina.

Ua tamomo’e atu nei le toeaina ma le perenise ma si’i mai si alii o Masina ma aumai i totonu o le ana lea e nofo ai le toeaina ma tausi ai o ia, seia o’o ina malosi.  Ma sa nonofo ai loa le perenise ma lona uso o Masina faatasi ma le toeaina, i totonu o le ana, i tua o le faitotoa mumu.

IA MANUIA TOE FUAFUAGA O LENEI VAIASO.