Vaega e 06

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 06

****************************************

“Ua o’o i le taimi e fa’atino ai le gaioiga…Ua o’o i le taimi e fa’atino ai le gaioiga,” o le memumemu lea a le alii ave pasi a’oga o Paulo.  “O lea ua fa’atonu mai ai e le Atua.  O le Aisa o se faitoto’a i le va o le lagi ma le lalolagi.  Ma ua mafai ona ou iloa atu Agelu.  Ma lagonaina le mafanafana o le Atua.”

A’o faia le tatalo lelogoa a le alii o Paulo, ae o le taimi lea ua susu mai ai lona ofuvae, ona o le maualuga o le vateatea ua opeopea ai, ae ua na le lagonaina lona fia alu i le fale le ta’ua (se’i tulou).

Sa tau autilo solo ia Paulo i se ta’avale lapo’a e mafai ona fa’asa’o iai lana pasi.  Ae ua fiu e autilotilo.

Na ia va’aia se ta’avale lapo’a i leisi itu o le auala, ae peitai, o lo’o iai se pa o lo’o va ai ma lea ta’avale lapo’a.  Ma na faapea loa lona manatu, o le a fa’aoso ese le pasi ma luga o le alatele, ma fa’apa’u mai i lalo i leisi auala lea e i lalo ifo.

Ae, a’o fa’aalu pea mafaufau o Paulo i le fa’agasologa o le fa’aoso ese o le pasi ma i luga o le auala tele, ma fa’apa’u atu i lalo, i leisi alatele, ma atonu e pa ai le pasi, ma vave o’o mai ai le oti, ae fa’alogoina e Paulo le pa si mai o se mea, ma le oso fa’afuase’i i tua o lana pasi aoga.

Ua palauvale leotele ia Paulo, ina ua tu fa’afuase’i le pasi.  Ma lona oso mai i fafo, ua pa le pa’u o le pasi a’oga.

[E FAIA PEA]