Ads by Google Ads by Google

Alofa: Fa'avae ai Aiga— Vaega 99

O se feiloa’iga fiafia, o se feiloa’iga ua toe fafagu mai ai tulaga faigata o le olaga sa soifua mai ai, ae na lofia ai ma loimata maligi, ma so’o se tulaga fa’apea, e le mafai ona mavae le alofa o le tuagane i lona tuafafine, fa’apea fo’i le tuafafine i lona tuagane.

O a fo’i tulaga e fa’apea ai ua fai aiga, ma ua sa’ili lava le manuia o le tagata latou, e le mafai lava ona mavae le nonofo fealofani, e ola a’e fo’i fanau, e fa’apena ona o latou maua le fealofani, le feva’ilia’i, ma le alofa o le tasi i le isi, o toto, a’ano, ma ivi, o le uso tu ‘ofe o le fa’asinomaga lea o le tagata soifua, i lona aiga.

Ua talatalanoa fiafia nei Tagiilima ma ona tuagane, na alu alu lava le talanoaga, tau i a Malia, le uso o Tagiilima. O Malia, o lo’o nofo tane i le isi nu’u e le mamao tele ma le nu’u o le aiga o Tagiilima, ua o’o lava i ai ta’avale i lenei vaitaimi, ua le toe i ai ni tulaga fa’apea se’i iloga e savavali i ai fa’atoa feiloa’i.

Na fesili nei Tagiilima i ona tuagane pe na logo Malia, Tomasi ma Toetu e tusa ai ma le talanoaga. Na tali Lolesio e fa’apea, “Ia a logo fo’i, ou te le iloa e te lua o’o mai ma Loimata, ae a fai o le a  tonu e fai, o le mea sili, o lea e umi le lua tafaoga. E sili ona alu se tama e ta’u i a Malia e sau tatou tafafao ma tatou fiafia fa’atasi ma tatou talatalanoa i le mataupu e pei ona taoto nei i lo tatou aiga.” Na tali Tovi’o e fa’apea, ua sili le tonu lea ua fai mai nei e Lolesio, ma o le taimi lelei fo’i lenei e fa’atasitasi tatou uma.” Ua fa’apena ona fai, ua logo loa Malia, o Tomasi ma Toetu ina ia o’o ane mo le feiloa’iga a lo latou aiga, ma ia logo o latou tausoga ina ia fa’atasitasi uma i le talanoaga a le aiga. A’o fa’agasolo le talatalanoaga a Tagiilima ma ona tuagane, o le taimi lea, o lo’o talatalanoa pea Loimata ma le fanau a Lolesio, ua lagona e le teine lona fiafia ina ua maua le avanoa e feiloa’i ai ma ona tausoga.

Ua sauni nei le aiga mo le alalafaga ma le faigalotu a le Faifeau ma lona Faletua, lea o le a taunu’u ane i le afiafi.  E le i pogisa le aso, ae taunu’u ane le lo’omatua o Sunema ma lana fanau, ua amo ane e tama le pua’a ma le fa’afafa a le lo’omatua o lo’o i ai i totonu fagu sea e lua. O lo’o ta’ita’i mai e teine le umu, o lo’o i ai talo ma palusami ma le ulo supo moa Samoa.

“Tagi, o lea ua taunu’u mai Sumena ma si a’u fanau, na fai i ai la’u fa’atonuga ae ou te le i sau, e fai le umu, ia o lea ua o’o mai ai.” Na liliu nei Tagiilima ma autilo mai i fafo, ona ua le iloa mai ni tagata ua pupuni i ie fa’amalama mananaia lava. E tasi lava le mate a le lo’omatua, o ie fa’amalamalama nei e le o maua i Samoa, o lona uiga o ie fa’amalamalama na avatu i Tutuila i le afafine o lona tuagane, o Minalosa lea o lo’o nofotane i Tutuila. 

“Oi, talofa e, a lailoa lava si ou to’alua ma nai tamaiti, fa’afetai lava Tovi’o, ia ua tasi si au mea sa’o i lenei afiafi.” Ua toe manatua e Tagiilima ma ona tuagane le tala e lafo so’o e lo latou tama i le latou tina pe a o’o ina fai a la finauga. Ua alu ai nei le talie, lea la e fa’alogologo mai i ai Sunema ina ua savali mai i totonu o le fale.

Na i ai masalosaloga o le lo’omatua o Sunema i lea taimi, ona ua fetaui lona ulufale, ae alu loa ma le talie a Tagiilima ma ona tuagane. O uiga ia o Sunema e le fiafia i ai le aiga o Tovi’o ae maise ai o Tagiilima, e fa’aleaga tagata, e fai uma e Sunema tala o tagata, e uluulu fale solo. A iloa e i ai si ana mea mama e maua mai se isi, ona alu lea la’u i ai leaga o le isi. O uiga ia na iloa lelei e Tagiilima lea la o lo’o le malie ai i lona tuagane o Tovi’o. E ui lava i lea itu, ae ua talia e Tagiilima le talosaga a lona tuagane na fai ane ia te ia, ina ua taunu’u ane i le fale o Lolesio.

Ua o’o ane nei Sunema ma feiloa’i i a Tagiilima, ua saofa’i ifo nei i luga o le isi nofoa o le fale o Lolesio ma Analosa. Na ona mapu ifo lava o le lo’omatua e le i toe fa’atali, “Oka, ta’i manaia le fale o Analosa ia, letioa a e le toe alu atu i mea a le Komiti, ona o lea ua e nofo e teuteu lou fale. O a mai Minalosa i Tutuila, o manuia” Ua pu’e uma e Tagiilima le uiga o fa’amatalaga a Sunema, ua iloa fo’i e Sunema ai o ni mea ia na avatu i Tutuila i le afafine o Lolesio.

Na vave lava ona toe fo’i i tua le mafaufau o le lo’omatua o Tagiilima i uiga o Sunema, ona ua fiu e poloa’i mai e avatu tamaiti e nonofo i a te ia ma a’o’oga ai, ae ‘emo ane, ua avatu tu’u i lona tuagane o lo’o Faifeau i le isi nu’u e lata ane i le taulaga.