Ads by Google Ads by Google

Vavau a Samoa

O LE POGAI O LE 'AVA I SAMOA

Vaega #2

E le'i umi se taimi o le mafutaga a le Tui Fiti ma tama'ita'i Samoa nei e to'alua, ona maua lea o le ulua'i tama e soso'o ai le gafa, ona taumafaufau lea o se igoa e faaigoa ai le tama, ona toe manatua lea e tama'ita'i le taimi na utu ai suasami i totonu o le va'a, ona maua ai loa lea o le igoa o le tama matua o "Suasamile'ava'ava".

Ua faanau le tama lona lua, ona toe tomanatu fo'i lea o teine i se igoa o le tama, ona la toe manatua ai lea o aufa'i e lua ia na tu'u atu e le tama o Falatunatuna lea sa toto fa'i i le togafa'i o Malietoa, a'o alu atu le latou solaaga ma le laua tama, ona faaigoa ai loa lea o le tama ia "Ululatetele" ae o le isi tama ina ua toe fanau mai, na faaigoa i le igoa o le isi aufa'i o "Solatetele", mulimuli ane ua toe fanau le isi la tama o le teine, ma ua atoa ai le to'afa o le fanau, e tolu tama ae tasi le teine.

Ua agai atu ina matua le soifua o le Tui Fiti peitai e lei maua lava se igoa o lona afafine, ona ia fesili lea i ana ava pe i ai se mea taua i Samoa e ono faaigoa ai si ona afafine, peitai na faailoa i ai e tamaitai le vai o le latou nuu i Vailele fai mai a tu ai lona mulivae e le lilo i le suavai, ona fai mai lea o le Tui Fiti, “ua lelei, o le a faaigoa la lou afafine ia “Mulivaiovailele,” e faamanatu ai le vai a le tou nuu.

Ua alu pea aso o le mafutaga a tamaitai Samoa ma le Tui Fiti, ua oo ina gasegase le Tui Fiti ma ua le maua se fofo o lona gasegase, na iu ai lava ina maliu le alii, ona faaee loa lea o le Tui Fiti i le tama o Suasamile’ava’ava aua o ia o le ulumatua o le fanau. Ua tele aso o le mafutaga a tamaitai nei ma le la fanau toafa. Ua oo i le tasi aso ua gasegase le tama o Tui Fiti Suasamile’ava’ava, ona fai loa lea o lana mavaega i ona uso ma lona tuafafine e faapea, “a ou oti, ia tanu au i le valusaga, o mea uma lava e tutupu mai ai i lou tuugamau, ia avea lea o lo outou oso i Samoa, e saili ai lo outou aiga,” fai mai ua maliu Tui Fiti Suasamile’ava’ava, ona tanu lea i le valusaga e tusa ai o lana mavaega.

Ua oo i le tasi aso ona asi lea e le  au uso ma le la tuafafine le tuugamau o le latou uso, ma latou vaaia ai ni mea e pei oni atigilima o se tagata, sa toe asi atu i le isi aso, ma latou vaaia ai le laau ua tupu ae ai e tauponapona lona tino, ae toe asi atu i le isi aso, o loo ai mai e le imoa le laau, ona niniva lea o le imoa, ua tifa ma tolo tolo atu i le isi laau o loo ola i vae o le tuugamau ua ai, ona te’a ai lea o lona niniva, ma, fai mai le mau a faa faleupolu, o iina na pogai ai le igoa o le”tolo” o le “‘ava” ma le “malae o le niniva” lea e oo mai lava i aso nei o loo i ai pea.

Ona sauni loa lea o le auuso e toalua ma le la tuafafine e toatasi, o le a sau la latou ausaga mai Fiti i Samoa, e saili le aiga o lo latou tina e pei o le mavaega a le latou tei matua, le alii o Tui Fiti Suasamile’ava’ava ao lei maliu. Tuli tatao mai i le vaiaso le ausaga a le auuso lea ua fuafua mo Samoa, faatasi ai ma le la tuafafine.