O LE VAIPUNA O ALAPE I SA’ANAPU

Fai mai le tale e lei toe fa’atali Logona i le taimi na ia lagonaina ai le tala a le toeaina o Filiafa, ae na ia aapa atu loa i le atigi pupu na sau ma ia i lona aiga ma lia’i loa aga’i i le vaega o lo o alu ane ai le fua a Vaovasamanaia ma lana au malaga. E lia’i e le tama le pupu ae mulimuli atu ai ma lana valaau i tua, “Sole, vaai le pupu lena e ave e fai ma outou oso”. Fai mai le tala na lelea atu lava le pupu pau tonu lava i tafatafa o le va’a o lo o folau ane ai Vaovasamanaia ma lana manamea fou, ona alaga lea o le ali’i e taofi le fua ae sei aumai i luga le pupu.

Ua taofi uma fua o lo o o atu ai le au malaga ae ua aapa le tama e piki mai i luga le pupu. Na ona maua lava e le tulafale o le pupu, valaau atu loa ma Vaovasamanaia e sasa’a i lalo le pupu, na faateia Vaovasa ina ua sasa’a i lalo e le tulafale le pupu ae vaai atu na o le pupu toto o loo tafe mai ai, ona iloa loa lea e le ali’i o lona faletua lona selau lea o lo o la ti’eti’e i luga o le fua e le o se taupou moni o ia. Fai mai o le ita tele o Vaovasa na  liliu ai loa le fua ae ato le tamaitai i le sami. E talitonu ni isi na mafua ona ato e Vaovasa le tamaitai i le sami ina ia avea ma faletua o Logona, ae faaauau lana malaga i Manono ma le malie atoatoa o lona loto, ua lata ona faletua e 99 ua i ai.

O le pogai lena e talitonu ai isi o le mafuaaga lena o le Palesoo i Lepuia’i i Manono, e mafua mai ina ua le atoa faletua e toa 100 sa manao i ai Vaovasa, ae na o le 99 sa maua, e na o le 99 foi maa sa tuu i luga o le pa e faamanatu ai ona faletua e 99 sa i ai.

E fa’apena fo’i le isi vaega o le soifua o Logona lea e taua i le tala a le tama’ita’i o Sinaleavele, le tamaitai lea sa nofo i Vailima i le nofoaga ua taua nei o Avele. Fai mai le mau sa alu Logona i Vaimauga e taalo ai, ma la feiloa’i ai ma Sinaleavele, ona fai lea o le la mafutaga. Ua alofa tele Sina ia Logona, ona nofo lea o le tamaitai ma tuu i ai lana ula, peitai o le ula lea, o le ula a le alii o Tunavaetele le manaia o Vaimauga sa ave e fai meaalofa ai ia Sinaleavele.

Na tei Tunavaetele ina ua la feiloai ma Logona i taaloga sa faia i Vaimauga, ae vaaia ai e Tunavaetele lana ula sa ave ia Sinaleavele o lo o ula atu ai Logona, ma e fai fua lava taaloga i lea aso ae ua tiga le loto o Tunavaetele ia Logona, ona amata loa lea ona faaosooso o Tunavaetele isi manaia ina ia latou auau faatasi e fasi Logona ia oti, ma ua atili ai ona ita Tunavaetele ona ua ia maua tala i le mea sa fai e Logona ia Vaovasamanaia.

O le taimi na uma ai ta’aloga na fasi tele ai loa e Tunavaetele ma isi manaia ia Logona ma manu’a tigaina ai le ali’i, fai mai sa sulu Logona i le taufusi ao lalaga fale le isi olomatua, ona fesili lea i ai o manaia na latou fasia o ia, pe sa ia vaaia se tagata o ui atu i o, ae na tali le olomatua, e leai. Fai mai o le taufusi lava lea na oti ai Logona ona o le matuia tele o manua na aafia ai lona tino, o iina foi na maua ai ma le igoa o le nuu o Taufusi e pei ona i ai nei.