“O LE A LE MEA A LE PEPA FANAU E FAI?”

E te’i le fa’alogo a si Fafige Faikakala i le mataupu lea ua tofu atu i luma o le fa’amasinoga Apili, e fa’atatau i le lu’i o lo o finau ai se tasi o sui tauva mo le palota, e fia vaai lava i le pepa fanau o se tasi o faipule o lo o fai ma sui o le latou itumalo i totonu o le Fono Faitulafono. O lenei mataupu e le o malamalama tele i ai le Fafige Faikakala, ae o ana uo e vavalalata i sui e to’alua o lo o vavao i le mataupu lenei na latou fa’amalata auiliili i si Fafige Faikakala tulaga uma e fa’atatau i le mataupu.

O le itu e malie i le maitau atu, e tiga lava ona finau atu le Ofisa o Palota i le sui fou o lo o fia tauva mo le tofi a le itu malo, ua mae’a ona faia le latou suesuega ma ua faamaonia o lo o agavaa le faipule e toe tauva i le isi palota o lo o loma nei, ae tasi lava le finau a le sui fou, “ou te fia vaai lava i le pepa fanau ona uma lea o le mataupu.” “O le a le mea a le pepa fanau e fai i le palota a le itumalo?” o le fesili lea a le isi uo toeaina a le fafige faikakala e fa’atatau i le mataupu lenei. “Afai o lea ua aumai le faaiuga a le Komesina o Palota, ua agava’a le faipule e toe tauva i le isi palota, aisea e toe fesiligia ai le pepa fanau?”

Na tau pe le fatu o le fafige faikakala ina ua tago atu e tali lana telefoni i le isi aso ae faapea mai le isi ana uo loomatua, “fa ika lava e figau le sui fou i loga fia iloa o le pepa fagau o se Kukuila mao’i, ao lea o ia fo’i sa fagau i Upolu”, na ata le fafige faikakala ma fai atu i lana uo loomatua lea i luga o le telefoni, “Eh!, ka’i kaukala kele legei kelefogi”.

MUIMUI LE ATUNUU I LE MEA SA’O AE FEITA AI LE FONO

Ofo fa’amaga si fafige faikakala ina ua fa’amatala atu i ai e le isi ana uo foma’i le mata’utia o le mea lea o lo o tupu i ni isi o senatoa o le maota maualuga, e feita pe a muimui tagata o le atunuu i siitaga o alauni a senatoa ma faipule, atoa ai ma siitaga i totogi o le kovana ma le lutena kovana. O le itu e te’i ai si fafige faikakala, e fa’aleo atu e tagata tipi lafoga o latou lagona faanoanoa e tusa ai o mea o lo o tutupu i totonu o le atunuu, ma aafiaga o tagata ao lea ua finau e sii totogi o senatoa ma faipule, ae feita ai ma fai mai e soia le muimui ma faasea.

“E faafefea ona feita i finagalo o le atunuu, o lea e sa’o tagata, e na o le ta’i 90 aso fono o le tausaga, e le atoa se itula e usuia ai le fono i taimi o tauaofiaga, sei vagana ai taimi e talanoaina ai le paketi po o ni iloiloga a komiti ona faatoa iloa lea ua atoa se afa aso po o le tau latalata i le aso atoa o galulue, ao lea e finau mai e sii le ta’i $10,000 i alauni?”, o le tomumu lea a le uo foma’i a le fafige faikakala. O le fautuaga a le uo foma’i a le fafige faikakala i senatoa o lo o faasea i le muimui o tagata, “ia onosa’i tou loto, e pule lava le tama a le olomatua i lana mea e fai”.

AMATA ONA PISI SUI TAUVA MO LE PALOTA

Ua toe 43 aso o lo o totoe amata atu i le aso lenei ona taunuu loa lea i le aso tele o le sailiga tofi a le atunuu, ae o lea ua amata ona pisi solo kama sasa’o e faamautu tagata palota i itumalo taitasi, ina ia mautinoa e tele ekisi e maua ina ia mafai ai ona toe nofo i le nofoa mo le isi lua tausaga.

E lei malamalama lelei le isi taeao ae tatagi le telefoni feavea’i a si fafige faikakala, ae tago atu e tali, o le isi ana uo loomatua e faigaluega i le Fono Faitulafono, o lo o tala ata atu i le mata’utia o le mau i’ugafono lea ua fa’aulu i luma o le maota o sui, e talosagaina ai le fausia o talu galu ma auala i totonu o itumalo taitasi, o le itu e malie ai, o lea ua toeititi lava mae’a le lua tausaga o le nofoaiga, ao lea faatoa pisi isi faipule e faaulu iugafono mo ni galuega i totonu o itumalo.

Fai mai le uo a le fafige faikakala, e moni lava e lelei mea nei o aikia ma mailei ae le umi. Fai aku ai fo’i.