[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua filifili ai le tamaititi o Koso o le a nofo i uta i le faatoaga e le toe fo’i ane lava i le ‘aai.]

 “ ...ae afai o le iuga lea o le ma mafukaga ma Keli sa fafau mai i aso e kele, o lea ua ia filifili e avea Silia lo’u kuafafige e fai ma aga pa’aga, e sili ai pe a aua ge’i o’u koe feiloa’i i lea kagaka i aso o loo kokoe o lo’u ola ...” o mafaufau fai to’atasi ia na tupu a’e i le loto o Koso ao taoto na o ia i lona faleoo i uta i le fa’atoaga, ona o le mafatia o lona mafaufau i le vaaiga lea ua molimauina e lona aiga i le mafutaga a lana uo mama o Keli ma lona tuafafine o Silia. Na pei o le emo o le mata le salalau o le tala i tulimanu e fa o le nu’u o Amouta, o lea ua talia e matua o Silia i le faamalamalamaga a Keli, ma ua sauni fo’i le aiga mo le aso tele mo i laua. “ ... vaai oe Keli lo’u akali’i, fa’afekai o lega ua momoli aku le faaiuga a makua o Koso ia ke oulua ma Silia, e le koe faia fo’i la sa makou fa’amakalaga, pau o legei, saugi o le a fa’akaugu’u lo oulua aso fiafia i se taimi e le o koe umi.

O le malulu tele o le sau o le vaveao na mafua ai ona te’i i luga le tamaititi o Koso ma ia vaaia ai ua tatafa ata o le aso fou, ona tonu loa lea i le mafaufau o le tamaititi, ua tatau ona ala saili i le Atua mo le aso fou, ona amata ai loa lea o sana galuega o le aso. E vevela ane loa le la ae mafola loa ma le lafo tele lava a le tamaititi o Koso, ona filifili loa lea o le a lava galuega o le taeao, ae ua tatau ona fai sina malologa ua vevela fo’i le la. O le tolu ai o aso e lei vaaia lava Koso i le aai, na mafua ai loa ona fesili ona matua, ae na fa’ailoa i ai e ona uso, o Koso lea ua nofo lava i le ma’umaga e le toe fia fo’i ane i le aai, pau lava le galuega a Koso lea ua fai i aso uma, o le tapena o meamata ma momoli ane i le aai i le afiafi mo le latou aiga, ona toe fo’i lea o iai uta i le nofoaga o lo’o fa’amautu ai.

O le tuana’i ai o le lua masina talu ona fa’alauiloa le mafutaga a Silia ma Keli, na sauni ai loa aiganalua mo le aso tele mo i laua, ma ua logo fo’i le nuu atoa o Amouta i le fiafia tele lea ua sauni e fa’atino, ona o le tama’ita’i o Silia sa avea ma Taupou a lona aiga, ao lea ua filifili e fa’aipoipo, o ia fo’i o le alo tama’ita’i o le Tuua o le nuu atoa, o le mafua’aga fo’i lea ua manatu ai tagata, e le o se aso laititi lea ua tapena i ai aiga na lua. Ua logo tala Koso i le polokalame o le aso, ma ua tapena fo’i le tamaititi i lana fa’atoaga aua le taumafataga o le aso a lona tuafafine. Ua pisi tagata uma i le aso tuupoina, ua le toe i ai se isi e nofonofo i le fale, ua tau fai agai uma atu tagata i le falesa faapea ai ma le faletalimalo sa faataunuu ai le aiga, se’i vagana ai lava le tamaititi o Koso o loo pisi i tua i le umukuka i le tapenaina o umu ma gasesega o le aso, ina ua mae’a ma mautu mea uma, sa toe fo’i atu ai loa Koso i uta i lona nofoaga o loo faamautu ai.