3 AMERIKA SAMOA FA’AU’U MAI KOSI ALE ELDP

Mai le to’a 22 o i latou o sui mai teritori ma motu tumaoti o Amerika i le Pasefika na fa’au’u mai i le Kosi o le Executive Leadership Development Program, alo e toatolu o Amerika Samoa ua aofia i lea vasega.

Ua fa’ailoa mai o le lona fa ai lea o vasega o lea ituaiga kosi ua mae’a talu mai le tausaga na fa’ato’a amatalia ai i le 2008, ma o lo’o faatupe ina lenei polokalama e le Matagaluega a le Initeria i le malo tele, ma o se kosi e fesoasoani atili i atumotu i tulaga o atina’e ma ni alagatupe e agava’a ai i latou e talosaga atu ai.

O sui o Amerika Samoa e aofia ai: Magdalene Lina Petaia o le Matagaluega o Fefaatauaiga, Leifiloa Tanoi Felise o le Matagaluega o Fefaatauaiga ma Salamasina Satele o le Matagaluega o Tagata Faigaluega a le malo.

“O le a’oa’oga e aoga tele, o ala o feso’ota’iga ma le malo tele i ana fesoasoani masani mo atumotu o lo’o latou fa’amalumalua, o latou tamaoaiga tausi, ia iloa patino fo’i e tatou ta’ita’i ma tagata faigaluega i tulaga mautofi o le faigamalo, e ao ina manino aiaiga ma ala e maua ai ia fesoasoani mo atina’e eseese o le atunu’u,” o se saunoaga lea a Lina Petaia ina ua fa’afeso’ota’ia mo sona lagona fa’aalia e tusa o lea fo’i la’asaga fou o le atamai sa latou sailia ma ua manuia mai faiva.

O lea fo’i kosi e ao ina maua’a le vasega lea i tomai tau le fa’afoega o latou malo, fa’asoaina o le paketi e fa’atupe ai le atunu’u, su’ega o tupe teu ma fa’aalu a le malo, aiaiga o avanoa fa’afaigaluega o tagata, tulafono e fa’afoe ai le malo, le soifua maloloina ma ala eseese o fefa’ataua’iga ae maise oloa ma meatotino ma latou aiaiga. O se kosi e aoga tele lenei ua mafai ona fa’aulu atu ai nei alo o le tatou malo ae a le lumana’i o lo tatou ola feso’ota’i ma le malo tele.

LAFOGA FA’AE’E I FALETALIMALO AMATALIA IULAI 1, 2015

O le lafoga fou e 5% mo faletalimalo i ana tagata e nonofo ai, e aofia ai ma faletalimalo laiti [Motels] ma isi ituaiga pisinisi o lea ituaiga, e fa’aa’e i le aso Lulu o lenei vaiaso Iulai 1, 2015.

Na pasia e le Fono faitulafono lenei pili i le lana fonotaga muamua ma ua mae’a sainia fo’i e le kovana ia Aperila 16, 2015 ina ua mae’a fa’ailoa e sui o le malo i le fono faitulafono e ao ina aoina le $200,000 mai lea lafoga.

Ua fa’ailoa mai i le fa’aupuga o lea pili e 75% o le tupe aoina mai lea lafoga e ao ina fa’auia i le Pulega o Uafu ma Malae Va’alele ae o le isi 25% e fa’auia i le teugatupe tele a le Malo.

Ina ua sainia e le Kovana lea pili ina ia fa’amalosia ai, sa ia fa’ailoa mai, “O le toe fa’aopoopoina atu o lea vaega tupe i le paketi fa’asoa a le Malaeva’alele ma Taulaga i Uafu, ua fa’ailoa atu ai e le tatou malo i le FAA ua si’itia e le tatou malo le tupe fa’asoa mo lea matagaluega.

Na matua tete’e lava nisi o faipisinisi tau faletalimalo i luma o le fono faitulafono i lea si’itaga, ma sa latou fa’ailoa mai, “O lenei faiga e atili ai lava ona le fa’aosofia nisi e fia o mai e maimoa i le tatou atunu’u, ae o lea fo’i e taumafai ona atina’e lea fo’i ala e fa’aleleia atili ai le tatou tamaoaiga.

TALIA TALOSAGA POLENESIA MO LE ISI 30 ASO

Ua fa’ailoa mai ua toe fa’amanuiaina fo’i le talosaga a le Kamupani vaalele a le Polenisia ina ia fa’aauau ai a latou malaga i le va o Tutuila ma le Manu’atele i malae vaalele i Fitiuta ma Ofu.

O lea fa’atagaga e mo le 30 aso e afua mai ia Iuni 29 se’ia o’o fo’i ia Iulai 28, 2015. Na talia mai lea talosaga e le sui failautusi o le USDOT mo feoa’iga i le Ea le tama’ita’i o Susan L, Kurkland ma ia ua fa’ailoa mai, “Ona o lo ua fa’amaonia le tulaga mana’omia mo feoa’iga i le ea i le va o nei motu e lua o le Manu’atele ma le motu o Tutuila o lo’o fa’atulaia ai le tautua uma, e tatau ai ona fa’aauau lea auaunaga se’iloga ua i ai se isi suiga tumau e mautinoa ai ua fa’atumu lea tulaga mana’omia e le malo o Amerika Samoa.”

E ui ina e le o se Kamupani va’alele Amerika le Polenisia, peita’i, ua fa’ailoa mai e Kurkland, “E le tatau ona taofia fo’i le auaunaga mo tagata nu’u o le Manu’atele ona o le tulaga e le o i ai se Kamupani va’alele i  Amerika e fa’atautaia lea auaunaga, ae o le a soloia uma lea aiaiga se’ia maua se isi kamupani latou te fa’atautaia lea auaunaga.”