FA’AU’UGA POLOKALAMA ‘EFNEP’ LAND GRANT

O le aso 24 Mati, 2016 na faia ai le fa'au'uga o le Vasega e a'oa'oina ai le gaosiga o mea'ai paleni ma mea'ai tatau e tausia lelei ai le soifua maloloina.

O le kosi lea sa fa'atautaia e le vaega a le CNR a le Land Grant a le Kolisi Tu’ufa’atasi a Amerika Samoa mo le ono vaiaso ma ua agavaa ai latou i tusi pasi ua mae'a taua'aoina e fa'ailo ai a latou taumafaiga.

O i latou na auai i le vasega mai le amataga e to'aono: Nana Mamona, Julia Sufia Faiga, Loligi Aumua, Josephine Leleai, Michael Palenatino, Meyann Fa'asau. Faia a'oga mo nisi i a latou ekalesia ma latou sosaiete i tua i afio'aga ma le atunu'u.

Sa aofia i lenei  kosi nei vaega eseese: Eat Right, Talent Skills ma le Balance Meals  & Make Right Choices for Healthy Foods, ma ua taumafai atili i latou e tima'i tagata ina ia fa'amalositino e fa'aitiitia ai le mamafa tele o tino.

47 SUI TOTINO FOU NHS TAFUNA HIGH

Ua fa'ailoa mai i le polokalama fa'atautaia a le A'oga Maualuga a Tafuna e to'a 47 sui totino fou o le latou Sosaiete a Tamaiti a'oga ua ausia togi maualuluga i a latou mataupu tau'avea i a'oa'oga, ma ua ulufale nei i latou i le Sosaiete a le NHS.

O le aso 17 Mati, 2016 na fa'atautaia ai le polokalama i le Hall tele i Fatuoaiga, ina a mafai ma fa'amnuia atili i lea vaega o le fanau, e ala i tima'iga ma fa'aulaga mai o latou aiga ma matua ae maise latou uo mamae.

"O lenei tausaga, ua manatu ina ia suia fo'i le nofoaga e fa'atino ai lenei sauniga mamalu, ona ua va'aia e sagisagi fo'i o fanau a'oga, toe tinou i latou e fai a latou meaaoga ina ia maua lenei taui lelei. Fa'afetai atu i le fanau ua fa'amanuiaina le tauivi, ae o nisi e le'i la'asia lea laina o taumafaiga lautogia, ia fa'amalosi atili mo lea tausaga,” o se tala lea a le tama'ita'i pule, Beauty Tuiasosopo.

I le sauniga sa fa'atautaia e pei lava ona masani ai, e fa'atautaia lava e le laulauatofi o tutula'i mai lenei tausaga a le Sosaiete NHS Tafuna i lenei tausaga. O le tatalo amata na si'itia lea e Rev, Tauaveave Ta'amu o le CCCAS i Tafuna. O le lauga fa'apitoa mo le vasega o le fanau ua ausia lenei la'asaga maualuga i togi o mataupu o tau'avea, sa fofogaina lea e le tama'ita'i o Ruth Tuatoo mai le a'oga a Tafuna i le tausaga e 2003.

Matagofie fo'i lenei tausaga ma le fa'aaloalo maualuga sa fa'atino e le THS JROTC program. Na fa'aitualalua le JROTC e fa'afeaoa maia i totonu le solo fa'aaloalo a le fanau ua fa'ato'a ulufale i lenei sosaiete NHS i lenei tausaga.