FASIOTI TAGATA FESOASOANI MO TAGATA MAMA’I O LE EBOLA

E to’a 8 tagata sa ofo atu la latou fesoasoani i tagata ua aafia i le fa’ama’i oti o le Ebola na maliliu i le aso ananafi i Guinea, ina ua tauai e tagata o le motu i latou i ma’a ma sasa i laau, ona o le feita o tagata o le nuu i le pipisi o le fa’ama’i o le Ebola i vaega eseese o Aferika i Saute. I ni ripoti mai lea vaega o le lalolagi na taua ai, o tagata e to’a 8 na fasiotia e aofia ai ni foma’i, o tamaitai tausi ma’i faapea ai ma se alii tusitala sa fesoasoani i le faalauiloaina o ripoti e faatatau i lenei gasegase mata’utia. Ua galulue nei leoleo i Guinea e saili tagata na faatinoina lenei solitulafono, ae le o avea lea ma itu e faaitiitia ai le toatele o tagata o lo o naunau e ofo atu o latou ola e fesoasoani ai i tagata ua aafia i le fa’ama’i o le Ebola. E tusa ai ma se ripoti mai le Faalapotopotoga o le Soifua Maloloina a le lalolagi (WHO), ua tusa nei ma le to’a 2,600 tagata ua maliliu i le Ebola talu ona pesi lenei fa’ama’i.

MALILIU FANAU I LE OONA O LE KASA O POMU

E to’a 15 fanau laiti e i lalo o le ta’i 2 tausaga le matutua na maliliu i le vaiaso nei, ma le silia i le to’a 50 o lo o tau faaola i le falema’i i Iraq, e mafua mai ina ua aafia i latou i le oona o le ea ma le kasa o pomu o lo o fa’aaogaina i le taua i totonu o le atunuu i le taimi nei. Na taua i ni ripoti le lolofi atu o tina ma latou fanau i le falema’i mo ni togafitiga ma le manatu, atonu e faaolaina ai i latou, peitai o se tulaga pagatia, e le atoa se aso e aafia ai fanau i le oona o le vailaau ae maliliu loa i latou, e mafua mai ina ua aafia o latou totoga i le malolosi o vailaau o lo o i totonu o mea tau o lo o faaaogaina i le taua.

FIU E SAILI SE ULUGALII INA UA PA SE VA’ALELE

O le aso ananafi na faamuta aloaia ai taumafaiga a leoleo o lo o puipuia le gataifale o le atunuu o Jamica, i le tau sailia o se ulugalii mai Amerika na pau le la va’alele i ogasami o Jamica i le amataga o le vaiaso nei ma leiloloa ai. Na fiu foi le va’alele a le vaega a le U.S Coast Guard o le C-130 e faia gaioiga uma ina ia mafai ai ona maua tino o le ulugalii peitai ua siliga lava se fesoasoani. O le susuga ia Larry Glazer ma lona faletua ia Jane na malaga i le la va’alele, ina ua mae’a se la malologa puupuu ma faamoemoe ai loa e toe fo’i atu i lo la aiga i Florida. O lo o feteena’i ripoti i le taimi nei pe toafia tagata na malaga i le va’alele, fai mai isi e to’a tele tagata sa i ai i le va’alele ae na fai mai isi e na o le ulugalii. Ui o lea, e tele galuega lelei e manatua ai e le toatele lenei ulugalii, e aofia ai lo la fiafia e fesoasoani i tagata lima vaivai.

OBAMA: FASIOTI LE ISIS AE LEI O MAI E FASIOTI TATOU

Ua tuuina atu nei e le peresetene o Amerika ia Barack Obama se feau lapata’i i ona tagatanuu, ina ia faia auala uma e faaumatia ai tagata o lo o avea ma sui o le vaega faatupu faalavelave o le ISIS, manu e lei oo i le taimi latou te fasiotia ai tagata Amerika. O lenei feau mai le alii peresetene, o lo o avea pea ma lu’itau i loto ma agaga o tagata Amerika uma i soo se vaega o le lalolagi, ona o le faalavelave lea na fasiotia ai e le ISIS tagatanuu e to’alua mai Amerika i le masina na te’a nei, e ala i le aveesea lea o la ulu (tulou). O le taimi nei, ua matua fesoasoani malosi Amerika ma ana fitafita i le aoao ma koleni fitafita a Iraq ma isi atunuu i Sasa’e Tutotonu, ina ia maua e i latou le tomai ma le agavaa e tete’e atu ai i faiga faatupu faalavelave a le ISIS.

fa’aliliu: AF