FA’ALAUILOA LE MAFUA’AGA NA MAUA AI OSAMA

A o taumafai ai tama sasa’o a Amerika e tau fetu’una’i le mafua’aga autu na ala ai ona maua e le Vaega a le Navy Seal le ali’i mata’utia o Osama bin Laden, na taua ai i se ripoti ma le Maota Maualuga a le Konekeresi e fa’apea, e tasi le mafua’aga autu na mafua ai ona maua e le Navy Seal ia Osama, ina ua ta’u e se sui o le al-Qaeda sa loka e le vaega a le CIA fa’amatalaga uma e faatatau i le nofoaga o lo o lafi ai Osama i Pakisitana.

Na taua e le ripoti a le Senate e fa’apea, ana le fa’amatu’u e le au ali’i ia fa’amatalaga i le CIA, e le mafai ona maua e le Navy Seal le nofoaga o lo o lafi ai Osama, ae o le mea e pito sili ona malie ai i le ripoti, o sui o le al-Qaeda lea na tu’uina mai fa’amatalaga pepelo ma le tau fa’asese i sui o le CIA, o i latou ia na mulimuli ane latou tu’uina atu fa’amatalaga sa’o ma le fa’atuatuaina, na mafua ai loa ona maua ma fasiotia Osama. E talitonu le Senate, e leai ma se auala na taumafai le CIA e faia na aoga, e pei o le fa’aaoga o le tomai fa’aonaponei atoa ai ma metotia e pei o le feso’ota’i ma isi tagata mai fafo e saili ai fa’amaumauga maumaututu fa’asaga ia Osama.

SILIA 50 TAMAITI FASITOIA VAEGA FA’ATUPU FA’ALAVELAVE

SENAA, YEMEN - E silia i le to’a 50 tamaiti laiti na maliliu ina ua tu’i pomu e se vaega fa’atupu fa’alavelave i totonu Yemen i le aso ananafi le nofoaga autu o lo o tausia ai tamaiti ua leai ni matua. E ese mai i tamaiti na maliliu, e to’a 17 fitafita a le malo sa fa’apea fo’i ona maliliu ai, ina ua tau fai osofa’i mai e le vaega fa’atupu fa’alavelave e taua o le Houthi le ogatotonu o le taulaga. Na taua i ripoti e fa’apea, o tamaiti na maliliu e i lalo o le ta’i 12 tausaga le matutua, o i latou fo’i nei sa tausia e le malo i le nofoaga autu lea, ina ua fasiotia o latou matua i le tele o taua sa tupu i totonu o le atunuu i le tolu masina talu ai.

MASALOMIA VAEGA ISIS I AUSETALIA

SINI - O le fa’alavelave mata’utia lea na maliliu ni tagata se to’alua i Sini i Ausetalia i le amataga o le vaiaso nei, ua tula’i mai ai masalosaloga o le malo e foliga mai ua ofi atu i laufanua o le atunu’u faiga ma pulega fa’a ISIS, le vaega fa’atupu fa’alavelave mai Suria o lo o latou fasiotia le faitau selau ma selau o Kerisiano i vaega eseese o le lalolagi.

O le fa’alavelave na tula’i mai ina ua taofia fa’amalosi e se ali’i fa’a a’upegaina ni tagata e tusa ma le to’a 20 i totonu o se fale’aiga lauiloa i Sini, ma tula’i mai ai loa ma se tauga fana i le va o le ali’i lea ma leoleo, lea na i’u ina maliu ai le ali’i fa’atupu fa’alavelave o Man Haron Monis atoa ai ma ni tagata nuu se to’alua o Ausetalia. O i laua ua maliliu o se tina e 38 ona tausaga ma e to’atolu si ana fanau, ma le ali’i pule o le fale’aiga ia Tori Johnson. Na taua e le ali’i palemia o Ausetalia e fa’apea, e ui o lea ua oti le ali’i fa’atupu fa’alavelave, peita’i o lea fa’atoa amata le su’esu’ega fa’asaga i lenei mataupu, i le fia mautinoa lea o le mafua’aga na faia ai e Monis lenei gaioiga mata’utia.