Ads by Google Ads by Google

TALA OTOOTO O LE LALOLAGI

TO'A 50 UA MOLIA I LE FASIOTIA O SE ULUGALII KERISIANO

 

PAKISTAN - E to'a 50 ni tagata au taofia faapagota nei e leoleo i totonu o Pakistan, ona o tuuaiga i lo latou auau faatasi lea e fasioti se ulugalii kerisiano na masalomia o lo o la taumafai e lagolago gaioiga a le vaega a le al-Qaeda. Na taua i se ripoti a leoleo e faapea, ina au amata ona masalomia e tagata o le nuu gaioiga a le ulugalii lenei, sa fai ai loa se tau pulepulega ua tatau ona fasiotia i laua, ae ina ua mautinoa e nisi o le nuu isi gaioiga a le ulugalii, na osofai ai loa e tagata le fale, faaleaga uma meatotino sa i ai ma fasioti le ulugalii.

 

E $5 miliona le tupe na foa'i e le malo o Pakistan mo le aiga o le ulugali'i e fesoasoani ai i tapenaga o le maliu, atoa ai ma le taumafai e taui atu lenei gaioiga sa faia, ona o nisi o tagata ua falepuipui nei e maua tulaga maualuluga i le malo, e galulue foi isi i ofisa ma matagaluega a le malo. E le gata o le fesoasoani tupe, ae 10 eka le tele o se fanua ua foa'i atu e le malo mo le aiga o le ulugalii ua maliliu.

 

FAFAO LE TINO MALIU I TOTONU O LE ATO PA'U

 

HONG KONG - Na faateia le aufaigaluega a se tasi o fale talimalo i Hong Kong ina ua tapena atu se potu sa mau totogi ai ni tamaitai se to'alua, ae maua atu ai se ato pa'u o lo o i ai le tino maliu o se tama'ita'i, ae o le isi tama'ita'i na maua o lo o maliu i lalo o le moega. O le tino maliu na maua, o le tino lea o le tamaitai o Sumarti Ningsih, 25 tausaga mai Indonesia na malaga ma lana uo tamaitai i se la tafaoga, ae tula'i mai ai le fa'alavelave e pei ona fasiotia ai i laua.

 

I le salalau ai o lenei ripoti mata'utia i le lalolagi ma o o atu ai i Indonesia, na talosagaina ai loa e le tama o le tamaitai Indonesia ua maliu le fa'amasinoga maualuga a Hong Kong, ina ia fasiotia le tagata sa ia fasiotia lona afafine, aua ua tatau lava ona oti o ia.

 

FA'ALAUILOA LE ALI'I NA FASIOTIA OSAMA

 

UOSIGITONE - Ua fa'aalia e se alii sa avea muamua ma sui o le NAVY SEAL a Amerika i le nusipepa o le "The Washington Post" e fa'apea, o ia tonu lea na fanaina le pulu fana na maliu ai le ta'ita'i o le al-Qaeda o Osama bin Laden i le masina o Me 2011. O le alii o Mark Bissonnette, 38 tausaga sa ia faamatala le osofaiga na latou fasiotia ai Osama, "o se aso e le faigofie". I tausaga e 15 na avea ai o ia ma sui o le NAVY SEAL a Amerika, sa tele osofaiga faapea na auai o ia, peita'i o lana molimau i le tusitala sa faatalatalanoaina o ia, o le osofaiga ia Osama le osofaiga pito sili na faigata ma mata'utia.

 

"Ou te le'i manatu ou te ola i le osofaiga lea", o le isi lea molimau a Bissonnette i le tusitala. Sa ia taua foi lona mautinoa lelei, na maliu Osama i le pulu fana mai le fana sa ia faaaogaina, i le taimi na ia fanaina ai ao taumafai Osama e una'i mai i luma se fafine sa maua faatasi laua i totonu o le potu, e fa'aaoga o se talita e tete'e ai pulu fana.

 

Na faamaonia mai e sui o le NAVY SEAL, o Bissonnette le isi sui sa i totonu o le potu na fasiotia ai Osama, peita'i o lo o finau mai isi sui o le NAVY SEAL, e le o mautinoa le tala a Bissonnette po o ia moni na oti ai Osama, aua e to'alua isi fitafita sa latou i ai fa'atasi i totonu o le potu. E talitonu sui o vaega 'au a le malo tele, o le gaioiga ua faia e Bissonnette e fa'alauiloa i le atunuu ma le lalolagi vaega o lana tautua, ua fete'ena'i lea ma ta'iala e fa'atatau i le tautua a fitafita, lea o lo o fa'apea mai, "aua ete taumafai e ua'i mai mafaufau o tagata i lau tautua".

 

LOKA LE PULENU'U MA LONA TO'ALUA

 

MEXICO - Ua taofia nei e leoleo le alii pulenuu mai se tasi o aai i Mexico ma lona to'alua, ona o tu'uaiga i le la taulamua ai i le fa'alavelave lea na fasiotia ai ni tamaiti aoga se to'a 43 i totonu o le isi nuu o le aai, ma tanu i se fanua tanu tele lava. Na masalomia le pulenuu ma lona toalua i le i ai lea o le la sootaga i lenei faalavelave, ina au maitauina e leoleo se fafine e masani ona ulufale ma ulufale i se fale tuufua na avea ma nofoaga e faamautu i ai gaioiga na mafua ai ona fasiotia tamaiti aoga na maliliu. Na pu'e faapagota e leoleo le fafine lea ma fesiligia, mulimuli ane taofia faapagota atu ai ma le alii pulenuu ma lona to'alua. O alii e to'a 43 ua maliliu, o ali'i sa ave a latou mataupu faa faiaoga i se tasi o aoga e latalata ane i le aai lea e nonofo ai le pulenuu ma lona to'alua.