TO’ATOLU AMERIKA UA FAAMAONIA LE AVEA MA SUI O LE ISIS

E to’atolu tagatanuu o Amerika ua fa’amaonia le avea o i latou ma sui o le vaega fa’atupu fa’alavelave a le ISIS i totonu o Suria, ma o lo o tau i latou i osofaiga o lo o faia fa’asaga i le malo o Iraq faatasi ai ma isi atunuu Isalama o lo o tete’e atu i faiga a le ISIS. Na taua i ni ripoti mai le vaega a le FBI a Amerika i le vaiaso nei e fa’apea, o se tasi o i latou nei o Jordan Matson, lea sa avea ma sui o le Ami a Amerika mo le lata i le lua tausaga, i le aai o Wisconsin. O ni ata sa faasalalau e le ISIS i luga o upega o fesootaiga, o lo o faapipii mai ai le ata o Matson ma ni isi o sui o le ISIS.

TOE MAUA LE TEINEITITI NA LEILOA MO LE 12 TAUSAGA

O le vaiaso nei na maua ai e leoleo se teineititi na tau sailia mai i le 12 tausaga talu ai, ina ua masalomia ua ave faamalosia laua ma lona tina e ni tagata faamalosi tagata, peita’i i suesuega sa faaauau pea i lenei mataupu, na maua ai e leoleo sa nonofo le teineititi lenei ma lona tina i se aai e tu i le va o Mexico ma Puebla. O le teineititi ma ona matua sa nonofo i Texas, ae i le tausaga e 2002 e pei ona taua e FBI, na sola ai le fafine ma ave lana tama ina ua 5 tausaga lona matua, ina ua mae’a le fa’aiuga a le fa’amasinoga e aloaia ai le tete’a fa’aletulafono o le ulugalii, ona o tu’uaiga a le fafine i le fasi soo o ia e lona to’alua, e le o ia fo’i o se tamaloa lelei. Na fa’afetaia e le tama o le teineititi leoleo ma le FBI, i lo latou galulue le faavaivai e saili lona afafine.

OVA 500,000 TA’AVALE A LE GM UA TOE FA’AFO’I

E 524,000 le aofa’i o ta’avale a le kamupani ta’avale ta’uta’ua i le lalolagi o le General Motors (GM) ua valaau le kamupani i kamupani o lo latou fa’atauina atu nei ta’avale, ina ia toe fa’afo’i uma atu ta’avale nei i totonu, ina ua fa’amaonia e i ai se fa’aletonu i se vaega o le ituaiga fausaga ta’avale, o lo o mafua ai ona tula’i mai fa’alavelave e pei ona lavevea ai ni ta’avale se tolu lea na manunu’a ai i tagata se to’alua. Na taua e le kamupani e fa’apea, o se fa’aletonu i pa’u o le ta’avale ua fa’amaonia i suesuega, ua manatu ai loa e tatau ona toe fa’afoi uma atu ta’avale mai le tausaga e 2010 e o o atu i le 2015, le ituaiga o le Cadillac SRX e aofia ai ma le 2012 Saab9-4XSUVs.

TO’ATELE TAGATA SULUFA’I MALILIU I LE SAMI MA LE VAO

E silia i le 40,000 tagata mai isi atunuu o lo o naunau e fia ulufale atu i totonu o le malo o Peretania ua maliliu talu mai le tausaga e 2000, ao taumafai e ulufale fa’amalosi atu i totonu o Peretania Tele mo le sailia o se isi olaga fou mo i latou ma o latou aiga. O ni isi o tagata latou rte fa’aaoga nofoafi o lo o malaga mai i atunuu i fafo atu o Peretania e ulufale fa’amalosi ai i totonu o lea atunuu, ae o isi tagata latou te fa’aaoga va’a e ulufale atu ai i totonu, ma o le 40% o i latou e fa’aaogaina nei auala e maliliu ona o le faigata o le auala o lo o latou uia.

MALILIU FITAFITA E TO’A 9 MALO AUFA’ATASI INA UA OSOFA’IA

E to’a 9 fitafita o lo o tautua i lalo o le fu’a a Malo Aufa’atasi na fasiotia e ni tagata fa’atupu fa’alavelave i le taeao ananafi, ao feagai ai latou ma le puipuia o le saogalemu ma le filemu i totonu o atunuu i Sasa’e Tutotonu, e pei ona fa’amaonia mai i ni ripoti mai Europa. O fitafita ua maliliu e o mai uma i Niger, lea na fasiotia e tagata fa’atupu fa’alavelave mai le aai o Menaka, i le itu i sasa’e o le taulaga o Gao i totonu o le atunu’u o Mali. Na taua e se sui sooupu a malo aufa’atasi e fa’apea, e ui e le o iloa po o ai tonu i latou sa faatinoina lenei osofaiga, ae le o malolo ai suesuega a malo aufa’atasi ua faia fa’asaga i lenei fa’alavelave.