LA'A MA LE 2X4 I LE TO'ALUA O LONA AFAFINE

O le tama matua lea na vaovao ma se 2x4 i le to'alua a lona afafine ma ia lafo i ai upu mataga ma tala tau fa'amata'u, ua poloaina e le fa'amasinoga fa'aitumalo i le taeao ananafi, e sili pe a alu e saili se isi nofoaga e nofo ai mo le taimi nei, se'i tau fa'ato'a filemu le vevesi o lo o tula'i mai i le latou aiga ona toe avatu lea o se isi fautuaga a le fa'amasinoga ia te ia.

O le faaiuga o le vaiaso na te'a nei na taofia fa'apagota ai e leoleo mai Amouli  se tama ma tu'uaia o ia i le moliaga mamafa o le fa'atupu vevesi i totonu o lona aiga.

O le vevesi na tula'i mai ina ua logo e le to'alua o le afafine a le ua molia le ofisa o leoleo i Fagaitua mo se fesoasoani, ina ua vaaia le faigata lea ona fa'ato'ato'a o le mafaufau o le toeaina i le vevesi atu ia te ia, atoa ai ma le lafo atu o upu masoa ia te ia.

I fa'amaumauga a le fa'amasinoga o lo o taua ai e fa'apea, o le vevesi na tula'i mai ina ua fa'atonu e le ua molia lona afafine e aua ne'i avea lana fanau e fa'ataeele i le sami ina ne'i mama'i tamaiti ona le o lea i le aoga, peita'i na te'i le ua molia ina ua fa'alogo atu ua fa'ataga e le to'alua a lona afafine lana fanau e o pea e taeele i le sami.

Na avea lea ma itu na ita ai loa le ua molia ma valaau atu loa i le to'alua a lona afafine, pe aisea ua fa'ataga ai tamaiti e o e ta'aeele.

Na faifai tetele le ita o le ua molia i le mea ua tupu, ma amata ai loa ona ia faia ni gaioiga e fa'ailoa ai lona ita e ala i lona lafo o ni upu masoa i le to'alua a lona afafine, soso'o ai loa ma lona aapa atu i se laupapa 2x4 ma savali aga'i atu i le itu o lo o tu mai ai le tamaloa, ae na vave ona vili e le tamaloa le ofisa o leoleo ma aga'i atu ai loa leoleo ua fa'afilemu le mataupu, e ala i lo latou taofia fa'apagota o le ua molia i le taimi lava lea, ina ia taofia ai le toe tula'i mai o se isi vevesi i le lumana'i.

Na teena e le ua molia tu'uaiga o le fa'atupu vevesi i totonu o lona aiga, ma poloaina ai loa o ia e le fa'amasinoga e aua ne'i ona toe faia ni isi gaioiga e toe save'u ai le nonofo filemu i le va o ia ma le to'alua o lona afafine.

TETE'E TELE'A VAIFALE I TU'UAIGA A LE MALO

O le masina o Ianuari 2015 lea ua toe tolopo i ai le isi iloiloga o le mataupu a Tele'a Vaifale, ina ua ia tula'i i luma o le fa'amasinoga maualuga ma teena tu'uaiga a le malo fa'asaga ia te ia, e afua mai i le fa'alavelave lea na ia fa'amalosia ai se teineititi e 14 tausaga le matua i Iliili i le masina o Iuni na te'a nei.

O lo o tu'uaia Vaifale i moliaga mamafa e fa e aofia ai le faiaiga fa'amalosi ma se teineititi, tagofia o itutinosa o se teineititi, faia o amioga fa'asotoma, fa'apea ai ma le faia o feusuaiga mataga fa'asaga i se teineititi, o lo o molia fo'i o ia i moliaga mama e lua, o lona taofia faapagota o se tagata i se auala fa'amalosi, fa'apea ai ma le fa'ao'olima i le tulaga tolu.

E tusa ai o faamaumauga a le faamasinoga o lo’o taua ai faapea, ina ua fesiligia e leoleo le ua molia e tusa ai o lenei mataupu, sa ioeina ai e le ali'i ua molia e 23 tausaga lona matua, lona fa'amalosia o le teineititi na a'afia, ma o lo o taofia pea Vaifale i le toese i Tafuna ina ua le mafai ona ia totogi le vaega tupe sa fa'atulaga e le fa'amasinoga e tatala ai o ia i tua.

LASI FINAUGA

O ali'i e 28 tausaga lea na 'ona ma fa'aumuumu i luma o se faleoloa i Tafuna, soso'o ai loa ma lona fa'aleaga o ni ta'avale se lua sa paka ai i le taimi o le po, ua tu'uaia nei e le malo i le moliaga mama o le fa'atupu vevesi i nofoaga faitele, ma le fa'amoemoe e ono i ai ni moliaga fa'aopoopo e toe molia ai o ia, pe afai ae mae'a su'esu'ega a leoleo o lo o fa'agasolo e tusa ai o le mea sa tupu.

O se ata sa pu'eina e le masini pu'eata a le faleoloa na tupu ai le fa'alavelave, na mafai ona iloilo e leoleo i le taimi o le latou su'esu'ega, ma atagia mai le tele o se fa'aletonu sa a'afia ai se tasi o ta'avale, lea e silia ma le $100 le tau a'ofa'i e fa'aleleia ai vaega sa fa'aleagaina.

O le vevesi na mafua mai ina ua alu atu Lasi Finauga e fa'atau mai ni isi ana fagupia, ae teena e le fa'atau oloa ona ua te'a le 10:00 e fa'agata ai ona toe talia le fa'atauina atu i tua o le 'ava malosi, ma avea ai loa ma itu na ita ai le ua molia, ma savali loa i fafo o le faleoloa ma fa'aumuumu ai, soso'o ai loa ma lona tago i se piliki sa i fafo o le faleoloa ma togi aga'i i le puipui sima, peita'i na ta'e le piliki ma fiti atu ai fasi piliki ma ta'e ai tioata o ta'avale e lua sa paka i luma o le faleoloa.

Na taunu'u leoleo ma latou su'esu'eina le mataupu, ma aga'i atu ai loa i le fale e nofo ai Lasi ma latou pu'e fa'apagota mai ai o ia ae taofia i le toese i Tafuna, e fa'atali ai le aso Faraile na te'a nei lea na tula'i ai i luma o le fa'amasinoga fa'aitumalo.

O ni isi o poloaiga a le fa'amasinoga mo Lasi ina ua toe tatala o ia i tua mai le toese, e le gata ua fa'asa ona ia toe tuvae i le faleoloa na tula'i mai ai le fa'alavelave, ae ua fa'asa fo'i ona ia toe solia se tulafono, pe na te toe tagofia le 'ava malosi.