FRED MALOATA

O le ali’i lea na to’alua i ai ali’i talavou na la fa’aleagaina masini sua auala atoa ai ma loli a le kamupani fai auala o le McConnell Dowell, ua poloaina e le fa’amasinoga maualuga la te totogiina to’alua ma le alii na molia faatasi laua le tupe mo le toe faaleleia o masini ma loli a le kamupani na la fa’aleagaina, aemaise ai o lana salatupe e $1,000.

O Fred Maloata na ta’usala e le faamasinoga ma le alii o Simi Vesi i le moliaga o le faaleaga meatotino i le tulaga lua, ina ua talia e le faamasinoga maliliega na sainia e i laua ma le malo i le masina o Mati na te’a nei.

O le masina na te’a nei na lau ai le faasalaga o Vesi, ae o le taeao ananafi na faatoa lau ai le faasalaga a Maloata i luma o le alii faamasino sili lagolago ia Lyle L. Richmond.

Na faatoese le ua molia i le faamasinoga e tusa ai o lana solitulafono sa faia, ma ia talosagaina ai se avanoa e faaauau ai pea lana tausiga i lona aiga. Sa ia faatoese fo’i i lona aiga aemaise si ona tina, ina ia faamagalo o ia e tusa ai o lana solitulafono sa faia.

Na taua e Maloata e faapea, e leai se tina e manao e fai e sana tama ni amioaga mataga, peitai ua avea lona le faalogo ma le le usita’i ma auala ua molia ai o ia i le tulafono.

O Maloata ma Vesi na tuuaia i lo la faaleagaina o masini a le McConnell Dowell na paka i le afioaga o Leone, a’o faatino ai e le kamupani galuega mo le fa’aleleia o auala a le malo i lea itu o le atunuu.

O ni isi o poloaiga o le nofovaavaaia a Maloata i totonu o le 2 tausaga, e aofia ai le faasa lea ona toe oo i le nofoaga o lo o i ai masini a le kamupani fai auala, aua nei ona toe tagofia le ava malosi, a ia tumau pea ona faigaluega i lana galuega ua i ai ma ia usita’i i soo se tulafono a le malo.

Ua poloaina foi o ia la te totogiina faatasi ma Vesi le tau o mea sa faaleagaina o masini, lea e finau mai le malo e $3,420.

VILIAMU SENIO

O le alii lea na ia osofaia lona uso i se agaese i le po o le tausaga fou na te’a nei, ua poloaina e le faamasinoga maualuga ina ia taofia o ia i le toese mo le umi e 12 masina, ina ua ta’usala o ia e le fa’amasinoga i le moliaga mamafa o le faaoolima i le tulaga lua.

Na fa’atoese Viliamu Senio i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia se’i fo’i atu ai i lona aiga e tausi lona to’alua ma lana fanau. Sa ia fa’atoese fo’i i lona uso na aafia aemaise ai o le latou aiga atoa, ina ia alolofa fa’amagalo o ia.

Na tutu fa’atasi loia a le malo ia Tony Graf ma le alii loia fautua ia Joel Shiver na tula’i mo Senio, ina ia nofovaavaaia o ia i lalo o ni poloaiga mai le faamasinoga e usita’i i ai.

Na taua e loia le matua salamo o Senio e tusa ai o le solitulafono sa ia faia, ma ua ia aoaoina fo’i se lesona aoga talu mai masina na taofia ai o ia i le toese i Tafuna.

Saunoa le ali’i fa’amasino sili lagolago ia Lyle L. Richmond e faapea, o le itu lelei o lenei mataupu, ona o se faafitauli na tula’i mai i le lotoifale o le aiga, ma e talitonu le fa’amasinoga ua mae’a ona toe teuteuina lenei mataupu i le va o itu e lua.

O ni isi o poloaiga o le nofovaavaaia a Senio mo le 5 tausaga e aofia ai lona totogiina o le salatupe e $1,000, o le a mafai fo’i ona tatala o ia i tua e faigaluega ma tuli lona faasalaga, pe afai e mafai ona toe talia o ia e le kamupani sa galue muamua ai a’o le i tula’i mai lenei fa’alavelave.

O le vevesi na tula’i mai ina ua fo’i atu Senio mai le pati a le latou aufaigaluega sa fai i le aso tonu o le tausaga fou, ae lafo atu e lona uso se tala na mafua ai ona tiga lona loto a’o ‘ona, ma alu atu ai loa ma le agaese ma faaoolima ai i lona uso.

Ua poloaina e le faamasinoga ia Senio e auai i ni aoaoga e fesoasoani ai i le tulaga o le ava malosi ma le ita, ma ua faasa fo’i ona ia toe tagofia le ava malosi i le umi o lana nofovaavaaia.