FASIOTIA SE FAIAOGA AMERIKA I PAKISTAN

ADUL - E 47 tausaga o se tina faiaoga mai Amerika na fasiotia e se tagata sa ia umia se a'upega mata'utia, i totonu o se faleoloa tele lava e pisi ai fa'atauga i le taulaga o Adul i Pakistan i le aso Lua na te'a nei. O lenei fa'alavelave na tula'i mai i le taimi tonu lava na fa'alauiloa ai e le vaega fa'atupu fa'alavelave i Suria, le ISIS sa latou talosaga i tagata fa'atupu fa'alavelave uma i Sasa'e, ina ia amata loa ona faia sauaga ma fasioti faiaoga mai atunu'u eseese e aofia ai ma Amerika, o lo o latou a'oa'oina tomai eseese i fanau i Sasa'e Tutotonu.

O se ata sa pu'eina i se masini pu'eata i totonu o le faleoloa tele lea, na molimauina ai le aga'i atu o le tagata ma se a'upega i lona lima i totonu o le fale, ma ia osofaia loa le tama'ita'i faiaoga ina ua fa'atoa ulufafo mai o ia i le fale taele o tama'ita'i, pe tusa o le 3 minute talu ona tuana'i le fa'alavelave ae taunu'u loa leoleo, peita'i e taunu'u atu i latou ua tuai, ua siliga tali i seu se lavea'i mo lenei tina faiaoga mai Amerika.

SEFE E SE TA'IFAU LE SOIFUA O LONA MATAI

ATLANTA - Sa fa'asao e se ta'ifau ua uma ona a'oa'oina lelei le soifua o lona matai tama'ita'i ma lana pepe sa i totonu o le ta'avale, ina ua tafana atu e se tagata sa fa'aa'upegaina ni pulufana i totonu o le ta'avale. I ripoti mai leoleo na taua ai e fa'apea, e fetaui le taunu'u o le ta'avale a le tina ma lana pepe fa'apea ai ma le la ta'ifau i le nofoaga na tula'i mai ai le fa'alavelave, ae tula'i mai loa ma le fa'alavelave ina ua tafana e le tagata leaga lenei le isi ali'i sa i totonu o le isi ta'avale, peita'i o ni isi o nei pulu fana na se aga'i i le ta'avale sa i ai le tina ma lana pepe, ae na vave le oso atu i fafo o le ta'ifau ma pupuni lona matai ma lana pepe, ma manu'a ai lona tino i pulufana e lua ma mate ai.

$27,000 TOGAFITI AI LE TA'IFAU NA MAUA EBOLA

DALLAS - E $27,000 le tupe na fa'aalu e se tama'i aai i Dallas e togafiti ai le ta'ifau a se tama'ita'i na a'afia i le gasegase o le Ebola, ina ua masalomia o lo o a'afia fo'i le ta'ifau latou i le gasegase o le Ebola. E 21 aso na taofia ai le ta'ifau lea i le falema'i o manu. O le tama'ita'i foma'i ia Nina Pham, o se tasi lea o tama'ita'i foma'i Amerika na maua mai i le siama o le Ebola ao galue ai i totonu o Aferika.

MANUMALO SE FAFINE I LE POWER BALL 90 MILIONA

            KANATA - Na faateia se tina e toa 4 lana fanau ina ua faailoa atu e le Ofisa autu o le taaloga o le Power Ball i Kanata, o lana pepa lea ua manumalo i le faailoga tupe e 90 miliona, o le ulua’i taimi foi lea ua manumalo ai se tasi i se faailoga maualuga faapea. Na taua e le tina i le ofisa o le taaloga e faapea, e lei i ai sona mafaufau e manumalo lana pepa i le taaloga, ae ua silia i le 5 tausaga o taalo pea i lenei taaloga, ao lea faatoa manumalo ai. Sa ia faafetaia si ana fanau i le fesoasoani malosi ia te ia i le tele o taimi pe a taalo, i le o lea i le faleoloa ma aumai pepa o le taaloga na te faatumuina. Sa ia taua e faapea, e le o iloa pe o le a faapefea ona faaaoga lenei tupe tele, pau le mea mautinoa, o se vaega o lenei tupe e faaaoga i manaoga o le aiga.

fa'aliliu: S.A.F