Ads by Google Ads by Google

Tala o Faamasinoga

TALIA LE TALOSAGA A POLONE SAVEA

Ua talia nei e le Faamasinoga Maualuga le talosaga na faaulu e le loia a Polone Savea, mo se avanoa e tatala ai o ia i tua ao faatalitali ai taualumaga o lana mataupu ua i luma nei o le faamasinoga.

I se faaiuga na sainia e le alii Faamasino Sili ia Michael Kruse, ma alii faamasino lagolago ia Logoai Siaki ma Faamausili Pomele, ua latou talia ai le talosaga a Savea, i le maea ai lea ona tuuina atu e le ua molia o taavale e tolu e tusa lo latou tauaofai ma le $40,625 e faamau ai le tatalaina o ia i tua.

IOE LORENZO VAIMAGALO NA SOLA I TUA MA LE TOESE I TAFUNA

O le Aso Faraile o le vaiaso fou lea ua faamoemoe e lau ai le faasalaga a le alii o Lorenzo Vaimagalo i luma o le Faamasinoga Maualuga, ina ua talia e le faamasinoga lana tali ioe i le moliaga o le sola ese mai le toese e pei ona tuuaia ai o ia e le malo.

E 12 tausaga le umi o le faasalaga faafalepuipui a Vaimagalo o lo o tuli i le taimi nei, e mafua mai i ni solitulafono na tausala ai o ia e le faamasinoga i ni tausaga ua mavae.

O le moliaga lea ua tausala ai Vaimagalo, e mafai ona faafalepuipui ai o ia i le toese mo le umi e le silia i le 5 tausaga, pe faasala foi i se salatupe e $5,000, poo le faasala foi i faasalaga uma ia e lua.

MANAOMIA LE FAIA O SE SUESUEGA I LE MAFAUFAU O SE ALII MOLIA I LE FAIAIGA MA SE TEINEITITI 12 TAUSAGA

O le alii lea ua tausala i lona faiaiga i se teineititi e 12 tausaga le matua, ua toe tolopo le lauina o lona faasalaga i le masina fou, sei faatali le foma’i lea o lo o fuafua e faia se suesuega i lona mafaufau o lo o malaga i fafo.

O le vaiaso na tea nei na faatulaga e lau ai le faasalaga o Lemisio John Taetuli.  O le tamaitai fomai ia Dr. Asuega lea o lo o fuafua e faia le suesuega i le mafaufau o Taetuli, o lo o faamoemoe e toe taliu mai i le atunuu i le afiafi nanei ma ua toe tolopo ai le lauina o le faasalaga a le ua molia i le masina.

SAUNI LE ALII MAI FILIPAINA E TALI IOE I TUUAIGA MALO

O le alii mai Filipaina lea o lo o tuuaia i lona faia o ni uiga mataga i se tamaitai i le 2011, ua sauni e tali ioe i tuuaiga a le malo faasaga ia te ia, i le maea ai ona ia talia o le ofa ua tuu atu e le malo ia te ia.

I le tolopo soo ai o le mataupu a le alii o Victor Liwan i le tele o taimi talu ona taunuu i luma o le faamasinoga maualuga lana mataupu, o le aso Faraile na tea nei na faailoa ai e le loia a le ua molia o Ruth Risch-Fuatagavi e faapea, ua maea ona tuu atu e le malo sa latou ofa e faamuta ai lenei mataupu, ma ua sauni le ua molia e tali ioe i le ofa ua tuu atu e le malo.

O le vaiaso fou lea ua faamoemoe e tolaulau ai i luma o le faamasinoga le tali ioe a le ua molia, ma o lo o taofia pea o ia i le toese i le taimi nei e faatali ai le taimi e toe tulai ai i luma o le faamasinoga.