SUESUEINA LE MALIU O SE TINA MAITAGA MA LANA PEPE

O lo o suesueina nei e le pulega o le Matagaluega o le Soifua Maloloina ma le maota gasegase i Motootua le maliu ai o se tina maitaga ma lana pepe e lei fanau. O lea mataupu na laga e le alii faipule o le itumalo Alataua i Sisifo, le afioga Lafaialii Patrick Leiataualesa i taualumaga a le Palemene i le aso Lulu na sei mavae atu nei.

Na saunoa le alii gfaipule, o lea tina e mai lona itumalo ma sa tili atu o ia i le falemai ona ua tulaga faaletonu lona maitaga. Sa talosagaina foi e lona aiga le auina atu o ia i Niu Sila mo togafitiga. Peitai, e leai se gaioiga na faia i ai e le pulega o le falemai. Na faauilavea le Minisita o le Soifua Maloloina, le afioga Tuitama Dr. Talalelei Tuitama ma ia faamalamalama le tulaga na faaletonu i le maitaga o lea tina. Fai mai a ia, na mafua le faaletonu o le maitaga o lea tina, ona ua le lava ia vaega o lo o i totonu o le toto o le tagata soifua e mafai ai e le toto ona malo ma taofia ai le alu o le palapala.

Na saunoa le alii minisita, e le tatau ona faia ni tuuaiga ae lei maea ia suesuega a lana matagaluega i lea faalavelave.

TOALIMA PULEAOGA UA FAATE’A i LE FAAAOGA SESE O TUPE

E toalima ni puleaoga ua faate’a mai a latou galuega ona o le faaaoga sese o tupe a le Ofisa o Aoga sa faaagaaga mo le polokalama lea ua aooga fua ai alo ma fanau i aoga tulaga lua. i se faatalanoaga ma le ofisa sili o pulega o le Matagaluega o Aoga, Taaloga ma Aganuu, le susuga Matafeo Falanaipupu Tanielu Aiafi, na ia faaalia ai le matua le taliaina e le matagaluega o le faaaoga seseina o tupe ua faaagaaga mo aoaoga a le fanau.

“E matua le talia lava le faaaogaina o ia tupe e tusa po o le sene e tasi,” o le saunoaga lea a Matafeo. Fai mai a ia, ua maua i a latou suesuega ua faaaoga e nisi o ia puleaoga ia tupe o le polokalama i faalavelave a a latou aiga ma nisi mafuaaga e pei o le totogi ai o togafitiga tau le soifua maloloina o a latou fanau.

E lei faailoaina mai e Matafeo po o ai ia puleaoga ua faate’a, ae na ia faaalia, ua tuuina atu nei ia mataupu i leoleo mo le suesueina faasolitulafono. Na ia faamanino foi, ua le toe talia i latou ua faate’a i ni galuega faafaiaoga i totonu o aoga a le malo.

FAAMATALA E LE MINISITA LAGOLAGO O TUPE LE MAFUAAGA NA FAAMAVAE AI

O taualumaga a le Palemene i le aso Lulu na faamatala ai e le alii faipule o le itumalo Faasaleleaga Numera 4, le afioga Peseta Vaifou Tevaga le mafuaaga na faamavae ai mai lona tofiga Minisita Lagolago o Tupe. Na tuuaia e Peseta ia le vaega faaupufai o le Tautua Samoa i lo latou faia o tuuaiga le sa’o na mafua ai ona ia faamavae, ae na te lei faailoaina po o a ia tuuaiga.

Peitai na ia faaalia, ua siitia nei o ia i le tofiga o le Minisita Lagolago o le Matagaluega a le Palemia. “O lea ua siitia nei au i le Matagaluega a le Palemia,” o a Peseta lea. “O lona uiga o taimi uma lava e tuua ai e le palemia le atunuu, ona tou o atu lea i lou ofisa e vaai au aua o le a ou suia le palemia!” Na saunoa Peseta e uiga i lona faamavae mai lona tofi Minisita Lagolago o Tupe ina ua fesiligia e le faipule o le itumalo Gagaemauga Numera 2, le tofa Levaopolo Talatonu Vaai. Na fesili Levao ia Peseta pe aisea na kiki ai o ia i fafo mai le Matagaluega o Tupe, pe ona sa ia sainia le talosaga ina ia faamalolo le Minisita o Tupe, le afioga Faumuina Tiatia Liuga.

Sa faapea loa ona tuuaia e Peseta le Tautau Samoa i lo latou faia o tuuaiga le moni ua mafua ai lona faamavae mai lea tofiga. Peitai na saunoa le taitai o le Tautua Samoa, le afioga Palusalue Faapo ii, e le o i latou na mafua ai ona ia faamavae, ae o sui e toa 19 o le HRPP ia sa saini o latou suafa ina ia faamalolo le Minisita o Tupe.

FAAMAONIA MOLIAGA O JUNIOR PATAU

Ua faamaonia i luma o le Faamasinoga Maualuga ia moliaga o le umia o fualaau faasaina o le aisa faasaga i le alii o Junior Patau, o se sa faigaluega muamua i le Vaega Fa’aasu (Quarantine) o le Ofisa o Tiute. O le maea ai ona tuuina atu o folasaga faaiu a itu e lua, lea o lo o tulai ai le ofisa o le Loia Sili mo le itu a leoleo, ae o le afioga ia Toleafoa Solomona Toailoa o lo o tulai mo le ua molia, sa faailoa ai loa ma le faaiuga ua autasi i ai faatonu o le Faamasinoga.

O lea faaiuga ua faamaonia ai moliaga o le umia o fualaau faasaina faasaga ia Junior Patau. Ua tolopoina nei le faamasinoga i le aso 19 o iulai mo le lauina o le faasalaga a le ua molia. Ua talia foi e le Famasinoga Maualuga le talosaga a le ua molia, ina ia tatala i tua le ua molia e faatali ai le lauina o lona iuga. Sa umi o finauina lea talosaga peitai, na talia e le itu a leoleo i le maea ai ona soalaupule o nisi o tulaga faaletulafono e ao ona usitaia e le ua molia.

E pei ona lipotia muamua i a tatou tala, o moliaga faasaga ia Junior Patau ua faamaonia nei, na mafua mai i le ina ua oo atu o ia i le malae vaalele i Faleolo e aveese mai sana atopau na auina mai Niu Sila i le aso 15 o Tesema o le tausaga na tea nei. Na suesueina e sui o le Ofisa o Tiute lea atopau ma maua ai le fualaau faasaina o le aisa o afifi i totonu o ni lavalava. Na molimau alii na sueina lea atopau e faapea, sa ioe atu le ua molia o ia e ana ia fualaau faasaina.

Lilomaiava Andrew Fa’asau, Naenae Productions