POPOLE LE SOIFUA MALOLOINA I LE EBOLA

Ua faaalia e le faatonu aoao o le Matagaluega o le Soifua Maloloina i le ono oo mai o le faama’i oti o le Ebola i Samoa i le vaitaimi o Taaloga a Tupulaga Talavou a atunuu o le Taupulega a Peretania, ona o le a aofia ai sui mai nisi o atunuu mai le konetineta o Aferika, lea o lo o aofia ai i le Taupulega a Peretania Tele. Na faaalia e le afioga Leausa Toleafoa Dr. Take Naseri, o le a matua mama le avega i mafaufau o le aufaigaluega a lana matagaluega pe afai e le auai mai sui mai atunuu Aferika ua maua ai le vairasi o lenei faama’i e pei o Sierra Leone. Fai mai a ia, ua sauniuni le latou matagaluega e faatino tautua moomia tau le soifua maloloina pe a amata ia taaloga i le masina fou. Peitai, o le ono oo mai o le vairasi o le Ebola ona o le auai mai o sui mai atunuu Aferika, ua faaopopoina ai le tulaga nofo sauni o lana aufaigaluega. Na faaalia e Leausa, afai ae oo ona auai mai sui mai ia atunuu, e moomia ona auina mai faamaumauga o suesuega faalesoifua maloloina aupito i lata mai ina ia faamaonia ai le le aafia o ni o latou sui e auai mai i lea faama’i. “E faia foi isi taaloga faapea i le lumanai,” o a Leusa lea, “pe afai o latou mafaufau e toe taofi a latou au taalo mai le auai mai. O le faataua o le soifua maloloina lea matou te taumafai e momoli atu i atunuu o le a auai mai.”

FAIA LE NUSIPEPA A LE TAUTUA SAMOA

O le faaiuga o le vaiaso na te’a nei na faalauiloa aloaia ai le nusipepa a le vaega faaupufai o le Tautua Samoa, ua faaigoaina o le Tautua Lelei. O lea taumafaiga a le Tautua Samoa o se vaega o a latou tapenaga mo le faiga palota lautele a le atunuu i le tausaga fou. O le nusipepa o le Tautua Lelei e faatasi i le masina ana lomiga ma na faaalia e le taitai o le Itu Agai, le afioga Palusalue Faapo II, o le a faalauiloa atu i lomiga a lea nusipepa ia fuafuaga a le latou vaega, o a latou tapenaga mo le faiga palota lautele, o le menifeso a le latou vaega, ma galuega a sui taitasi o le latou vaega i o latou itumalo. O le a faalauiloa ai foi suafa o o latou sui tauva o le a tauva i le faiga palota i le tausaga fou. E le gata i lea, o le a lomia foi ai lauga a sui o le Tautua Samoa i taualumaga o le Palemene, o mataupu e soalaupuleina i le Maota e pei ona lipotia e le au tusitala. O le nusipepa o le Tautua Lelei o le a i lalo o le vaavaaiga a le faatonu aoao, le afioga Le Tagaloa Dr. Pita Alailima, o se tamalii sa avea ma sui faipule o le Palemene. O le faatonu o le afioga Vui Seigafolava Masinamua, o le faatonu o le gagana Peretania o le susuga Leatigaga Lise Taeoalii Aiono, ma le faatonu o le gagana Samoa o le susuga Fiso Taranaki Faamatuainu Tala Mailei. E tufa fua lea nusipepa.

TATALA LE “FASITEPU MINOI” MUAMUA I SAMOA

O le aso Faraile na te’a nei na tatala aloaia ai le fasitepu minoi po o le escalator muamua i totonu o le atunuu. O lenei ituaiga fasitepu e faaaogaina i atunuu i fafo e te le tau savali ai i luga po o lalo, ae minoi lava le fasitepu ma ave oe. O lea ituaiga fasitepu muamua i Samoa o lo o sosoo ai le fogafale alalo ma le fogafale aluga o le kamupani o le Bluebird Hardware i Vaitele, ma o se laasaga tele lea mo le kamupani lea na amata mai i le fa’atauina o ana oloa laupapa i lalo o se mago i le 29 tausaga ua tuanai. O lea tulaga na pa’i i ai le saunoaga a le alii pule o le kamupani, le susuga Tuiaopo Andrew Ah Liki, i le sauniga fa’apitoa sa faia i le tatalaina aloaia o lea mea totino a le kamupani aua le mamalu o le atunuu faatau. Na faaalia e Tuiaopo, e le gata i lea fasitepu, a ua fa’aopopoina foi tautua ua mafai ona ofo atu e le latou kamupani mo le atunuu lautele. Na ia fa’afetaia le fesoasoani a le malo, o ana uo ma lona aiga, o isi au faipisinisi i Samoa ma atunuu i fafo, aemaise le au failotu faapea le atunuu faatau, ua mafua ai ona ola le latou kamupani.

MALIU SE TAMA 80 TAUSAGA SA TAFAO I LE CASINO

E 80 tausaga o se tama mai Ululoloa e alala i Niu Sila, na maua atu ua maliu i totonu o lana taavale ina ua uma sana tafaoga sa faia i le casino o lo o i le faletalimalo o Aggie Grey’s Resort i Mulifanua, i le po o le aso Faraile na te’a nei. Na faaalia e le sui sooupu o le Matagaluega o Leoleo, le susuga Su’a Muliaga Tiumalu e faapea, o le pe a ma le ta o le tasi i le vaveao na tuua ai e lea tama le casino ma agai atu ai loa i lana taavale i le auala tele. Peitai, na oso faafuasei lona ma’i fatu ma maliu ai lava o ia i totonu o le taavale ae lei tuua le lotoa o le faletalimalo. Na ia faaalia, na maua atu e le aufaigaluega a le faletalimalo ua manava o tu mai le taavale i talaane o le auala, ma sa o atu loa i ai e fesiligia pe moomia se fesoasoani. Peitai, ua maliu lava o ia. Sa faapea ona logoina loa le Ofisa o Leoleo i Faleolo ma sa auina atu ai loa o ia i le falemai i Leulumoega. Na saunoa Su’a, ua faamaonia e le afafine o le ua maliu e faapea, o lona tama e faaletonu lona fatu ma e le taumate o le mafuaaga lea o lona maliu.