FAATUPE E IAPANI LE FALEAOGA O SALELOLOGA

O le faaiuga o le vaiaso ua te’a na tatala aloaia ai le faleaoga o le aoga tulaga lua a le afioaga o Salelologa ina ua maea le galuega o le toe faafouina o le faleaoga a le afioaga. O le tele o vaega o lenei galuega sa faatupeina e le malo o Iapani lea e tusa ma le $228,162 lona tau aofai, e tauala atu i lalo o fesoasoani a Iapani ua taua o le Grassroots Human Security Project. I lea sauniga na toe fa’ailoa ai e le amepasa o Iapani i Samoa le susuga a Tuimaugaoalii Kazumasa Shibuta, le lagolago a Iapani ia Samoa e ala i atinae mo galuega atinae e mana’omia e le atunuu. Fai mai a ia, o le a fa’aauau pea le lagolago a Iapani i atinae o tulaga tau aoaoga i Samoa. E tusa ma le valu potu aoga ua maea toe faafouina, e aofia ai ma le potu tusi faapea ma le potu mo faiaoga.

ASIASI MAI ALO O SAMOA I LE NFL

O le faaiuga o le vaiaso na toe taunuu ai i laufanua o Samoa sui o le Faalapotopotoga Liki Lakapi Faa-Amerika, le National Football League (NFL). O le a asia e lenei faigamalaga nisi o aoga, ma fa’atautaia ai ni a latou polakalame faaleaoaoga i aoga ua filifilia, ma o le a maua ai foi ma le avanoa e asia ai aoga uma i le atunuu, ma faailoa atu i ai  tulaga uma ua mafua ai ona o latou taunuu i le tulaga ua i ai nei o ni fetu pupula o le taaloga. O le alii o Paul Soliai, Isaako Aaitui, Olivier Vernon, Koa Misi ma Samson Satele o lo o fai ma sui o le NFL i lenei asiasiga. O le autu o ia asiasiga o le faia ia o ni polakalame fa’alauiloa aemaise lava i aoga mo le uunaia o le taua o le malosi o le tino e ala i koleniga, taumafa i meaai paleni, ina ia tetee atu ai i le tino puta ma faamai le pipisi. Ua mafai ona faatino le malaga asiasi mai a nei sui o le NFL i le atunuu, ona o se faiga paaga i le va o le Paul Soliai Foundation, le ofisa o le amepasa o Amerika, faatasi ai ma le Matagaluega o Aoga, Taaloga ma Aganuu. O le aso Faraile ua te’a na amata faagasolo ai polakalame a lenei aumalaga i totonu o le atunuu seia aulia le aso 6 o Mati.

MANANAO LE SCOPA E FAATAUTAI LE KOLISI O SAMOA

Ua talia nei se fonotaga a le Faalapotopotoga o Tama ma Teina Tuai o le Kolisi o Samoa, le SCOPA e talanoaina ai se finagalo na laga e le Matagaluega o Aoga, Taaloga ma Aganuu aua le galulue faatasi ai ma lenei asosi i le vaaiga o le Kolisi o Samoa. E ese mai i le tele o aoga i totonu o Samoa, o le Kolisi o Samoa ma le Kolisi o Avele, ua faatautaia tasi lava e le malo sei vagana ai ana asosi o matua ma faiaoga le PTA, ae o lea ua talanoaina nei le tulai mai o ni sui o asosi o tama ma teine tuai o ia kolisi ina ia tauave matafaioi ia e tauave e komiti a aoga. O le fia fesoasoani i le aoga ina ia mautinoa e faaauau i tausaga o lumanai na ta’ua e le Peresetene o le SCOPA, ua ioe ai e tofia se komiti mai i le asosi ina ia pulea le faatamoega o le aoga e ui o le a faatupe lava e le malo ia totogi o faiaoga, ma isi manaoga e masani ai. O le sao o le komiti a le SCOPA o le a tofia, o le a agai i latou e saili seleni mo le mautinoa e faaauau le tausiga o le nofoaga ina ia lelei mo aoaoga a le fanau.

IOE I MOLIAGA O LE GAOI

E 16 moliaga o le gaoi ua ioe e le tamaitai sa faauluulu i ai le vaega o tupe a le aoga mo i latou e i ai manaoga faapitoa i Lalovaea, le SENESE, i le Faamasinoga Maualuga i le aso Lulu o le vaiaso ua te’a. O lo o molia le tamaitai o Francine Chadwick, i lona talaina lea o le tinoitupe e $4,729 mai le teugatupe a le SENESE i le faletupe e aunoa ma se faatagaga. O lea solitulafono na tulai mai i le 2013. Na talosaga le loia sa tulai mo le ua molia mo se faasalaga mama ma ia faaalia, ua uma ona toe totogi le aofaiga atoa na aveesea ma ua maea foi ona faatoese le ua molia i le pule ma le faatonu sili o le SENESE. O Chadwick e 25 ona tausaga ma o lo o ia umiaina le faailoga tikeri o le Bachelor of Commerce mai le Iunivesete Aoao o Samoa. Na toe tolopo e le afioga Faamasino Sili Patu Tiavaasu’e Falefatu Sapolu lea mataupu i le aso Tofi o le vaiaso lenei ao talia le lipoti tusitusia a le Faamasinoga.