FALEPUIPUI LE ALII AMIO VALEA

E 25 tausaga o se alii  ua faasalaina i le 12 masina i le falepuipui ina ua faamaonia lona moliaga o le faaoolima mataga, i se tina ao momoe ma lana fanau. Na faaalia i faamaumauga a le Faamasinoga e faapea, sa inu pia le ua molia ma le toalua o le na aafia i lona fale lea e tuaoi lava ma le fale o le na aafia.

Ao faagasolo pea le la inuga pia, sa alu ese le ua molia ma alu sa’o lava i le fale a le na aafia ma ia taumafai ai loa e fai ni uiga mataga faafeusuaiga i le tina na aafia. Na saunoa le tamaitai faamasino o Mata Tuatagaloa, sa tatau ona molia o ia i le faiaiga faamalosi aua sa moetolo o ia ma le faamoemoe e faiaiga faamalosi i le na aafia.

Na faatoese le ua molia ma ia faaalia, o lona ona tele na ia faia ai lea tulaga. Peitai na saunoa Tuatagaloa, e le tatau ona ia tuuaia le ava malosi i lana gaioiga sa fai. O le faasalaga a le alii ua molia, ua auina atu ai se feau i le atunuu lautele aemaise alii, e le ‘alo le Faamasinoga mai le auina atu o i latou e faia lea tulaga i tamaitai faapea le fanau, i le falepuipui.

“Ua tatau ona taofia le sauaina o tina ma le fanau,” o le saunoaga lea a Faamasino Tuatagaloa. “Afai e fesoasoani le faasalaina o i latou e faia nei ituaiga solitulafono i le falepuipui, i le taofia o lea faafitauli, o le tulaga lena o le a faia e le Faamasinoga.”

PULE I LE OLA INA UA FAAUMA LE MAFUTAGA

Na pule i lona soifua e ala i lona inuina o le vailaau fanavao, se tamaitai e 25 tausaga le matua e faigaluega i le Matagaluega o Fuainumera Faamauina, ina ua faauma e lana manamea le la faigauo. O lea tulaga na faamaonia mai e le komesina le tumau o leoleo, le afioga Fauono Talalelei Tapu i se feiloaiga ma le au tusitala i le faaiuga o le vaiaso na te’a nei ma na ia faaalia, o lo o faaauau pea suesuega a leoleo i le mafuaga na ia faia ai lea tulaga.

Peitai na faaalia e se sosia mai le afioaga o lea tamaitai e faapea, o le ua maliu sa aoga i le Iunivesete o le Pasefika i Fiti ma faatoa foi mai o ia. Ae sa fuafua le la faaipoipoga ma lana manamea, o se alii mai se isi atunuu o le Pasefika. Peitai na fesootai mai lea alii ma ia faauma le la faigauo ma sa mafatia ai lea tamaitai ma iu ai ina ia pule i lona ola e ala i lona inuina o le vailaau fanavao. Na saunoa Fauono, ua atoa ai le to’afa o i latou ua pule i o latou soifua i lenei tausaga.

FOAI LE AU PEPESE I LE TV KATOLIKO

Ua faamanuiaina le TV a le Ekalesia Katoliko i Samoa, le Upu Mana Television, i le tinoitupe na maua mai le koneseti o pesepesega opera po o le Opera Under the Stars lea sa faataunuuina i le vaiaso na te’a nei i le nofoaga o le St. Therese i Leauvaa. O lea koneseti sa faafiafia ai nisi o alo pepese a Samoa ma isi atunuu o le Pasefika e alala ma papa aao i atunuu i fafo e pei o Niu Sila ma Ausetalia, lea e aofia ai Daphne Collins, Isabella Moore, Taunoa Filimoehala, Juan Kim, Benson Wilson ma Derek Wendt.

E $45,000 na tauaao atu e le taitaifono o le komiti faafoe o lea koneseti, le susuga Faleomavaega Vincent Fepuleai i le afioga Moseniolo Etuale Etuale. Na faafetaia e le afioga Moseniolo le komiti faafoe faapea i latou sa pepese mo lea foai ma na ia faaalia, o le tele se fesoasoani i le faaleleia o le auaunaga a le Fale TV a le ekalesia aua le faasalalauina o le Upu i tagata Katoliko uma i Samoa. Fai mai a ia, o le taimi nei na o le tasi le mea pueata a le Fale TV ma o le a mafai nei ona faatau se isi mea pueata e faaleleia atili ai a latou galuega.

FAAMAONIA LE GAOI POVI

O le fasi mate o ni manu papalagi se lua ma ave e fua e maua ai se tupe, ua faamaonia e le Faamasinoga o se gaioiga e fesootai ma le solitulafono o le lima tago’ese i meatotino a se i si tagata. O le moliaga lea na tete’e i ai se tasi o tamalii sa tuli sona faasalaga faafalepuipui i se i si solitulafono ma ua magalo, ae o lea ua toe faamaonia le i si moliaga fou e faasino i manu papalagi a se i si tagata na ia fasi mate ma ave faatau.

O le afioga Le Mamea Emosi Puni sa ia teena lea solitulafono ae o le faaiuga o suesuega a le Faamasinoga i molimau a leoleo ua faamaonia ai le solitulafono na faia e lea tamaliii, o se tasi sa tuli lona faasalaga faafalepuipui i le moliaga o le faaoolima mataga. O Fepuari o le tausaga nei i Pu’apu’a i Savaii na tulai mai ai lenei mataupu e pei ona faaalia i faamaumauga a le Faamasinoga. O se povi pulu e tusa lona tau ma le tasi le afe lua selau tala, ma se povi ta’anoa e $600 tala lona tau na aafia i le solitulafono.

O se tama e fai lana lafumanu papalagi na aafia ana povi i le gaioiga lea na ia faaulu ai se tagi i le ofisa o leoleo i Tuasivi. Peitai o molimau a leoleo na suesueina na maua ai le faai’uga, o povi na aafia o meatotinno a Siaosi Apelu. O le aso 25 o le masina nei e lauina ai se iuga o Le Mamaea Emosi Puni.

SUSUNU LE FU’A O SAMOA

Ua faaleaoga e Faamasino Mata Tuatagaloa o le Faamasinoga Faaitumalo le moliaga o le faaleaga o meatotino a le malo na faaulu e leoleo faasaga i se alii mai Mulivai, Safata sa ia tuu i lalo le tagavai o le saolotoga i luma o le maota o le malo i Matagialalua, ma ia susunuinaa i. O lea tulaga na tulai mai i le aso 11 o Aperila, 2012. Na toe talosaga leoleo ina ia faaui i tua le moliaga ina ua faamaonia e se fomai o le mafaufau, e faaletonu le mafaufau o lea alii.

Na faaalia i faamaumauga a le Faamasinoga e faapea, e faatele ona talosaga le na molia e fia maua se avanoa e vaai ai le alii palemia, ae lei manuia ia talosaga. O lea sa ia toatamai ai loa ma ia tuuina i lalo le tagavai a le atunuu ma ia susunuina ai i luma lava o le maota o le malo i Matagialalua.

Saunia: Lilomaiava Andrew Fa’asau, Naenae Productions