PALUSALUE: “E FIA AO O LE MALO LE PALEMIA”

E le i afeiina saunoaga a le taitai o le vaega faaupufai o le Tautua Samoa, le afioga Palusalue Faapo II, i le mataupu e faatatau i le filifilia o le ao o le malo Samoa. I le feiloaiga a le Tautua Samoa ma le au tusitala i le aso Lulu na sei mavae atu nei, na saunoa ai Palusalue i le le talafeagai o le suiga o le Faavae e pei ona faatuina e le alii palemia, le susuga Tuilaepa Sailele Malielegaoi, lea e faatuina ai ma pasia e le vaega faaupufai o lo o taitaia le malo le suafa o se e avea ma ao o le malo.

“O se tulaga le talafeagai tele lea ituaiga faiga,” o le finau lea a Palusalue. “Ua le mamalu ai le tulaga o le faaao o lo tatou malo. Faapefea na filifilia ma pasia e le vaega faaupufai o lo o taitaia le malo o lo o nonofo atu le Palemene, o sui o itumalo uma o le atunuu?” Na saunoa le afioga i le alii faipule o Safata, o le tulaga aupito i le fetaui o lenei mataupu, e lei soalaupuleina e le Kapeneta po o le faafaletui o le HRPP, ae ua faatu lava ma tuuina atu e le alii palemia.

“A ou faauigaina le tulaga ua fai e le alii palemia, e foliga mai e fia ao o le malo le alii palemia!” o a Palusalue lea. Na lagolagoina e le alii faipule ia Afualo Wood Salele ia atugaluga o le latou taitai ma ia faaalia, o Samoa o le atunuu ua uma ona tofi. “Afai e i ai ni manatu faapea o le alii palemia, ia na ona ou alofa lava aua o tofi o Samoa e mamalu toe mamala,” o le lagolago lea a Afualo.

E TATAU ONA TUTOATASI LE FOFOGA FETALAI

O le fofoga fetalai e le gata ina ia vaaia e tutoatasi, ae tatau foi ona ia tutu mamao mai le aafia i ni faiga faapolokiki a vaega faaupufai ua vaevaeina i ai sui o le Palemene. O le manatu faaalia lea o le alii faipule sa avea muamua ma fofoga fetalai, le afioga A’eau Peniamina Leavaise’eta, ina ua faatuina e le vaega faaupufai o lo o taitaia le malo, le HRPP, se suiga i le Faavae e faatatau i le filifilia o le fofoga fetalai. Afai ae pasia ma avea ma tulafono lea suiga, o le a filifilia e le vaega faaupufai o lo o taitaia le malo le fofoga fetalai ma le sui fofoga fetalai, ae le palotaina e le Palemene atoa. I se feiloaiga ma le au tusitala, na faaalia ai le tetee malosi o sui o le Tautua Samoa i lea suiga tau faatu ma na saunoa le taitai, le afioga Palusalue Faapo II, afai ae pasia lea suiga o le Faavae, o le a leai se tutoatasi o le fofoga fetalai. Na ia taua foi le masani a le alii palemia i le taimi o malologa o tauaofiaga a le Palemene, lea e talanoa ai ma le fofoga fetalai i le ofisa o le fofoga fetalai.

“E matua le talafeagai lava lea tulaga ona na o le pau lea o le taimi e maua ai se avanoa o sui a faipule aemaise o le matou vaega, e talatalanoa ai ma le fofoga fetalai e uiga i mataupu o le fono,” o a Palusalue lea. “Ae ua le mafai lea tulaga ona e alu uma le taimi o le fofoga fetalai i a la talanoaga ma le palemia.” Na lagolagoina e le alii faipule ia Afualo lea manatu ma sa ia faaalia, e maualuga atu le malosiaga o le fofoga fetalai i totonu o le maota fono, ma e ono aveesea lea tulaga pe a pasia le suiga ua faatuina e le malo. Fai ma a ia, ua tatau ona filifilia e le atunuu lautele le fofoga fetalai.

FAAE’E O LE SUAFA GATOAITELE

Ua tuuina mai le poloaiga aloaia mai le Faamasinoga o Fanua ma Suafa e faatatau i le faafotutupu o le afioga Savea Sano Malifa i le suafa Gatoaitele i le vaiaso na te’a nei. Na faaalia i lea poloaiga e faapea, e solitulafono le faaaogaina o lea suafa e faalagilagi ai ma faasuafaina ai Savea i totonu o le afioaga o Afega, i so’o se faatasiga a le ekalesiao lo o tapuai ai o ia, po o so o se nofoaga lava seiloga e resitalaina faaletulafono.

O le vaiaso ua tuanai na faaulu ai se faasea a le afioaga o Afega i le Faamasinoga ina ua logotala o lo o fuafua le aiga o Savea e faae’e le suafa papa o Gatoaitele ia Savea. Na faaalia foi e le fono a tamalii ma failauga o Afega i se faatalanoaga na faasalalauina i le televise, lo latou tetee i lea fuafuaga ma sa solitu le afioaga ma le itumalo mai le auai i le sauniga o le faafotutupu o Savea i le suafa Gatoaitele. O lea feeseeseaiga ua faaauau ai le le autasi o finagalo o le nafioaga ma Savea ma lona aiga i le tele o mataupu lea ua vaeluaina ai le afioaga.

TATUI SE TAMAITAI I SE AGAESE

E 27 tausaga o se tamaitai o lo o tauivi ma le oti i le falemai i Motootua ona o le tuga o ona manua mai se agaese i se faalavelave na tulai ma i le vaveao o le aso Toonai na te’a nei. Na faaalia e nisi sa mauaina lea tamaitai, e laki o le ola o ia ona o le tuga ma le tele o ona manua sa tatui ai lona tino ma ona foliga e se tagata.

Na maua atu lea tamaitai ua leai ni ona lavalava ma o lo o auau’e’e i talaane o le aualatele i Togafu’afu’a, ma ua lavatoto uma ona foliga ma lona tino. Ua taofia nei e leoleo se alii e 24 tausaga mai Togafu’afu’a ma Vaimea o lo o masalomia i lona faia o lea tulaga le alofa, ma o le aso 21 o Iulai o lo o faatulagaina e tulai ai o ia i luma o le Faamasinoga.

Lilomaiava Andrew Fa’asau, Naenae Productions