POPOLE LE TAUTUA SAMOA I LE TULAGA UA I AI LE PALEMIA

Ua faaalia e le taitai o le Tautua Samoa ia Palusalua Faapo II lona popole tele, i le tulaga vaaia ua i ai le soifua o le alii Palemia, aemaise lava i lona mafaufau, ona ua avea le tele o mataupu e tulai mai i totonu o lana Vaega Faaupufai ma itu ua vaaia ai suiga o le le mautonu i le alii Palemia.

“E tele ituaiga gasegase e aafia ai le Palemia, e mafua mai ona o le tele o mea e mafaufau i ai,” o le saunoaga lea a Palusalue i se feiloaiga ma Tusitala.

“E faigofie lava le auala e foia ai faafitauli nei, ia usita’i ma tausisi i le ripoti a le Suetusi, ae aua le taumafai e puipui isi sui o lana Vaega Faaupufai,” o le saunoaga lea a Palusalue.

Saunoa le taitai o le Tautua Samoa e faapea, o se tasi o tulaga ua maitauina i le alii Palemia, o lona faia lea o ni faaupuga e faamanu’a ai lagona o isi tagata.

MOLIA SE ALI’I I LE FASIOTI TAGATA

O se ali’i e 43 tausaga mai Ulutogia Aleipata ua taofia nei i lalo o le vaavaaiga a le Ofisa o Leoleo i Tafaigata, ona o tuuaiga i lona fasiotia o ni ali’i se to’alua i le amataga o le vaiaso nei, e ala i lona fa’aaogaina o se agaese.

Na fa’amaonia mai e le Komesina o Leoleo ia Fauono Talelelei Tapu e fa’apea, o le ali’i lea o lo o tuuaia i le fasiotia o alii e toalua ao momoe ua taofia nei e leoleo, e fa’atali ai le aso e tula’i ai i luma o le fa’amasinoga maualuga.

O le fa’alavelave lenei na tula’i mai i Ulutogia i le amataga o le vaiaso nei, ina ua tula’i mai se fa’alavelave matuia, e ala i le fa’aaoga e le ua taofia nei o se agaese e faaoo ai le maliu i ali’i e to’alua ua aafia.

Na taua i se ripoti mai leoleo e faapea, o se feeseeseaiga i tulaga o fanua i le va o le alii ua molia nei ma alii e toalua ua maliliu, i le taimi na o ai i latou nei e tae popo, na tula’i mai ai loa lenei fa’alavelave, ma pe tusa o le itula e 2:00 i le vaveao o le aso na sosoo ai ma le aso na tula’i mai ai le feeseeseaiga i le fanua, na tula’i mai ai loa le fa’alavelave.

O alii e toalua ua maliliu e aofia ai se ali’i e 41 tausaga le matua, ua fa’aipoipo ma ua to’afa nai ona alo, ma le isi ali’i e 27 tausaga le matua, ua fa’aipoipo fo’i ma e to’atasi lona atali’i.

TELE FAATOAGA E LE O LA’UINA I MAKETI I FAFO

Mai ituaiga e 37 o fualaau aina ma fa’atoaga eseese o lo o totoina i Samoa, e na o le 13 ituaiga fua o faaeleeleaga o lo o mafai ona la’u atu ma faatau i maketi i fafo, ae o le isi 24 e le o mafai ona auina atu i ni maketi i fafo.

O lea tulaga na mafai ona alia’e i luga ina ua malaga asiasi mai ni sui se toalua o le Matagaluega o Fefaatauaiga a Niu Sila i Samoa, e aofia ai le susuga a Nacanieli Waqa, ma feiloai ai ma sui o le Ofisa o Faatoaga ma le Matagaluega o Fefaatauaiga a Samoa i se fonotaga sa faia ai.

Na taua e Waqa i se ripoti e faapea, ua oo i le taimi e le toe manaomia ai ona una’i tagata fai faatoaga e toto faatoaga, aua e le o fa’atoaga uma o lo o toto o lo o mafai ona auina atu i fafo i Niu Sila e fa’atau ai.

Na taua e Waqa i se ripoti e faapea, e na o fualaau aina lava e talia ona ulufale atu i Niu Sila e faataga ona la’u atu ma faatau ai, ae o le lisi atoa e 37 o ituaiga o fualaau aina eseese o lo o unaia e Samoa ana tagata fai faatoaga e toto, e le o mea uma ia e talia i Niu Sila, ma o lea ripoti ua faaalia ai le le fiafia o le toatele o tagata fai faatoaga i Samoa.

TOLOPO LE FA’AMASINOGA O LE AVE LOLI

O le alii ave Loli lea na maliu ai se tamaititi e 11 tausaga le matua i le masina o Novema na te’a nei, ua toe tolopo le tolaulauina o lana mataupu i le aso 2 Me, 2014, e faatali ai le taimi e mae’a ai suesuega a Leoleo o lo o fa’agasolo i lenei mataupu.

O le vaiaso nei na tulai ai le alii o Suitupe Lisiti ma ia teena le moliaga o le ave ta’avale fa’atamala ua mafua ai ona oo le maliu i se tagata.

I le taimi o le iloiloga, sa faailoa ai e le alii leoleo sinia o lo o tula’i mo le malo, e le i sauni le malo e fofogaina a latou mau faamaonia i luma o le faamasinoga, ona e le i maea suesuega o lo o faagasolo i le taimi nei.

O le faalavelave lenei na tulai mai i le va o Luatuanuu ma Solosolo, ina ua taia e le faata o le loli sa ave e Lisiti le ulu o le tamaititi na maliu sa faalagolago i le faamalama o le pasi, a’o sii le tamaititi i vae o lona tina i totonu o le pasi.

fa’aliliu: Ausage Fausia