FA’AILOGA TOGISILIA - NUMERA AOGA I A.S.

O le fa’ai’uga o le vaiaso na te’a sa fa’atino ai le tufatufaga o fa’ailoga i le fanau a’oga sa tauva i le Numera i a’oga tulaga muamua (elementary) fa’apea ma a’oga maualuluga i le teritori.

Mai a’oga tulaga muamua  ua fa’ailoa mai ai le ua togisilia e o’o mai i le ua tulaga 4, ae to’a 12 le fanau ua lautogia fa’atasi ai i a latou su’ega sa faia.

O le tulaga muamua na se’ia lea e Gloria Park mai le a’oga Samoa Baptist Academy. Tulaga lua e to’alua: Aitulagi Alofa mai le Manumalo Baptist Academy ma Malachi Semo mai le Ta’iala Academy i Tafeta.

Tulaga tolu  e to’aono i latou ua tulaga tutusa ai: Lilly Papali’i mai le Manumalo Baptist Academy; Akenese Saleutogi mai le Manumalo Baptist Academy; Ariel Timo mai le Leone Midkiff; Denson Javier mai Samoa Baptist Academy; Willie Liu mai le South Pacific Academy ma Mei Da Lin mai le Pacific Horizons.

O e uma na tulaga 4 e to’atolu i latou: Wen hao Hou mai le Pacific Horizons; Catherine Hudson mai le Samoa Baptist Academy; ma Fa’avao Sa’olotoga mai le Pavaiai Elementary.

Mo a’oga maualuluga sa fa’amaumauina ai e ua togi silia i vasega ta’itasi mai a’oga sa tauva o latou sui.

O le Vasega 9 ua togisilia ai Karlinna Sanchez mai Samoana High School, tulaga lua Masaru Hayashi o le South Pacific Academy ma tulaga tolu ai Gayatri Murali mai le SouthPacific Academy.

I le vasega 10 na tulaga muamua Seol Hee Lee mai le South Pacific Academy, tulaga lua Ji Hyun Oh mai le South Pacific Academy ae tulaga tolu Gabrielle Langkilde mai le Fa’asao Malisi High School.

I le vasega 11, e to’alua sui na la’ua mauaina le togisilia, Shikha Sreenivasan mai Tafuna High School ma Seung  Ju Myung o le South Pacific Academy, tulaga lua ai le tama’ita’i o Alice Park mai le South Pacific Academy, ae tulaga tolu ai Ambika Murali mai Leone High School.

I le vasega 12, ua maua ai e Liana Gurr mai Tafuna le fa’ailoga o le togi silia, tulaga lua ai Calvin Wang mai South Pacific Academy ma le tulaga tolu na maua e Samantha Rubin mai le South Pacific Academy.

Pe afai e fa’atulagaina tamaiti i le Maualuga o latou togi na ausia i suega sa latou su’ea i lenei tausaga mo le Numera ua i ai le fa’atulagaga lenei: togisilia Seol Hee Lee mai le South Pacific Academy; e to’alua ua togi tutusa i le tulaga lua: Shikha Sreenivasan mai Tafuna High ma Seung Ju Myung mai le South Pacific Academy; ma le tulaga tolu e tutusa ai fo’i le to’alua: Alice Park ma Ji Hyun Oh - i laua nei mai le South Pacific Academy.

O le tu’ufa’atasia uma o su’ega a i latou na lautogia ua togisilia South Pacific Academy, tulaga lua Tafuna High School, tulaga tolu Pacific Horizons.

TOEITI’ITI MA’EA GALUEGA FALEA’OGA LEATELE

Ua toeiti’iti ona ma’ea lea ona fausia le falea’oga fou a Le’atele Elementary i Fagasa. O lea galuega, o lo’o konekarate i le Nana’s Construction, sa faatulaga e ma’ea i le faaiuga o le tausaga ua te’a.

Peita’i, sa le fa’ataunu’uina , ona o talosagaina fa’aopoopoga i le galuega, e pei ona mana’omia  le malo - o se ala sitepu, ma le fa’amalumaluga o le ala savali, ina ia le timu’ia fanau a’oga e fegasoloa’i i a latou vasega i aso louloua ma timuga.

“O se suiga lelei na talosagaina, ae le mafai ona fa’atino e si a’u kamupani vaivai e aunoa ma le talosagaina o se fa’aopoopoga o le totogi o lea vaega ua mo’omia,” o se tala lea a le tina o Fiapa’ipa’i Tuaolo Fruean e tusa o le tuai ona umusa o le galuega i Le’atele.

Ua i ai le faamoemoe o le masina fou e ma’ea ai le galuega, e faaopoopo i ai suiga e pei ona talosaga e le malo.

“Ua toe lua vaiaso ona mae’a lelei lea o galuega uma e tatau ona fa’atino mo le soso’oga o le galuega i Fagasa, ona tu’u lea i le fa’asologa a Kovana Sili ma le faigamalo i se aso e tatala aloa’ia ai,” o se tala lea a Mrs. Fruean, o ia e ona le Nana’s Construction.

MCH DENTISTRY MA POLOKALAMA FA’INIFO FANAU AOGA

O se tasi o vaega taua tele a le Materrnal Child Health (MCH) a le Matagaluega o le Soifua Maloloina o le auaunaga lea i fanau a le atunu’u, ia iloa ona tausia lelei o latou oloa, po’o nifo. I se fa’atulaga ua faia nei, so’o se taimi e fa’aauau ai le auaunaga a foma’i nifo lea e fa’asolo i tua i a’oga tulaga lua, e o ai fa’atasi ma sui o le MCH Dentistry Awareness, ina ia latou faia a’oa’oga, i le fanau a’o tatalia o latou taimi e va’aia ai foma’i nifo nei.

“O le taimi lea e aoaoina ai fanau, aua fo’i ua tu’u mai e faia’oga e o mai e fa’atali le taimi e va’aia ai latou oloa e foma’i nifo, ma ua avanoa lelei o latou mafaufau, ina ia fa’ailoa ma fa’atonu ai ia i latou ala e tausia lelei ai o latou nifo,” o se tala lea a Sinafea Sio-Koale o le MCH Dentistry.

O i latou uma fo’i sa fesoasoani i le Polokalama Fa’apitoa a le JROTC Dentistry sa faia i Leone High School ma e to’a ono i latou e fesoasoani i ali’i ma tama’ita’i foma’i nifo i ia aso e lua na fa’atautaia ai o le vaiaso ua te’a.