Ads by Google Ads by Google

Tala o Ta’aloga Kirikiti

Maoa’e taumafaiga a tama ta’aalo i ta’aloga o lo’o fa’agasolo nei o le Liki Kirikiti o le Fu’a 2017  (ata: THA)E mao atu le tuliga o le ‘ai a ua le aoga ua sapoi’a le ta. Malo le finau i ‘au e lua.  (Ata: THA)Alu atü lava le polo misi le tama ta, ae le’i sasaua lava lana pate.  (Ata:THA)
tusia: THA

Lena ua ‘i fale o matega’ i le tu’ua ai o le tatou liki kirikiti i le vaiaso atoa na te’a atu nei, ia ae ou te manatu fo’i ‘ua nofofale Sa-Tui a Ma’a’ ona o le fa’asologa o le liki nei e lua e pei ona amata nei i le aso ananafi.

Ia ua amataina nei le Liki a Tamaita’i i le malae o Vaovai, Fagaalu, ae o liki a tama ua pei a ona i ai le aso ananafi, ua fa’aaoga le malae lea i Gagamoe, Pago Pago i le fa’aumaina o Ta’aloga se’i toe iloa se isi fa’asilasilaga.

Ae o le taimi nei, o le mea ua taoto ai, ia o le mea lena e ao ina fai e tamaloloa fa’apea ai ma tamaita’i.

O le fa’asologa o le liki a Tama, o ‘au nei e leai se faiaina e o’o mai i le taimi lea na fa’agafua ai kirikiti.  O lo’o tumau pea i le leai ni faiaina, ‘I’a Vai’ mai Malaeloa (3-0), ‘Fetulele’ mai Tula (2-0), ‘Seaula’ mai Aoa (2-0).

O ‘au nei e taitasi faiaina ae lua manumalo o le ‘Mosiula’ mai Masefau (2-1); ’Tunaula’ mai Fagaitua (1-1) ma ‘Pisisami’ mai Vaitogi (1-1).

O le vaega ua maua manumalo ta’itasi e aofia ai le ‘Sinapati’ mai Tafuna (1-2), ‘Mea’ese’ mai i Alofau (1-2), o isi ‘au ua na’o le taitasi a latou ta’aloga, e mafua mai ona sa fa’anoi mai le latou paga na tu’u e ta’a’alo i lea aso.

A’o ‘au la nei e leai ni manumalo lea e aofia ai le ‘Eagle’ mai i Pago Pago (0-2); Aga o le Pe’ape’a (0-1); PYCCT mai i Pavaia’i (0-2); ‘Lupelele’ mai i ‘Ili’ili (0-1), ma le ‘Lega’ mai Poloa (0-2). 

O le faiga o le liki, pei a ona i ai i tausaga taitasi, e fa (4) faiaina ma malolo e pei a ona masani ai, e lelei foi lena i le tau totogia o pasi o lo’o ave ai ‘au ta’a’alo.

O le tama lea e tumau pea le ‘ai silia, o le tama o Pou lea e ta’alo mai i le Seaula mai Aoa, o lo’o tumau pea le ’ai silia e 53, tu lua ai ‘ai  le tama o Main a le ‘Mosiula’ mai Masefau, e 41; tulaga tolu ai Uale mai le ‘I’a Vai, Malaeloa e 30 ‘ai ua ia faina.

Ae e i ai le ‘ese’esega o nei ‘ai, na pepe uma Pou ma Main i la tataga, ae na’o Uale e le’i pe lava ae ua maua ‘ai a le Mosiula i lena taimi. Ae e i ai le masalosaloga e ‘ai-silia Uale pe ana le uma ‘ai a Masefau e 93 lea na latou tulia.

O le fa’ate’a o lo’o ‘olo silia pea e o’o mai i le taimi nei le ali’i o Sam mai le ‘Fetulele’ mai Tula e (9), i le ta’aloga ma le Lupelele mai i ‘Ili’ili. E tulaga lua ai Va’atofu mai le ‘Tuna’ula mai Fagaitua e (6) ma Logi o le ‘I’a Vai, Malaeloa e (6), Marcus mai le ‘Pisisami (6), ma Mao mai le ‘Pisisami’ e (6).

Ma isi fa’ate’a e ta’ilima (5) ma le fa (4) ‘olo ma fa’asolosolo atu i le ta’itasi.

O le mulumu lea ua ‘olo silia e tutusa uma mulumu a ‘au nei o Marcus o le ‘Pisisami’, Uale o le ‘I’a Vai’, Fala o le ‘Fetulele’, Vaitogi mai le ‘Mosiula’; Kris mai le Mosi’ula, Mao mai le ‘Pisisami’, Fala mai le ‘Sinapati’, Faumanu mai le ‘Fetulele’, Wesley o le ‘Pisisami’, Kuresa o le ‘Sinapati’, Pago mai le ‘Mea’ese’ ma Vito o le ‘Mea’ese’.

E lelei le silafia e tama tata ma i latou uma o e ta’a’alo, e mataala ai pe’a ta’a’alo ma nei ‘au, o le lisi na o mulumu lelei o le ta’aloga lea, e logologo puiali’i atu ai le tatou Nusipepa ina ne’i le faia le galuega, e ao ina faitatala atu ai.

I le aso ananafi fo’i lea na amatalia ai ta’aloga a le “Teine o le Asaga” mai Aunu’u ma “Teine o le Mosooipala (*2)”. E sefulu lua (12) ‘au o le liki a tamaita’i i lenei tausaga.

O le ‘Teine o le Moli’ mai Se’etaga, a le ‘Teine o le Mosoipala (1) mai Leone, Teine o le Moso’ipala (2) mai Leone, ‘I’a Vai mai Malaeloa (le siamupini 2016), ‘Lupelele’ mai ‘Ili’ili.

O ‘Teine a le Seaula’ mai Aoa, o le ‘Auteine mai i Alao, ‘Teine o le Asaga’ mai Aunu’u, ’Teine o le Aeto’ mai Pago Pago, ‘Teine o le I’a’, mai Fagasa, ‘Teine o le Manulele Tausala’ mai Nu’uuli, ‘Au a Teine o le Autalavou mai Fagaalu.

O le a e molimauina le fiafia o na’i teine fa’apea le itupa a tama, i lenei ta’aloga e faia lava i aso taitasi.

O le kirikiti, lea ua fa’amaonia ai le mau, i ‘au a tatou e ave so’o i fafo, pe o Samoa poo Amerika ma Niu Sila,  ua masani ai ‘au a Mosiula, poo le ‘au a Vatia, e i ai le ‘au a Faleniu; e o atu  lava i na atunu’u ma malo mai ai.

O lona uiga, ua fai lava si maualuga o le kirikiti iinei, ma o tatou tagata lava o lo’o fiafia i le kirikiti fa’asamoa, aua e to’atele tama lelei i lenei fa’agatama ua gasolo mai Samoa i’inei  e ta’a’alo i Tutuila.

Ua mautinoa e to’atele fo’i o tama na fananau ma soifua ane lava i’inei, ua agava’a i lenei ta’aloga ma o lea ua vaaia le tau le mafai e Tama ua leva ona kirikiti, le a’e mai o le ‘aulaiti ia, na lelei lava i’inei a latou kirikiti.

O le aso Tofi o le a maua uma atu ai se ripoti i tala mai malae nei e lua, Tama i Gagamoe, Pago Pago ma Teine i Vaovai, Fagaalu.