Ads by Google Ads by Google

Kiribati o le Sisigafu’a 2017

O se va’aiga i le ‘au a Malaeloa I’a Vai i le latou tataga muumuu i le fetauiga ma le ‘au malosi a le Senapati mai Tafuna. [ata: THA]Va’aiga i le ta mata’utia lea mo le ‘au a le Sinapati i le latou fetauiga ma le ‘au a le I’a Vai mai Malaeloa i le aso Toonai na te’a nei. [ata: THA]
tusia: THA

Malo le soifua ma le lagi e mama i le tauasa mai i lena vaiaso atoa ua te’a, i le lua ai lenei o vaiaso i le liki kirikiti o le Fu’a 2017, ma o tala lenei i ta’aloga i lena vaiaso.

E le’i taunu’u le ta’aloga lea na tu’u e faia i le va o le ‘Mea’ese’ mai i Alofau ma le ‘au a le ‘Tama o le Samoa Moni’ mai Pavaiai lea sa tu’u e fai i le aso Tofi, ona o se fa’alavelave sa fa’anoi mai ai lenei ta’aloga, ia o lea ua toe vaai ai ise aso e fetaui ma lenei ta’aloga.

Peita’i, o le vaiaso o le ‘le mautinoa’ i le tele o ta’aloga, sa ‘ese le mea na manatu i ai tagata, ae te’i ua uma ane ua sui fo’i le ‘au e malo, te’i ane ua malo le ‘au sa le manatu i ai le ‘au maimoa.

ASO TOFI 02/09/2017: ‘FETULELE’ TULA (1-0) vs AETO, PAGO PAGO (0-1).

O le ta’aloga lava lenei na fa’atalitali uma i ai isi ‘au, o le ta’aloga muamua e ta’a’alo ai le ‘au lea a Fetulele, e fia vaai foi le toatele i le malosi o le a sau ai le latou ‘au, pe a fua i le tausaga ua te’a nei.

Ae o le ‘au tuai lava a le Aeto, o la e tumau pea a latou fa’ate’a ma o latou mulumu ua fai si tuai, ona ua lapopo’a o tino o tama ua mafua ai ona fiu e tau pu’e se polo i le tele o taimi.

Na tata muamua le Aeto, ma na manaia le la latou taumafaiga, e 60 ‘ai, ae mae’a latou pe. I na ‘ai e 60, na ‘ai-silia ai le tama o Kamilo e sefulu valu (18), Velio e sefulu tolu (13), ma le ‘auvaega lea na ta’i lima e i ai Joe, Java, Tuie ma Tavita.

I le talitua’a a le Fetulele e feololo e le’i matua’i tulai mai i se talitua’a e fai ai se fa’alavelave, ua fa’amoemoe tele i te’a a le tama o Tanielu (2) ‘olo, ma Sam e (4) fo’i ana ‘olo.

Lena na maua ai ‘ai e ono sefulu (60) a le Aeto, ia o ifo loa le Fetulele mo le tulia o ‘ai ia e ono sefulu.

 I le tulia o ‘ai e le Fetulele na tula’i mai ai le isi ‘pe’a’ lena, o le tama o Solofa e 29 ona ‘ai, ae o le tele o tagata ta o le latou ‘au, e ta’i 5 i le 3 o latou ‘ai, ona sapo atu lea i le talitua’a a le Aeto.

O le au a Alofau lea o le a sauni atu nei e ta’a’alo ma Tula i le Aso Gafua, ae sauni mai Pago Pago e fetaui ma Masefau i le Aso Lua.

ASO FARAILE 02-10-2017: TAMA O LE ‘LEGA’, POLOA (0-2) vs ANA O LE PE’APE’A (2-0)

I le ‘au lenei a le Tama o le Lega mai Poloa, se’i toe taga’i ane lava po’o le a le mafuaga ua ala ai ona fa’aletonu fa’apea le outou ‘au, le ‘au sa i ai i le tausaga lea ua te’a i faigamea o le Liki kirikiti, na i ai lava i latou i ‘au maualuluga.

Ae o lenei, ua o atu e tata te’i i le soso’o o le lua faiaina i ‘au laiti o le liki.  (Fa’amalie atu, ae o aga o le maimoaga a le atunu’u, ua fai i ‘au a Fagatua ma Auma/Auto, e leai ou te le manatu fa’atauva’a i a outou ‘au) A’o se manatu e tutonu ia te a’u, sa tatau lava ona maua se malo a Tama o le Lega i le fa’alua ai lenei o ta’a’alo.

O ‘au matutua, ua maimoaina e mautinoa a pe le isi tama ta, ae sau fo’i le isi tama e ta, o le matua lelei lava. Afai o oe o le fa’ate’a, e pe atu le isi tagata ta lelei ae toe vaai atu o le isi fo’i tagata e ta lelei lea ua toe tu mai fo’i.

I le ta’aloga lenei a le ‘Ana a le Pe’ape’a’  ma le ‘Lega’ na muamua ona tata le ‘au a le ‘Ana o le Pe’ape’a’ ona atoa lelei lea o latou pe e sefulu iva (19) ae ua maua ‘ai e fitu sefulu ma le fitu (77), ona tuli loa e tama o le ‘Lega’.

Ua fiafia lava si tulafale Ma’ilealo Usoali’i ua maua nei le malo muamua a tama o le ‘Lega’ i lenei tausaga, ae te’i ane ua mao foi le atoa le mitamita ma le fa’amoemoe a le tapuaiga a Afioaga a Poloa.

Ua le maua ‘ai na manatu le tofa ia Ma’i, e maua e le to’alima pe pe a lelei lava le ta a le latou ‘au. Ia, soia ia e ‘ese lava le mea na i ai o tatou manatu, e ‘ese fo’i le mea na naunau i ai le ’Ana o le Pe’apea’.

Ua lua ai nei malo a le ‘Ana o le Pe’ape’a’ leai se faiaina, ae se’e atu le ‘au a le Lega, i le lua nei ana faiaina ae leai se malo, o lena e lelei le ‘au ali’i Rev. Manu’ele ma le Tofa ia Ma’ilealo…pei lava e i ai se mea o afua ai ona fa’apea taaloga amata o lenei tausaga.

ASO TO’ANA’I 02-11-2017: PISISAMI (1-1) vs TAMA O LE SEA’ULA, AOA (1-0)

O se ta’aloga manaia fo’i lenei ta’aloga, i le ‘ese’ese o ‘ai na maua e tama o le ‘Sea’ula’ i le tama o Pou lea na ia mauaina ‘ai e lima sefulu tolu (53)’ai, ma le tagata lea na pito i ai o Tu’itu’i (8) e valu ona ‘ai.

Lea ua tula’i mai o le ‘ai silia lea ua i ai i lenei tausaga kirikiti 2017, o ‘ai ia na taina e Pou o le Sea’ula, o se matati’a (53)’ai, ua ‘aisilia mo le taimi nei.

Sa sili la ona fa’apea le tala i le ta’aloga lea, ‘ua fiu fa’ate’a a le Pisisami i le ta poto o lenei tama o Pou’, ou te le iloaina po’o se mea ua na o’o i ai i le aso lena.

E fa’afa lelei ona i ai le avanoa e maua ai le pe a le tama o Pou, i le se’e masau lava na te’a atu e Mao, ia ma i si polo sapo na fa’atali e le talitua’a, ae sau ua taia i luga i lala la’au lea e i totonu o le malae ma le maua ai le polo.

Na atoa le selau o ‘ai (100) ae na o le sefulu tolu ia pe, tuli loa e le Pisisami e le’i maua ‘ai, e na’o le valu sefulu lua (82) ‘ai a le ‘Pisisami’ ae mae’a le ta’aloga.

O tama o le ‘Sea’ula’ na maua a latou ‘ai o Pou e lima sefulu tolu (53) ‘ai, Tu’itu’i e valu (8) ‘ai, Lauama e ono (6), a’o tama o le ‘au ta a le Pisisami o Mao e sefulu ono (16), Marcus e sefulu lima (15), Wesley sefulu lua (12).

‘I’A VAI’, MALAELOA (2-0) vs ‘SINAPATI’, TAFUNA (0-2).

“O le leaga ia o kolo na fai nei e fa’amasino o lenei liki, ae maise ai fa’amasino lea na faia le ta’aloga o Tau,” o le le malie lena a se tasi tagata na matamata i le ta’aloga.

Peita’i e tele isi tomumu, ae leaga e tutupu ai vesiga, e sili la ona fa’anofo pea i tua.

I ai mea na tutu ma fa’aumiumi ai finauga, peita’i,  fai a ia, na tata muamua le ‘I’a Vai’ ma ua ‘ese fo’i tama ua tulä’i mai le ta lelei i lenei ta’aloga ma Sinapati.

Ua le o Uale ma Sakai ma Fa’amanu, ae ua sui fo’i le tagata e sili i ‘ai, o le tama o Soli lea na taina ia ‘ai e lua sefulu ma le fitu (27) ma le Susuga ia Rev. Faigata Manase, Logi ma le tama o Taufusi Ailao na taina ‘ai e sefulu lua (12).

Na atoa lelei le selau o ‘ai, ia e tusa ai ma ala o le tulafono o le liki a selau loa a ‘ai, tuli loa e le isi ‘au ia ‘ai pe maua.

Sa le manuia le tataaga a Sinapati, uma o latou pe e sefulu iva (19) ae maua ai loa ‘ai e 87, ua toe malo ai le I’a Vai i le latou ta’aloga, o tama na sili o latou ‘ai o Aitui e sefulu fa (14) ‘ai, o Peteru e sefulu ma le fa fo’i (14) ona ‘ai, ma Veve lea na mauaina ‘ai e sefulu (10).