Ads by Google Ads by Google

KOE FUKA FAKAFONUA ‘O TONGA KE MALU’I

Malo e laumalie ‘a Hou’eiki mo Ha’a Lotu moe lelei ‘ae Tonga kotoa ‘oku tau fakapaea he funga maka ko Tutu’ila mo Manu’a ‘ae Tu’i Manu’a.  Tulou kae ‘ata mu’a ke fakahoko atu e ki’i fatongia ko’eni.

Koe fakamanatu atu ki hotau kainga Tonga kotoa he fonuani ke mou fakatokanga’i ange ‘ae founga moe feitu’u ‘oku totonu ke tau toki faka’ali’ali, fusi pe ngaue’aki ai ‘ae fuka fakafonua ‘o Tonga.

Puipuitu’a:  

Koe Fuka Tonga ‘oku ne fakafofonga’i fakakatoa ‘ae kakai moe Pule’anga ‘o Tonga.  Koia ‘oku ne faka’ali’ali e Fuka ‘oku ne fakafofonga’i ‘ae Pule’anga Tonga, pea ‘oku fakahoko ia koe fakafofonga’i ‘ae Pule’anga Tonga mo hono kakai.

Faka’aonga’i totonu:

Koe konga si’i pe ‘eni ‘oe ngaahi feitu’u ke faka’ali’ali ai e Fuka Tonga ‘ihe feitu’u faka Pule’anga; 1) ‘I ha ha’ele mai ‘ae ‘Ene ‘Afio koe Tu’i ‘o Tonga.  2) Ngaahi fakataha fakapule’anga ‘oku kau kiai ha taha ‘oku ne fakafofonga’i ‘ae Pule’anga Tonga.  3) ‘Ufi’ufi ‘oe kofini ‘oha pekia na’e ngaue fakapule’anga ‘i Tonga (‘ihe fakangofua mei he ‘Ofisi Palasi mei Tonga).  4) Faka’ilonga’i ‘o ha ‘ofisi ‘Amipasitoa pe Konisela ‘oe Pule’anga Tonga.

‘Oku tau fa’iteliha pe ke fokotu’u e Fuka Tonga hotau ngaahi ‘api taautaha kau ai moe Maketi Tonga he koe tofi’a ia ‘oe Pule’anga Tonga.

‘Oku ‘ikai totonu:

Ke tau ngaue ‘aki e Fuka Tonga ‘i ha potu fakapule’anga ke fakaha ‘aki ha siasi, kautaha, kalapu, komuiniti pe ko ha kemipeini faka politikale.  Koe fakatātā ‘eni: ‘Oku ‘ikai totonu ke fusi e Fuka Tonga ‘e he Kalapu Fofo’anga ‘i ha potu fakapule’anga neongo koe kau Tonga he ‘oku ‘ikai kenau fakafofonga’i ‘ae kainga Tonga kotoa he fonuani pea ‘oku ‘ikai koe fakafofonga kinautolu ‘oe Pule’anga Tonga ‘i he fonuani.  ‘Oku ‘ikai totonu ke fusi e Fuka Tonga ‘i ha Kemipeini fakapolitikale he ‘oku ‘ikai ke kau mai e Pule’anga Tonga ki ha kemipeini ho tau fonuani.      

Fakamanatu:

Mou manatu’i ange mu’a ke ‘oua na’a hoko ‘e tau ‘ofa ki hotau fonua tupu’anga ke ta’omia ai ‘oku totonu ke tau faka’apa’apa’i ‘ae fonua ko ‘eni ‘oku tau fakapaea ai.  Koe ongo fuka pe ‘e faka’ali’ali ‘i honau feitu’u fakapule’anga ‘ae Fuka Amelika moe Fuka ‘o Amelika Samoa.

Kapau leva te tau faka’ali’ali e Fuka Tonga, fakapapau’i ‘oku ne fakafofonga’i ‘ae Tonga kotoa he fonuani pea moe Pule’anga ‘o Tonga.

Faka’apa’apa Atu pea ‘i ho lotoma’ulalo moe ‘ofa lahi.

Koau, Sione Lotolua Lousiale Kava

Matapule ‘ae Tu’i ‘o Tonga, Mafi to ‘i Amerika Samoa