[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua talanoa ai na o Sei ma si ana tama o Lami i totonu o le la faleoo.]

“ ..vaai oe Lami si a’u tama pele e to’atasi, e le mafai e upu ona fa’amatala lo’u loto fa’afetai i le Alii ona o oe, i lou loto alofa ma lou loto fa’amagalo ia te a’u, e ui sa ou agaleaga ia te oe ma faasaua ia te oe i le tele o aso o le olaga, ao lenei ua e tupu tupu a’e ma avea oe o se tasi ou te fa’alagolago malosi i ai, ua ou iloa lou alofa fa’amaoni ia te a’u lou tina, malie lou loto, fa’amagalo a’u ....” E le i mafai e Sei ona fa’aauau lana fa’amatalaga e fa’afetaia ai Lami e tusa o le galuega lea ua ia faia mo le aiga, ae o le tamaititi i lea taimi, ua ese ona lagona, e foliga mai ua tu’u i ai e le Ali’i le loto alofa, fa’amagalo ma le faiga o le fatuaiga, e tausi ma alofa ai i lona tina fa’apea le aiga atoa.

“Vaai oe Sei lo’u tina, aua e te tagi, soia fo’i e te fa’anoanoa ma le oso o lou ma’i, o lea ua maua la’u galuega e fesoasoani ai isi o tatou aiga i lenei taimi, e fa’atalitali ai se isi galuega e sili atu ou te maua, ina ia fesoasoani atili ai pea i le atina’eina o le tatou aiga.” E moe le tamaititi o Lami i lena po ae o le fafine o Sei, sa na o le nofo ma tatalo i le Alii ina ia foa’i le malosi i si ana tama, ma puipui o ia i soo se mea e fealua’i i ai, ma fa’ai’u ai loa talosaga a le fafine o Sei i lona talosia o le Samaria Agalelei o lo o fesoasoani ia Lami i taimi uma e fealua’i ai i le auala mo le sailiina o atigifagu e maua ai se tupe mo le latou aiga. E fetaui lava le savali mai o le tamaloa o Tomasi mai totonu o le fale o le a aga’i atu i le auala e fa’atali le pasi usu, ae ona vaaia loa fo’i ma Lami ua la’a la’a ane i luma o le la faleo’o ma lona tina. “Sole, o fea e a usu i ai,” o le fesili lea a Tomasi. ae na tali le tamaititi, “ou te alu e saili mai fo’i se tupe mo si o’u tina i lenei aso ...” E lei toe fesili Tomasi i se isi tala ae sa na o le savali a le momomo o lona loto i le alofa i lenei tamaititi, ma lona naunau e saili se tupe e tausi ai laua ma lona tina.

Na ona latalata lava o le pasi i le vaega tonu lea o lo o faigaluega ai le tamaloa Leoleopo, fa’atu loa e Lami le pasi, ona tu lea o le tamaititi i luga ua fa’atofa i le tuagane o lona tina o loo nofo mai i le isi nofoa, fa’atoa savali ai loa i fafo ma totogi lona pasese. O le toeaina leoleopo o Feo i le taeao lea, ua leva ona tapena mea uma o lana galuega, ua sauni fo’i e tatala le faitoto’a mo tagata faigaluega pe a gasolo atu, atoa ai ma le pepa panikeke lea ua leva ona ta’atia i ona tafatafa, e fa’atali ai le tamaititi o Lami pe a alu ane mo lana galuega masani. Na pei o se pese fiafia i le loto o Feo ina ua ia vaaia le tamaititi o Lami ua savali atu, ma ua naunau fo’i le toeaina e fia fa’alogo i se tala mai ia Lami e tusa ai o le taimi na taunu’u ai ma lana fa’atau i lo latou aiga aemaise ai o le tupe sa ia tu’u i lona lima, ma le lilo i le manatu o Lami, o lea o lo o mata’i uma atu lava e le tuagane o lona tina le nofoaga lea ua afe aga’i i ai.