Ads by Google Ads by Google

Olaga Le Tumau

Vaega: 137

 

Tatou talia mea tiga uma ma mafatiaga o le soifuaga nei, aua o lo’o i le lagi lo tatou nu’u moni, tatou te olioli ma fiafia ai. ia avea pea le taulaga tutasi na molia e lo tatou Fa’aola o Iesu Keriso, e fai ma fa’amalosiau mo i tatou i taimi tatou te vaivai ai. Ae o le a toe fa’aauau atu la tatou tala mo lenei aso.

 

Na iloa lelei lava e Keisi, ua toe tu Loleni i le faitoto’a o lona potu, ma toe tepa tasi ane i a te ia, ona alu ai lea e ‘ai le lalolagi ma fai le mea ua mana’o i ai lona loto. Ae fai mai le tala a le isi lo’omatua o si o matou aiga, “E Loleni, alu e ‘ai, e te fiu lava e ‘ai, e fuli mai le lalolagi ‘ai fa’asolo atoa oe.”

 

Ina ua alu ‘ese Loleni, na lagona ai e Keisi le mafatia o lona loto, ma ua mafaufau, pe o i ai lava se lagona i lona to’alua, e toe manatu ai i le leaga o lana mea ua fai i a te ia. Na toe tali lava e Keisi lana ia fesili, “Ailoga, pau le mea ua mana’o i ai le loto o Loleni, ia vave ona oti, ae se sagai ane e sae mata o le aitu, ma sua le aulapatai ma aulapauta.”

 

Ae fai mai le tama’i isumu, “Kalofa e, Legi, ka fefe i lou loko, ua makua’i malo e pei o le pa ua uma oga uela, ae e ke va’ai i ai i le mea o le a fai e Keisi ia ke oe, alu e alu, measili ua maua lou ie faikaga e ufiufi ai ou lafa, ua le mafai e Keisi ona fa’amakala.”

 

Fai mai na ona tapuni lava e Loleni o le faitoto’a o le potu o Keisi, e le i toe fa’atali Keisi i lea taimi, ua taumafai loa e fa’agaioi ona lima, o ona vae fa’apea ma lona tino atoa. “Se ma’imau lava pe ana mafai ona ou fa’agaioi uma lo’u tino, ua ta fia o’o atu lava i le telefoni, se i vala’au le iva, tasi, tasi, “911”.

 

Ina ua taumafai Keisi e fa’agaioi lona tino atoa, sa lagona lava le faigata ma le tiga, ae sa finau pea lona loto, ia  mafai ona alu ‘ese mai luga o le moega, ia mafai ona o’o atu i le telefoni ma vala’au mo se fesoasoani. O le taimi lea, ua alu fa’asolo atoa le ta’avale a Loleni i luga o le auala o sa’olotoga, ua le kea lava i se mea e tasi pe lua, o lea ua aga’i atu e piki Lulu ma lana tama o Lola, ma o loa i le isi Setete e fa’amatamata ai Lulu ma Lola.

 

E fai pea….