Vaega 16

“Ieova o Au e, sa e tauave o matou tiga ma mafatiaga a’o e sagai atu e tali le vala’au na vala’auina ai Oe e Lou Tama oi le Lagi, fa’afetai, fa’afetai tele, e le lava upu o le gagana e sula ai Lou alofa ma Lou agalelei, ae tau ia o se mea e iloga ai lo matou o’o atu i luma ma le agaga maualalo i lenei aso, e fa’afo’i atu le vi’iga ma le fa’ane’etaga i Lau Afio e fa’avavau, amene.

Manuia le alo atu o lea tunu’u i faiva ma tiute o lenei aso, ae o le a fa’aauau atu la tatou tala e pei ona masani ai, aua lau faitau. Ia o tatou maua pea le agaga o le onosa’i ma le fa’apalepale i mea uma ona taunu’u lea i le manuia a tatou fuafuaga.

Ina ua uma ona tui e le tama’ita’i foma’i ia vaila’au, na alu ai loa le solo a ali’i foma’i i fafo mai le potu o Keisi. A’o le taimi lea, o lo’o fa’apea mafaufauga o le teine, “Fa’atali mai, o se mea sese le mea lea ua fai i a te au, e tatau ona ou ta’u atua i a te outou, e le o koma a’u, le Atua e, fa’amolemole ta’u ane i tagata nei, o lo’o o’u malamalama i mea uma lava, fai i ai le Atua, o lea ou te malamalama i a latou tala o lo’o fai, afai e te faia lea mea le Atua mo a’u, ou te tauto atu, o le a ava au ma se tagata lelei, o se tina lelei, o se uo lelei, o se uso lelei. Le Ali’i e, ua ou lagona le fefe, ona ou te le mana’o ou te taoto fa’apenei i aso uma o lo’u olaga, e le mafai ona ou pupula, le mafai ona ou gaioi, le mafai ona ou tautala, fa’amolemole le Atua, fesoasoani mai i a te a’u.”

A’o fa’agasolo mafaufauga ia o Keisi, na amata ai fo’i ona ia lagona le tulaga ua o’o i ai ia, ina ua tui atu vaila’au i lona tino ma ua amata ai loa ona ia lagona le fia moe, ma na fai ai loa ma lana malologa.

Na fa’ate’ia le malologa a Keisi, ina ua fa’alogo ane o fa’apea ane lona to’alua o Loleni, “Keisi, nofo i luga, o lo’o iai le tagata o lo’o i totonu o le fale. Na fesili loa Keisi i lona to’alua pe o le a le mea o le a fai, ae sau le tali a Loleni, o lo’o i a te ia le fana, ma e tatau ona lalafi i totonu o le kolosi, ma loka le faitoto’a.

Manatua, o le tagata ua koma, ua le sa’osa’o fo’i lona mafaufau ma o le mea tonu lava lea ua tupu ia Keisi, a’o ta’oto pea i luga o le moega i totonu o le falema’i. O lea e i ai lona manatu o lo’o momoe pea ma si ona to’alua, peita’i, o lea o lo’o i totonu o le potu o le falema’i. O lea la ua ala te’ite’i a’e nei, ma ia fa’alogo atu ai i le si’uleo o lana uo o Keli.

E faia pea….